އިނގިރޭސިވިލާތުގެ ރަސްގެފާނު ޗާލްސް ތިންވަނަ، ޕްރޮސްޓޭޓުގެ ފަރުވާއަކަށް ހަސްފަތާލުގައި އެޑްމިޓު ކޮށްފިއެވެ. އިނގިރޭސި ޝާހީ ގަނޑުވަރު ބަކިންގްހަމް ޕެލެސްސުން ވަނީ އެ ކަން ކަށަވަރު ކޮށްދީފައެވެ. ރަސްގެފާނު އެޑްމިޓު ކޮށްފައި ވަނީ ލަންޑަން ކްލިނިކް ޕްރައިވެޓް ހަސްފަތާލުގައެވެ. އޭނާގެ ފަރުވާ ކިހާ ދުވަހެއް ހޭދަވާނެ ކަން ސާފެއް ނޫނެވެ.
ޗާލްސްއަށް ފަރުވާ ދިނުމަށް ހަމަޖެހިފައި ވަނީ ޕްރޮސްޓޭޓް ދުޅަވުމާ ގުޅިގެން ކަމަށާއި އޭނާއަށް ކުރިމަތިވެފައި ވަނީ ސީރިޔަސް ޞިއްޙީ މައްސަލައެއް ނޫން ކަމުގައި ޝާހީ ގަނޑުވަރުން ބުނެފައިވެއެވެ. އަދި، އޭނާގެ ފުރާނައަށް ނުރައްކާވާ ފަދަ ޙާލަތެއް މެދުވެރިވެފައި ނުވާ ކަމުގައި ވެސް ގަނޑުވަރުން ބުނެފައިވެއެވެ.
އިނގިރޭސި ވަލީއަޙުދު ވިލިޔަމްގެ އަނބިކަނބަލުން ޕްރިންސަސް އޮފް ވެލްސް ކެތެރިން މިޑްލްޓަނަށް ވެސް ޞިއްޙީ މައްސަލަތަކެއް ކުރިމަތިވެ، މިހާރު ގެންދަވަނީ ފަރުވާ ހޯއްދަވަމުންނެވެ. އެ ކަމަނާ ވެސް އެޑްމިޓު ކޮށްފައި އޮތީ ލަންޑަން ކްލިނިކް ޕްރައިވެޓް ހަސްފަތާލުގައެވެ. އެޑްމިޓުވުމަށް ހަަސްފަތާލަށް ވަޑައިގެންނެވުމަށް ފަހު ޗާލަސް އަމީރާ ކެތެރިންގެ އަރިހަށް ޒިޔާރަތް ކުރެއްވިއެވެ.
ރަސްގެފާނަށް ޕްރޮސްޓޭޓް ދުޅަވުމުގެ މައްސަލަ ކުރިމަތިވެފައިވާ ކަމުގެ މަޢުލޫމާތު ހާމަ ކޮށްފައި ވަނީ، މި މައްސަލައާ މެެދު އާންމުންގެ މެދުގައި ހޭލުންތެރިކަން އިތުރު ކުރުމުގެ ނިޔަތުގައެވެ. ޕްރޮސްޓޭޓް ފަރުވާއަށް ޗާލްސް އެޑްމިޓު ކުރަން ހަމަޖެހިފައިވާ ކަމުގައި މަޢުލޫމާތު ހާމަ ކުރުމާ އެކު، އިނގިރޭސިވިލާތުގެ ޞިއްޙަތާ ބެހޭ މައި އިދާރާ އެން.އެޗް.އެސްގެ ވެބްސައިޓުން ޕްރޮސްޓޭޓްގެ މައްސަލަތަކާ ގުޅޭ ގޮތުން މަޢުލޫމާތު ހޯދާފައިވާ މީހުންގެ ޢަދަދު އެތަކެއް ގުނައަކަށް އިތުރުވެފައިވާ ކަމުގައި އެ އިދާރާއިން ބުނެއެވެ. މި ކަމާ ގުޅޭ ރަސްގެފާނު ވަރަށް ބޮޑަށް ހިތްޕުޅާވެފައިވާ ކަމުގައި ބަކިންގްހަމް ޕެލެސްސުން ބުނެއެވެ.
ޞިއްޙީ ފަރުވާއާ ބެހޭ ވެބްސައިޓްތަކުން ބުނާ ގޮތުގައި ޕްރޮސްޓޭޓް ދުޅަވުމުގެ މައްސަލައަކީ އުމުރުން 50 އަހަރުން މަތީގެ ފިރިހެނުންގެ މެދުގައި ޢާންމު މައްސަލައެކެވެ. އެއީ ސީރިޔަސް މައްސަލައެއް ނޫން ކަމުގައި ވެސް ވެބްސައިޓްތަކުގައި ބުނެފައިވެއެވެ. އެއީ ޕްރޮސްޓޭޓަށް ޖެހޭ ކެންސަރަށް މަގުފަހި ކުރުވާ މައްސަލައެއް ނޫން ކަމުގައި ވެސް ޞިއްޙީ މާހިރުން ބުނެއެވެ.