ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ގަތުލުއާންމު ހުއްޓައިލަން ދުނިޔޭގެ ކޯޓުން އަމުރު ކޮށްފި

ފަލަސްޠީނުގެ ޣައްޒާގެ މުސްލިމުންގެ ނަސްލު ނައްތައިލުމަށް ޒަޔަނިސްޓު އިސްރާއީލުގެ ޔަހޫދީ ފައުޖުން ހިންގަމުންދާ ގަތުލުއާންމު ހުއްޓައިލަން އ.ދގެ އެންމެ މަތީ ކޯޓު، އިންޓަރނޭޝަނަލް ކޯޓް އޮފް ޖަސްޓިސް (އައި.ސީ.ޖޭ)ން އިސްރާއީލުގެ މައްޗަށް އަމުރު ކޮށްފިއެވެ. ފަލަސްޠީނުގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގެ މައްސަލަ ދުނިޔޭގެ ކޯޓުގެ ގޮތުގައި ބެލެވޭ އައި.ސީ.ޖޭއަށް ހުށަހަޅާފައި ވަނީ ދެކުނު އެފްރިކާއިންނެވެ.

މި މައްސަލައިގައި ކޯޓުގެ ހުކުމް އިއްވާފައިވާއިރު، ދެކުނު އެފްރިކާއިން އެދިފައިވާ ގޮތަށް، ޔަހޫދީންގެ ލާއިންސާނީ ޢުދުވާނަށް ނިމުމެއް ގެނައުމަށް ކޯޓުން އަމުރު ކޮށްފައެއް ނުވެއެވެ. އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 26,000 ފަހަނަ އަޅާފައެވެ.

ދެކުނު އެފްރިކާއިން ޔަހޫދީންނާ ދެކޮޅަށް މައްސަލަ ހުށަހަޅާފައި ވަނީ، އެ މީހުންގެ ލާއިންސާނީ ޢުދުވާނަށް ނިމުމެއް ގެނައުމުގެ އަމުރަކަށް އެދިއެވެ. ފަލަސްޠީނުގެ މުސްލިމުން ޝަހީދު ކުރުން ހުއްޓުވައިދިނުމުގެ އަމުރަކަށް އެދިއެވެ. ފަލަސްޠީނުގެ ކުޑަކުދިން ޔަތީމު ކުރުން ހުއްޓުވުމުގެ އަމުރަކަށް އެދިއެވެ. އަދި އަންހެނުން ހުވަފަތް ކުރުން ހުއްޓުމަކަށް ގެނައުމުގެ އަމުރަކަށް އެދިއެވެ.

ކޯޓުގެ ހުކުމުގައި މި ފަދަ އަމުރެއް ކޮށްފައި ނުވި ނަމަވެސް، ފަލަސްޠީނުގެ މުސްލިމުންގެ ނަސްލު ނައްތައިލުމުގެ މަޤުޞަދުގައި ޔަހޫދީން ހިންގަމުން ދަނީ ގަތުލުއާންމެއް ކަމުގައި ކޯޓުން މި ވަނީ ކަނޑައަޅާފައެވެ. ކޯޓުގެ އަމުރުގައި ބުނެފައި ވަނީ، ފަލަސްޠީނުގެ އާންމުންގެ ފުރާނައަށް ނުރައްކާ މިންވަރު ކުޑަ ކުރަން ޔަހޫދީން މަސައްކަތް ކުރަން ޖެހޭނެ ކަމުގައެވެ. އަދި، ފަލަސްޠީނުގެ އާންމު ރައްޔިތުންނާ ދެކޮޅަށް ޔަހޫދީ ފައުޖުގެ ސިފައިން ގަތުލުއާންމު ހިންގުން ހުއްޓުވަން ޖެހޭނެ ކަމުގައެވެ.

މީގެ އިތުރުން، ފަލަސްޠީނުގެ މުސްލިމުންނާ ދެކޮޅަށް ގަތުލުއާންމުތައް ހިންގާފައިވާ ޔަހޫދީ ސިފައިންނާ ދެކޮޅަށް ފިޔަވަޅު އަޅައި، އަދަބު ދޭން ޖެހޭނެ ކަމަށް ކޯޓުގެ އަމުރުގައި ގޮވައިލާފައިވެއެވެ. އަދި، ޣައްޒާގެ މުސްލިމުންނަށް އިންސާނީ އެހީތެރިކަން ފޯރުކޮށްދޭން އިހުނަށްވުރެ ބޮޑަށް މަސައްކަތް ކުރުމަށް ވެސް ޔަހޫދީންގެ މައްޗަށް އަމުރު ކޮށްފައިވެއެވެ.

ޣައްޒާގައި ހިންގަމުންދާ ލާއިންސާނީ ޢުދުވާން ހުއްޓައިލަން ދުނިޔޭގެ ކޯޓުން އަމުރުކޮށްފައި ނެތް ނަމަވެސް، ގަތުލުއާންމުގެ މައްސަލަ ބަލަމުންދާނެ ކަމުގައި އެ ކޯޓުން ބުންޏެވެ. އަދި، ފަލަސްޠީނުގެ ރައްޔިތުންނަކީ 1984 ވަނަ އަހަރުގެ ގަތުލުއާންމާ ބެހޭ މުއާހަދާއިން ރައްކާތެރި ކޮށް، ހިމާޔަތް ދޭން ޖެހޭ ބަޔެއްގެ ގޮތުގައި ބަލާ ކަމުގައި ވެސް ކޯޓުން ބުންޏެވެ.

ދުނިޔޭގެ ކޯޓުގެ މި ހުކުމުން ދޭހަ ކޮށްދެނީ، ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ މުޅި ދުނިޔެ ވެސް ދެކޮޅު ކަމެވެ. ދުނިޔޭގެ ހުރިހާ ކަންކޮޅަކުން ދަނީ ޔަހޫދީންގެ ޢުދުވާން ކުށްވެރި ކުރަމުންނެވެ. ޢުދުވާން ހުއްޓައިލަން ގޮވައިލަމުންނެވެ. ނަމަވެސް، މި ގޮވައިލުންތަކަށް ޔަހޫދީން ދެމުން ދަނީ ބީރު ކަންފަތެކެވެ.

ފަލަސްޠީނުގެ މުސްލިމުންގެ ނަސްލު ނައްތައިލަން ޔަހޫދީން ލާއިންސާނީ ޢުދުވާން ހިންގަމުން ދަނީ އެމެރިކާގެ އެހީތެރިކަމާއި އެއްބާރުލުމާ އެކުގައެވެ. މި ޢުދުވާންތައް ހުއްޓުވަން މުޅި ދުނިޔެ ވެސް ވަނީ ނުކުޅެދިފައެވެ. އަދި، ގަތުލުއާންމުތައް ހުއްޓައިލަން ދުނިޔޭގެ ކޯޓުން ޔަހޫދީންގެ މައްޗަށް އަމުރު ކުރި ނަމަވެސް، އެ މީހުން މި އަމުރަށް ކިޔަމަންވާނެ ކަމަކަށް ނުބެލެވެއެވެ.