ތުރުކީވިލާތުގެ އިސްތަންބޫލުގައި ހުންނަ ނަޞާރާދީނުގެ ފައްޅިއަކަށް ބަޑިން ދިން ޙަމަލާތަކެއްގައި އެކަކު މަރުވެއްޖެއެވެ. އެ ޤައުމުގެ ދާޚިލީ ވަޒީރު ޢަލީ ޔައަލިކަޔާ ވިދާޅުވީ ފައްޅިއަށް ޙަމަލާދީފައި ވަނީ މޫނު ނިވާ ކޮށްގެން ތިބި ދެ މީހުން ކަމުގައެވެ. އަދި ޙަމަލާ ދިނުމަށް ފަހު އެ ދެ މީހުން ފިލާފައިވާ ކަމަށާއި، އެ މީހުން ހޯދުމަށް ތުރުކީވިލާތުގެ ކަމާގުޅޭ އިދާރާތަކުން މަސައްކަތް ކުރަމުންދާ ކަމުގައި އޭނާ ވިދާޅުވިއެވެ.
އިސްތަންބޫލުގެ ގަވަރުނަރު ދަވުތު ގުލް ވިދާޅުވީ މި ހާދިސާގައި މަރުވެފައި ވަނީ ތުރުކީވިލާތުގެ ރައްޔިތެއް ކަމުގައެވެ. އަދި، މި ހާދިސާގައި އިތުރު މީހެއްގެ ފުރާނައަށް ނުރައްކާވެފައި ނުވާ ކަމުގައި ވެސް އޭނާ ވިދާޅުވިއެވެ. ފައްޅިއަށް ޙަމަލާ ދީފައި ވަނީ ނަޞާރާދީނުގެ އަޅުކަމެއް ކުރިއަށް ދިޔަ ވަގުތުގައެވެ.
ފައްޅިއަށް ޙަމަލާދީ މީހަކު މަރައިލުމުގެ ފަހަތުގައި އޮތް ސަބަބު އަދި ސާފު ނޫން ކަމުގައި، މި ޙަމަލާ ތަހުޤީޤު ކުރަމުންދާ ފަރާތްތަކުން ބުނެއެވެ. ތުރުކީވިލާތުގެ ސަރުކާރުން ވަނީ މި ޙަމަލާ ވަރަށް ބޮޑަށް ކުށްވެރި ކޮށްފައެވެ. އަދި، ރައީސް ރަޖަބް ޠައްޔިބް އުރްދުޣާން ވަނީ ފައްޅީގެ އިސް ފާދިރީއަށް ފޯނުން ގުޅުއްވައި، ތަޢުޒިޔާ ދަންނަވާފައެވެ.