ރަޝިޔާގެ ރޮސްނިޔެފްތް ކުންފުނީގެ ތެޔޮ ސާފުކުރާ ކާރުޚާނާއަކަށް ޔޫކްރެއިނުން ޑްރޯން ޙަމަލާތަކެއް ދީފިއެވެ. ޙަމަލާ ދީފައި ވަނީ ރަޝިޔާގެ ދެކުނުގައި އޮންނަ ތުއަޕްސޭ ކިޔާ ރަށެއްގައި ހުންނަ ކާރުޚާނާއަކަށެވެ. ސަރަޙައްދީ ރޮނގު ހުރަސްކޮށް ރަޝިޔާގެ ރަށްތަކަށް ޔޫކްރެއިނުން ދެމުންދާ މި ފަދަ ޙަމަލާތަކުގެ ޢަދަދު ފަހަކަށް އައިސް ވަނީ އިތުރު ކޮށްފައެވެ.
ރޮސްނިޔެފްތަކީ ތެޔޮ އުފައްދާ ރަޝިޔާގެ އެންމެ ބޮޑު ކުންފުންޏެވެ. އެ ކުންފުނީގެ ކާރުޚާނާއަށް ޔޫކްރެއިނުން ދިން ޑްރޯން ޙަމަލާއާ ގުޅިގެން އެ ތަނުުގައި އަލިފާނުގެ ހާދިސާއެއް ހިނގިއެވެ. އަލިފާން ރޯވެފައި ވަނީ އެ ތަނުގެ ވެކިޔުމް ޔުނިޓެއްގައި ކަމަށް ތުއަޕްސޭގެ އިސް އޮފިޝަލެއް ކަމުގައިވާ ސެރްގިޔޭ ބޮއިކޫ ވިދާޅުވިއެވެ. މި ހާދިސާއާ ގުޅޭ ގޮތުން ރޮސްނިޔެފްތުން އަދި ވަކި އެއްޗެއް ހާމަ ކޮށްފައެއް ނުވެއެވެ.
ތޮސްނިޔެފްތުގެ ކާރުޚާނާއަށް ދީފައިވާ ޙަމަލާއަކީ، ފާއިތުވި ހަފުތާއެއްހާ ދުވަހުގެ ތެރޭގައި ރަޝިޔާގެ ހަކަތައާ ގުޅޭ ޢުމްރާނީ ވަސީލަތްތަކަށް ޔޫކްރެއިނުން ދީފައިވާ ހަތަރު ވަނަ ޙަމަލާއެވެ. މި ފަދަ ޙަމަލާތަކާ ގުޅިގެން ރަޝިޔާއަށް އިޤުތިޞާދީ ގޮތުން ގެއްލުންތަކާ ކުރިމަތިލާން ޖެހޭ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އަދި، ޔޫކްރެއިނަށް އަރާފައިވާ ރަޝިޔާގެ އިސްތިޢުމާރި ފައުޖުތަކުން ބޭނުން ކުރާ އަސްކަރީ އުޅަނދުފަހަރަށް ތެޔޮ ފޯރު ކޮށްދިނުމަށް ގޮންޖެހުންތަކާ ކުރިމަތިވެފައިވާ ކަމުގައި ޔޫކްރެއިނުން ބުނެއެވެ.
ބޯލްޓިކް ކަނޑުގެ އައްސޭރިފަށުގައި އޮންނަ ރަޝިޔާގެ ތެލާއި ގޭސް ބޭރުކުރާ ކާރުޚާނާއަކަށް ވެސް ޔޫކްރެއިނުން ދާދި ފަހުން ޙަމަލާތަކެއް ދީފައިވެއެވެ. ރަޝިޔާގެ ނޮވަޓެކް ކުންފުނިން ހިންގާ އުސްތުލޫގާ ކާރުޚާނާއަށް ދީފައިވާ އެ ޙަމަލާތަކާ ގުޅިގެން އެ ތަނުގައި ވެސް އަލިފާނުގެ ހާދިސާއެއް ހިނގިއެވެ. އަދި، އެ ތަނުގެ ޚިދުމަތްތައް މެދުކަނޑައިލަން ޖެހުނެވެ. އެއީ ރަޝިޔާއިން ތެލާއި ގޭސް ބޭރު ކުރަން ބޭނުން ކުރާ މައި ކާރުޚާނާއެކެވެ.
މި ފަދަ ޙަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގުތަކަށް ބަދަލުތަކެއް އަންނާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. ރަތް ކަނޑުގައި ދަތުރު ކުރާ ޔަހޫދީންނާ ގުޅުން އޮންނަ އާގުބޯޓުފަހަރަށް ޔަމަނުގެ ހޫޘީން ދެމުންދާ ޙަމަލާތަކާ ގުޅިގެން ވެސް ތެލުގެ އަގުތަކަށް ވަނީ ނޭދެވޭ އަސަރުތަކެއް ކުރަން ފަށާފައެވެ.
ޔޫކްރެއިނުން އެންމެ ފަހުން ޙަމަލާދީފައިވާ ތުއަޕްސޭ ކާރުޚާނާއަކީ އަހަރަކު 12 މިލިޔަން މެޓްރިކް ތަނުގެ ތެޔޮ އުފައްދާ ކާރުޚާނާއެކެވެ. އެއީ، ދުވާލެއްގެ މައްޗަށް ގާތްގަނޑަކަށް 240,000 ފީފާގެ ތެލެވެ. އެ ތަނުން ސާފުކޮށް އުފައްދާ ތަކެތީގެ ތެރޭގައި ނެފްތާ، ފިޔުލް އޮއިލް، ވެކިޔުމް ގޭސްއޮއިލް އަދި ސަލްފަރ އެކުލެވިގެންވާ ޑީސަލް ހިމެނެއެވެ. އެ ތަކެތި އެކްސްޕޯޓު ކުރަނީ ތުރުކީވިލާތާއި، ޗައިނާއާއި މެލޭޝިޔާގެ އިތުރުން ސިންގަޕޫރަށެވެ.