ފަލަސްޠީނުގެ ޣައްޒާގައި ހާލުގައި ޖެހިފައިވާ 2.3 މިލިޔަން މީހުންނަށް އިންސާނީ އެހީގެ ސާމާނު ފޯރުކޮށްދޭން ކުރަމުންދާ މަސައްކަތްތަކަށް ޔަހޫދީންގެ ޢާންމުން ހުރަސްއަޅަން ފަށައިފިއެވެ.
ޔަހޫދީން އިސްތިޢުމާރުކޮށްފައިވާ ޣައްޒާ ގުޅޭ ސަރަޙައްދީ ރޮނގުގައި އޮންނަ ކާރިމް އަބޫ ސާލިމް ހުރަސް ކައިރިއަށް ޔަހޫދީންގެ ޢާންމުންގެ ގިނަ ޢަދަދެއްގެ ބަޔަކު ވަނީ އެއްވެ މުޒާހަރާ ކުރަން ފަށާފައެވެ. އިންސާނީ އެހީގެ ސާމާނު ބަރުކޮށްގެން ޣައްޒާއަށް ވަންނަން މަސައްކަތް ކުރާ އުޅަނދުފަހަރަށް އެ މީހުން ދަނީ ހުރަސް އަޅަމުންނެވެ. އެހެންކަމުން ކާރިމް އަބޫ ސާލިމް ހުރަސް ތެރެއިން ޣައްޒާއަށް އިންސާނީ އެހީގެ ސާމާނު ވެއްދުމަށް ވަނީ ދަތިވެފައެވެ. ޔަހޫދީންގެ ޢާންމުން ދަނީ ސަރަޙައްދީ ރޮނގު ހުރަސް ކުރަން މަސައްކަތް ކުރާ އުޅަނދުފަހަރު އަނބުރައިލުމަށް މަޖުބޫރު ކުރުވަމުންނެވެ. އަދި ޔަހޫދީންގެ ސަލާމަތީ ބާރުތަކުން ދަނީ އެ ކަމަށް ހިތްވަރު ދެމުންނެވެ. އެ ކަން ހުއްޓުވަން ވެސް ޔަހޫދީ ފުލުުހުންނާއި ސިފައިން މަސައްކަތް ކޮށްފައެއް ނުވެއެވެ.
ޣައްޒާއަށް ވަދެނުކުންނަން އޮތް ހުރިހާ މަގެއް ޔަހޫދީން އޮތީ ބަންދު ކޮށްފައެވެ. ޣައްޒާއަށް އިންސާނީ އެހީގެ ސާމާނު އެތެރެ ކުރުމުގެ ހުއްދަ އޮތީ ހަމައެކަނި ކާރިމް އަބޫ ސާލިމްގެ އިތުރުން ޣައްޒާއާއި މިޞްރު ގުޅޭ ރަފަޙް ހުރަހުންނެވެ. މީގެ ތެރެއިން ކާރިމް އަބޫ ސާލިމް ހުރަހުން ދަތުރު ކުރާ އުޅަނދުފަހަރަށް ޔަހޫދީން ހުރަސްއަޅަން ފެށުމުން ޣައްޒާއަށް އެތެރެކުރާ އިންސާނީ އެހީގެ ޢަދަދު ވަނީ މަދުވެފައެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުން ރަހީނު ކޮށްފައިވާ ހުރިހާ އަސީރުން މިނިވަން ނުކުރަނީސް، ކާރިމް އަބޫ ސާލިމް ހުރަހުން އިންސާނީ އެތެރެ ކުރަން ފުރުޞަތު ނުދޭނެ ކަމަށް ޔަހޫދީންގެ ޢާންމުން ބުނެއެވެ. ނަމަވެސް، އެ މީހުން ޣައްޒާއަށް އެހީގެ ސާމާނު ވައްދަން ހުރަސް އަޅާފައި ވަނީ ޣައްޒާއަށް އެހީގެ ސާމާނު އެތެރެ ކުރުން ނުހުއްޓުވުމަށް އދގެ އެންމެ މަތީ ކޯޓު ކަމުގައިވާ އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ)ން ޔަހޫދީންގެ މައްޗަށް ޢަމުރު ކޮށްފައިވާ ދަނޑިވަޅެއްގައެވެ.
ޣައްޒާއަށް ދުވާލެއްގެ މައްޗަށް އެތެރެ ކުރަނީ 260 ވަރަކަށް ލޮރީގެ ސާމާނެވެ. އެއީ އެ ސަހަރުގައި ހާލުގައި ޖެހިފައިވާ 2.3 މިލިޔަން މީހުންނަށް ބޭނުންވާ މިންވަރަށްވުރެ ވަރަށް ކުޑަ މިންވަރެއް ކަމުގައި އދން ވަނީ ބުނެފައެވެ. ނަމަވެސް އެ ޢަދަދު އިތުރު ކޮށްދޭން ޔަހޫދީން ދަނީ ހުރަސް އަޅަމުންނެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 26,422 އަށް އުފުލިފައެވެ. އޭގެ ތެރޭގައި 16,000 އަށްވުރެ ގިނަ އަންހެނުންނާއި ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 64,000 އަށް އަރައެވެ.