ޔަހޫދީ އިސްތިޢުމާރީ ފައުޖުން ހިންގަމުންދާ ޢުދުވާނުގެ ސަބަބުން ފަލަސްޠީނުގެ ޣައްޒާއަށް ކުރިމަތިވެފައިވާ ޙާލަތުގެ ވާހަކަދައްކަވަމުން ދުނިޔޭގެ ޞިއްޙަތު ޖަމްޢިއްޔާގެ އެންމެ އިސްވެރިޔާ ޓެޑްރޮސް އަދޮނަމް ގެބްރިޔޭސަސް ކީރީތިކުރައްވައިފިއެވެ.
ޣައްޒާއަށް ކުރިމަތިވެފައިވާ ޞިއްޙީ ކުއްލި ޙާލަތާ ގުޅޭ ގޮތުން މަޝްވަރާކުރުމަށް ސްވިޓްޒަލެންޑުގެ ޖެނީވާގައި ބޭއްވި ދުނިޔޭގެ ޞިއްޙަތު ޖަމްޢިއްޔާގެ މަތީ ފަންތީގެ ބައްދަލުވުމެއްގައި ވާހަކަދައްކަވަމުން ޓެޑްރޮސް ވަނީ ޣައްޒާއަށް ދެމުންދާ ޙަމަލާތައް ވަޤުތުން ހުއްޓާލައި ފަލަސްޠީނުގެ މައްސަލައަށް ފުރިހަމަ ޙައްލެއް ގެނައުން މުހިންމު ކަމަށް ވިދާޅުވެފައެވެ. ޣައްޒާގެ ރައްޔިތުން ދިރިއުޅެނީ ވަރަށް ދެރަ ނިކަމެތި ޙާލަތުގައި ކަމުގައި ސިފަކުރައްވައި ޓެޑްރޮސް ވިދާޅުވީ އޭނާ ޤަބޫލުކުރައްވަނީ ހަނގުރާމަކޮށްގެން ޙައްލުކުރެވޭނެ އެއްވެސް މައްސަލައެއް ނެތް ކަމަށާއި ހަނގުރާމައަކީ އިތުރު ގެއްލުމާއި ނަފުރަތު ގެނުވާނެ ކަމެއް ކަމަށެވެ. އެހެންކަމުން ޞުލްޙައަށް އިސްކަން ދިނުމަށް އޭނާ ވަނީ ގޮވާލައްވައިފައެވެ. އެ ހިސާބުން އޭނާއަށް ކީރިތިކުރެއްވި ވާހަކަ ކުރިއަށްގެންދަވަން ދަތިތަކަކާ ކުރިމަތިވެވަޑައިގަތެވެ.
އެރިތުރިއާއަށް އުފެންވެވަޑައިގެންނެވި ޓެޑްރޮސް ވަނީ ހަނގުރާމައިގެ ނުރައްކަލާއި ބިރުވެރިކަމާއި ގެއްލުން ތުއްޕުޅު ޢުމުރުގައި އަމިއްލަފުޅަށް ތަޙައްމަލުކުރައްވައިފައެވެ. އޭގެ އިތުރުން އޭނާގެ ދަރިން ވެސް ވަނީ 1998-2000 ވަނަ އަހަރަށް އިތިއޯޕިޔާއާއި އެރިތުރިއާ ކުރި ހަނގުރާމާގައި އަމިއްލަ ފުރާނަ ސަލާމަތްކުރުމަށް ބިންގަރާހެއްގައި ރައްކާތެރިކަން ހޯދައިފައެވެ.
ޔަހޫދީން ޣައްޒާއަށް ދެމުންދާ ޙަމަލާތަކުގައި ދުނިޔޭގެ ޞިއްޙަތު ޖަމްޢިއްޔާގެ އިދާރާތަކާއި މުވައްޒަފުންނަށް ވެސް ޙަމަލާތައް އަމާޒުވެފައިވެއެވެ. އެ ޙަމަލާތަކުގައި އެ ޖަމްޢިއްޔާގެ ގިނަ ޢަދަދެއްގެ މުވައްޒަފުން ވަނީ މަރުވެފައެވެ.