ޔަހޫދީ ފައުޖުން ޣައްޒާގައި ހިންގަމުންދާ ލާއިންސާނީ ޢުދުވާނުގެ ސަބަބުން އެ ސަހަރުގައި ދިރިއުޅޭ 2.3 މިލިޔަން މީހުންގެ ތެރެއިން ގިނަ ޢަދަދެއްގެ ބަޔަކު ބަނޑަށް ޖެހެމުންދާ ކަމުގައި އ.ދއިން ބުނެފިއެވެ. ޣައްޒާގައި ހަރަކާތްތެރިވާ އިންސާނީ އެހީދޭ ޖަމާޢަތްތަކުގެ އޮފިޝަލުން ވިދާޅުވީ، ހައިހޫނު ކަމުގެ އަސަރު އެންމެ ބޮޑަށް ކުރަމުން ދަނީ ޣައްޒާގެ އުތުރުގައި ދިރިއުޅޭ ރައްޔިތުންނަށް ކަމުގައެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނާ އެކު، ޣައްޒާއަށް އެތެރެވެވެން އޮތް ހުރިހާ މަގެއް ވެސް ވަނީ ބަންދު ކޮށްފައެވެ. އަދި، ޣައްޒާއަށް ކާބޯތަކެއްޗާއި ބޭސް ފަރުވާއަށް ބޭނުންވާ ސާމާނު އެތެރެ ކުރުމަށް ވަނީ ހުރަސް އަޅާފައެވެ. މި ވަގުތު ޣައްޒާއަށް އިންސާނީ އެހީގެ ސާމާނު އެތެރެ ކުރެވެން އޮތް ހަމައެކަނި މަގަކީ މިޞްރާ ގުޅޭ ރަފަޙް ހުރަހެވެ. އެއީ، ޣައްޒާ އެންމެ ދެކުނަށް އޮންނަ ރަށެވެ.
ރަފަޙް މަގުން މަދު ޢަދަދަކަށް އިންސާނީ އެހީއާއި ކާބޯތަކެތި ޣައްޒާއަށް އެތެރެކުރި ނަމަވެސް، އެ ތަކެތި ޣައްޒާގެ އުތުރުގައިވާ ރަށްތަކަށް ފޯރުކޮށްދެވޭނެ ގޮތެއް ނެތެވެ. މި ކަަމަށް އޮތް އެންމެ ބޮޑު ހުރަހަކީ، ޔަހޫދީ ފައުޖުގެ މެދުކެނޑުމެއް ނެތް ޙަމަލާތަކެވެ. ޣައްޒާގެ އުތުރަށް ދަތުރު ކުރެވެގެން އޮތް ހުރިހާ މަގެއްގައި ޔަހޫދީ ސިފައިން ދަނީ ބަރުހަތިޔާރާ އެކު ހަރަކާތްތެރިވަމުންނެވެ. އަދި، ދިރިހުރި ފުރާނައެއް ފެންނައިރަށް ވައިގެ ޙަމަލާތަކާއި، އަސްކަރީ ޓޭންކުފަހަރު ބޭނުން ކޮށްގެން ޙަމަލާ ދެމުންނެވެ.
"ޣައްޒާގެ އުތުރުގައި ތިބި ރައްޔިތުންނަށް އެއްވެސް ވަރަކަށް ކާބޯތަކެއްޗެއް ނުލިބޭ. އެ މީހުންނަށް ވަނީ ހައިހޫނުކަމާ ކުރިމަތިލާން މަޖުބޫރުވެފައި. ކާބޯ އެއްޗެއް ލިބޭތޯ އެ މީހުން މިހާރު ދަނީ ސަލާން ޖަހަމުން،" ޣައްޒާގައި ހުންނަވާ ދުނިޔޭގެ ޞިއްޙަތު ޖަމުޢިއްޔާގެ ކޯޑިނޭޓަރު ޝޯން ކޭސީ ވިދާޅުވިއެވެ.
ޣައްޒާގެ އުތުރަށް ކާބޯތަކެތި ފޯރު ކޮށްދޭން ހުރަސްތައް ކުރިމަތި ކޮށްފައިވާ މި ދަނޑިވަޅުގައި، އެ ސަރަޙައްދުގައި ދިރިއުޅޭ ރައްޔިތުންގެ ހާލަތު ދެނެގަތުމަށް ވެސް ޔަހޫދީން ހުރަސްތައް ކުރިމަތި ކޮށްފައިވާ ކަމުގައި އެހީދޭ ޖަމުޢިއްޔާތަކުން ބުނެއެވެ. ހައިހޫނު ކަމުގެ ނުރައްކާ އެންމެ ބޮޑަށް ކުރިމަތިވެފައި ވަނީ ޣައްޒާގެ އުތުރުގެ ރަށްތަކުގައި ދިރިއުޅޭ ކުޑަކުދިންނަށެވެ. 2023 ވަނަ އަހަރު ޑިސެންބަރު މަހު އ.ދއިން ނެރުނު ރިޕޯޓެއްގައި ބުނެފައި ވަނީ، ޣައްޒާގެ ހުރިހާ ރައްޔިތުންނަށް ހައިހޫނު ކަމާ ކުރިމަތިލާން ޖެހިފައިވާ ކަމުގައެވެ.
ޣައްޒާގެ ޞިއްޙީ ޚިދުމަތްތެރިން ބުނީ، ހައިހޫނު ކަމާ ގުޅިގެން ހާލު ދެރަވެފައިވާ ގިނަ ޢަދަދެއްގެ ކުޑަކުދިން އެޑްމިޓު ކޮށްފައިވާ ކަމުގައެވެ. އެ ކުދިންނަށް ބޭނުންވާ މިިންވަރަށް ފައިދާހުރި ކާނާ ނުލިިބި، އެ ކުދިން ހިކިވެ އަނަރޫފަވަމުންދާ ކަމުގައި އެ މީހުން ބުނެއެވެ. އަދި، ތުއްތު ކުދިންނަށް ކިރު ދިނުމަށް މައިން ނުކުޅެދިފައިވާ ކަމަށާއި، ޔަހޫދީންގެ ޙަމަލާތަކުގައި ޒަޚަމު ކޮށްލާފައިވާ މީހުން ފަސޭހަވާން ދަތިވެފައިވާ ކަމުގައި ވެސް އޮފިޝަލުން ވިދާޅުވިއެވެ.
ކުޑަކުދިންނާ ބެހޭ އ.ދގެ އިދާރާ، ޔުނިސެފުން ބުނީ ހައިހޫނުކަމާ ގުޅިގެން ޣައްޒާގައި ދިރިއުޅޭ 10,000 އެއްހާ ކުޑަކުދިންގެ ފުރާނައަށް ނުރައްކާވެފައިވާ ކަމުގައެވެ. އަދި، ފައިދާ ހުރި ކާނާ ނުލިބުމުގެ ސަބަބުން އެ ކުދިންގެ ހެދި ބޮޑުވުމަށް އަސަރު ކުރަމުންދާ ކަމުގައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 26,083 އަށް އުފުލިފައެވެ. ޝަހީދު ކޮށްލާފައިވާ މީހުންގެ ތެރޭގައި 16,000 އެއްހާ އަންހެނުންނާއި ކުޑަކުދިން ހިމެެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 63,000 އަށް އަރައެވެ.