ފަލަސްޠީނުގެ ޣައްޒާގައި ދިރިއުޅޭ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެނައުމަށް ކުރަމުންދާ މަޝްވަރާތަކުގެ އިތުރު ބައްދަލުވުންތަކެއް ބާއްވައިފިއެވެ. ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީންނާ ދެމެދު ކުރަމުންދާ ނުސީދާ މަޝްވަރާތަކުގައި މެދުވެރިންގެ ދަޢުރު އަދާ ކުރަނީ ޤަޠަރާއި މިޞްރާއި އެމެރިކާއިންނެވެ.
އެންމެ ފަހުގެ މަޝްވަރާ ބައްދަލުވުންތައް ބާއްވާފައި ވަނީ ވިލާތުގެ ޤައުމެއްގައެވެ. އެ ބައްދަލުވުންތަކުގައި އެމެރިކާގެ ޖާސޫސީ އިދާރާގެ ޑިރެކްޓަރ ވިލިޔަމް ބަރންސްއާއި ޔަހޫދީންގެ ޖާސޫސީ އިދާރާ މޮސާދުގެ އިސްވެރިޔާ ޑޭވިޑް ބަރނިޔާއާއި ޤަޠަރުގެ ބޮޑޫވަޒީރު އަދި ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލް-ޘާނީއާއި މިޞްރުގެ ޖާސޫސީ އިދާރާގެ އިސްވެރިޔާ އައްބާސް ކާމިލް ބައިވެރިވެވަޑައިގަތެވެ.
އެ މަޝްވަރާތަކުގައި ބިނާކުރަނިވި ކުރިއެރުންތަކެއް ހޯދިފައިވާ ކަމަށް ޔަހޫދީން ބުނެއެވެ. ނަމަވެސް ދެ ފަރާތުގެ މެދުގައި އަދިވެސް ދެބަސްވުންތައް ގިނައެވެ. މަޝްވަރާތަކުން ޔަހޫދީން ޙާޞިލުކުރަން ބޭނުންވާ ލަނޑުދަނޑިއަކީ ޙަމާސް ޖަމާޢަތުން ރަހީނު ކޮށްފައިވާ އަސީރުން މިނިވަން ކުރުވުމެވެ. އެމެރިކާއިން ވެސް އެންމެ އިސްކަމެއް ދެމުން ދަނީ އަސީރުން މިނިވަން ކުރުމަށެވެ. ޔަހޫދީންގެ 130އަށްވުރެ ގިނަ އަސީރުން އަދިވެސް ތިބީ ޙަމާސް ޖަމާޢަތުގެ ބެލުމުގެ ދަށުގައެވެ.
އަސީރުން މިނިވަން ކުރުމަށް ޔަހޫދީންނާއި އެމެރިކާއިން ބާރުއެޅި ނަމަވެސް ޙަމާސުން ބޭނުން ވަނީ ޣައްޒާގެ ޢާންމު ރައްޔިތުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނަށް ނިމުމެއް ގެނައުމަށެވެ. ޢުދުވާން އެއްކޮށް ހުއްޓައިލަން ޔަހޫދީން ދަނީ ދެކޮޅު ހަދަމުންނެވެ. އޮކްޓޫބަރު 7 ވަނަ ދުވަހު ފެށި ޢުދުވާނުގައި މިހާތަނަށް ޝަހީދު ކޮށްލާފައިވާ މީހުންގެ ޢަދަދު ވަނީ 26,442އަށް އުފުލިފައެވެ.
އޭގެ އިތުރުން ހަރުކަށި ޔަހޫދީ ޖަމާޢަތްތަކުން އަތްގަދަ ކޮށްފައިވާ ފަލަސްޠީނުގެ ބިންތަކުގައި އިތުރު ޔަހޫދީން ވަޒަންވެރި ކުރުވަން މަސައްކަތް ކުރަމުންނެވެ. އެ ކަމާ ގުޅޭ ގޮތުން ޔަހޫދީންގެ މަދަނީ ޖަމުޢިއްޔާއަކުން އިސްނަގައިގެން ދާދި ފަހުން ބޭއްވި ބޮޑު މަހާސިންތާއެއްގައި ޔަހޫދީންގެ ޖައްބާރު ބޮޑުވަޒީރު ބުންޔާމިން ނަތަންޔާހޫގެ ލިކޫދް ޕާޓީގެ 12 ވަޒީރުން ބައިވެރިވިއެވެ. ނަމަވެސް އެއީ ސަރުކާރުން އިސްނަގައިގެން ބާއްވާފައިވާ މަހާސިންތާއެއް ނޫން ކަމުގައި ޔަހޫދީ ސަރުކާރުން ބުނެއެވެ.
ޔަހޫދީން އަތްގަދަ ކޮށްފައިވާ ފަލަސްޠީނުގެ ބިންތަކުގައި ޔަހޫދީން އާބާދުކޮށް ވަޒަންވެރި ކުރުވުމަކީ ބައިނަލްއަޤުވާމީ ޤާނޫނުތަކާ ޚިލާފު ޢަމަލެކެވެ. އަދި އިންސާނީ ޙައްޤުތަކަށް ވަކާލާތުކުރާ ޖަމާޢަތްތަކުން ދެކޮޅު ހަދަމުންދާ ކަމެކެވެ. ނަމަވެސް އެ މަހާސިންތާގެ ބައިވެރިން ވަނީ ފަލަސްޠީނުގެ ޣައްޒާއާއި ހުޅަނގު އައްސޭރީގައި ޔަހޫދީން އާބާދުކޮށް ވަޒަންވެރި ކުރުވަން ސަރުކާރަށް ގޮވައިލާފައެވެ.
38 އަހަރުވީ އަޅުވެތިކަމަށް ފަހު ޔަހޫދީންގެ ޢާންމުންނާއި އަސްކަރިއްޔާ 2005 ވަނަ އަހަރު ޣައްޒާއިން ފޭބި ނަމަވެސް އެ ސަހަރު އަދިވެސް އޮތީ ޔަހޫދީންގެ އަޅުވެތިކަމުގެ ދަށުގައެވެ. ނަމަވެސް ޣައްޒާގައި ދިރިއުޅޭ 2.3 މިލިޔަން މީހުންނާ ދެކޮޅަށް ޔަހޫދީން މިހާރު ހިންގަމުންދާ ލާއިންސާނީ ޢުދުވާންތަކުގެ ސަބަބުން ޣައްޒާގެ ކުރިމަގު ބައްޓަންވެގެންދާނެ ގޮތެއް އޮތީ ސުވާލުމާކެއްގެ ތެރޭގައެވެ. ބައިނަލްއަޤުވާމީ މުޖުތަމަޢުން ދަނީ ޣައްޒާއަށް އަތްގަދަ ކުރުމާ ދެކޮޅަށް އަޑު އުފުލަމުންނެވެ.