ފަލަސްޠީނުގެ ޣައްޒާގެ މުސްލިމުންގެ ނަސްލު ނައްތައިލަން ޔަހޫދީން ޤަތުލުޢާންމެއް ހިންގަމުންދާ ކަމަށް ކަނޑައަޅައި ޤަތުލުޢާންމު ހިންގުން ހުއްޓައިލުމަށް އދގެ އެންމެ މަތީ ކޯޓު ކަމުގައިވާ އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ)އިން ކޮށްފައިވާ ހުކުމާ ގުޅޭ ގޮތުން މަޝްވަރާ ކުރުމަށް އދގެ ސަލާމަތީ މަޖިލީހުގެ ކުއްލި ބައްދަލުވުމެއް ބާއްވަން ނިންމައިފިއެވެ. އެ ބައްދަލުވުން އޮންނާނީ އަންނަ ބުދަ ދުވަހުއެވެ.
އެ މަޖިލީހުގެ ރިޔާސަތުން ބުނީ، އަލްޖަޒާއިރުގެ ހުށަހެޅުމަކާ އެއް ގޮތަށް، އަންނަ ހަފުތާގައި އެ މަޖިލީހުގެ ކުއްލި ބައްދަލުވުމެއް ބާއްވަން ނިންމާފައިވާ ކަމުގައެވެ. އަލްޖަޒާއިރުގެ ޚާރިޖީ ވުޒާރާއިން ބުނީ ދުނިޔޭގެ ކޯޓުގެ ގޮތުގައި ބެލެވޭ އައިސީޖޭގެ ނިންމުމާ މެދު އދގެ ސަލާމަތީ މަޖިލީހުގައި މަޝްވަރާ ކުރުމުން އެ ޙުކުމަށް އިތުރު ބާރުވެރިކަމެއް ލިބޭނެ ކަމަށް ގަބޫލު ކުރާ ކަމުގައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ޤަތުލުޢާންމެއް ހިންގަމުންދާ ކަމުގައި ދުނިޔޭގެ ކޯޓުން ކަނޑައެޅި ނަމަވެސް ޔަހޫދީންގެ ލާއިންސާނީ ޢުދުވާން ހުއްޓައިލަން ޢަމުރު ކޮށްފައެއް ނުވެއެވެ. އެއީ ޣައްޒާގެ ރައްޔިތުންގެ އިތުރުން މުޅި މުސްލިމް ދުނިޔެއަށް މާޔޫސްކަން ގެނުވި ކަމެކެވެ. ޔަހޫދީން ދެކޭ ގޮތުގައި އެއީ ޢުދުވާން ހުއްޓައިނުލައި ކުރިއަށް ގެންދަން ލިބުނު ޙުއްދައެކެވެ.
ޣައްޒާގައި ހާލުގައި ޖައްސާފައިވާ 2.3 މިލިޔަން މީހުންނަށް އިންސާނީ އެހީގެ ސާމާނު ފޯރުކޮށްދިނުމަށް ވެސް ކޯޓުން ވަނީ ޔަހޫދީންގެ މައްޗަށް ޢަމުރު ކޮށްފައެވެ. އެ ކަމާ ގުޅޭ ގޮތުން ވާހަކަފުޅު ދައްކަަވަމުން ފަލަސްޠީނުން އދއަށް ކަނޑައަޅާފައި ހުންނަވާ ސަފީރު ރިޔާޟް މަންޞޫރު ވިދާޅުވީ ދުނިޔޭގެ ކޯޓުގެ ޙުކުމުން ހާމަވެގެން ދިޔައީ ޙުކުން ތަންފީޒު ކުރެވޭނީ ޔަހޫދީންގެ ޢުދުވާނަށް ނިމުމެއް ގެނެސްގެން ކަމުގައެވެ.
ޢަރަބި ގުރޫޕުގައި ހިމެނޭ މެންބަރު ޤައުމުތަކުގެ ތެރެއިން އދގެ ސަލާމަތީ މަޖިލީހުގައި ހިމެނޭ ހަމައެކަނި ޤައުމަކީ އަލްޖަޒާއިރެވެ. މަންޞޫރު ވިދާޅުވީ ޔަހޫދީންގެ ލާއިންސާނީ ޢުދުވާންތައް ނިމުމަކަށް ގެނައުމަށް ޢަރަބި ގުރޫޕުން އިސްނަގައިގެން އަލްޖަޒާއިރު މެދުވެރިކޮށް ސަލާމަތީ މަޖިލީހަށް ޤަރާރެއް ހުށަހަޅާނެ ކަމަށް ބެލެވޭ ކަމުގައެވެ.
ޣައްޒާގެ މުސްލިމުންނަށް ޖައްސާފައިވާ ނިކަމެތި ހާލަތާ ގުޅޭ ގޮތުން އދގެ ސަލާމަތީ މަޖިލީހުން މިހާތަނަށް ދެ ޤަރާރެއް ފާސްކޮށްފައިވެއެވެ. ޑިސެންބަރު މަހު އެ މަޖިލީހުން ވަނީ ޣައްޒާއަށް އިންސާނީ އެހީގެ ސާމާނު އެތެރެ ކުރުމަށް ޔަހޫދީންނަށް ބާރު އަޅާފައެވެ. ނަމަވެސް ޢުދުވާންތައް ހުއްޓައިލަން އެ މަޖިލީހުން ގޮވައިލާފައެއް ނުވެއެވެ. އެ ކަމަށް ހުރަސް އަޅަމުން ދަނީ ޔަހޫދީންގެ އެންމެ ގާތް އެކުވެރިޔާ އެމެރިކާއެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު 26,083އަށް އަރައެވެ. ޝަހީދު ކޮށްލާފައިވާ މީހުންގެ ތެރޭގައި 16,000އަށްވުރެ ގިނަ އަންހެނުންނާއި ކުޑަކުދިން ހިމެނެއެވެ. އަދި ޒަޚަމު ކޮށްލާފައިވާ މީހުންގެ ޢަދަދު ވަނީ 64,000އަށް އުފުލިފައެވެ.