ރަޝިޔާގެ އަސްކަރީ ފައުޖެއް ފުރަތަމަ ފަހަރަށް ހުޅަނގު އެފްރިކާގެ އޮންނަ ބުކީނާ ފާސޯއަށް ފޮނުވައިފިއެވެ.
ބުކީނާ ފާސޯއަށް ރަޝިޔާގެ ފައުޖު ފޮނުވާފައި ވަނީ ހުޅަނގު އެފްރިކާގެ ޤައުމުތަކުގެ މައްޗަށް ފަރަންސޭސިވިލާތުން އަތްގަދަކޮށްފައި އޮތް އޮތުމަށް ނިމުމެއް އައިސްފައިވާ ދަނޑިވަޅެއްގައެވެ. އެ ގޮތުން 2023 ވަނަ އަހަރުގެ ކުރީކޮޅު ބުކީނާ ފާސޯއިން ވަނީ އެ ޤައުމުގައި ތިބި ފަރަންސޭސިވިލާތުގެ ސިފައިން ފޮނުވާލައިފައެވެ. ބުކީނާ ފާސޯއާ އިންވެގެން އޮންނަ މާލީގައި މިހާރު ވެސް ރަޝިޔާގެ ކުލީ ސިފައިންގެ ބައެއް ކަމުގައިވާ ވެގްނާ ގްރޫޕުން ޙަރަކާތްތެރިވެއެވެ.
ރަޝިޔާގެ ދިފާޢީ ވުޒާރާއާ ގުޅުން އޮންނަ މަސްދަރުތަކުން ބުނެފައިވާ ގޮތުގައި އެ ޤައުމުން ބުކީނާ ފާސޯއަށް ވަނީ 100 ސިފައިން ފޮނުވައިފައެވެ. އަދި ކުރިއަށް އޮތް ދުވަސްތަކުގައި އިތުރު 200 ސިފައިން ފޮނުވާނެ ކަމަށް އެ މަސްދަރުތަކުން ބުނެފައިވެއެވެ. ނަމަވެސް ބުކީނާ ފާސޯގެ ސަރުކާރުން އެ ކަމާ ރަސްމީ ގޮތުން އެއްވެސް އެއްޗެއް ބުނެފައެއް ނުވެއެވެ.
ބެލެވޭ ގޮތުގައި ރަޝީޔާގެ ފައުޖުން ޙަރަކާތްތެރިވާނީ ބުކީނާ ފާސޯގެ ސަލާމަތީ ކަންކަން ބެލެހެއްޓުމާއި އެ ޤައުމުގެ ސިފައިން ތަމްރީން ކުރުމަށެވެ. ބުކީނާ ފާސޯއާއި މާލީގެ އިތުރުން އެ ސަރަޙައްދުގެ ޤައުމެއް ކަމުގައިވާ ނައިޖާގައި ވެސް މިހާރު އޮތީ ރަޝިޔާއާ ގާތް ގުޅުންތަކެއް ބާއްވަމުންދާ އަސްކަރީ ވެރިކަމެކެވެ. ފާއިތުވި ދުވަސްތަކުގައި ނައިޖާގެ އިތުރުން ޗާޑުގެ އަސްކަރީ ވެރިން ވަނީ ވަކިވަކިން ރަޝިޔާއަށް ރަސްމީ ދަތުރުތަކެއް ކޮށްފައެވެ.