ސޫރިޔާގައި ހަރަކާތްތެރިވާ އީރާނުގެ ބާރުގަދަ އިސްލާމީ އިންޤިލާބީ ލަޝްކަރު (އައި.އާރް.ޖީ.ސީ)ގެ އިސް ކޮމާންޑަރުން އަނބުރާ ޤައުމަށް ގެންދަން ފަށާފައިވާ ކަން ހާމަވެއްޖެއެވެ. އެ ލަޝްކަރުގެ ސިފައިން ސޫރިޔާއަށް ފޮނުވާފައި ވަނީ, އެ ޤައުމުގެ ރައީސް ބައްޝާރް ހާފިޛް އަލް-އަސަދުގެ ސަރުކާރާއި އަސްކަރިއްޔާއަށް ފަންނީ އެހީތެރިކަން ފޯރުކޮށްދިނުމަށެވެ. ސޫރިޔާއިން އީރާނުގެ އަސްކަރިއްޔާގެ އިސް ކޮމާންޑަރުން ބާލަން ނިންމާފައި މި ވަނީ, އެ ސިފައިންނާ ދެކޮޅަށް ޔަހޫދީ ފައުޖުން ދެމުންދާ ޙަމަލާތަކާ ގުޅިގެންނެވެ.
2023 ވަނަ އަހަރުގެ ޑިސެންބަރު މަހުން ފެށިގެން ޔަހޫދީ ފައުޖުން ސޫރިޔާއަށް ދީފައިވާ އެކި ޙަމަލާތަކުގައި އީރާނުގެ އަސްކަރިއްޔާގެ އިސް އޮފިސަރުންގެ ތެރެއިން ހައެއްކަ މީހުން ޝަހީދު ކޮށްލާފައިވެއެވެ. އޭގެ ތެރޭގައި, އީރާނުގެ ޖާސޫސީ އިދާރާގެ އިސް ޖެނެރަލެއް ވެސް ހިމެނެެއެވެ. ފާއިތުވި ދެ މަހެއްހާ ދުވަހަކީ, ސޫރިޔާގައި ހަރަކާތްތެރިވާ އިރާޤުގެ އަސްކަރީ ކޮމާންޑަރުންނަށް އެންމެ ނުރައްކާތެރި މުއްދަތު ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
ސޫރިޔާގައި ތިބި އީރާނުގެ ކޮމާންޑަރުންނާ ދެކޮޅަށް ޔަހޫދީ ފައުޖުން ދެމުންދާ ޙަމަލާތަކުގެ ބަދަލު ހިފަން ގޮވައިލާ އަޑުތައް އީރާނުގައި ވަނީ ގަދަވެފައެވެ. ނަމަވެސް, ޔަހޫދީ ފައުޖުން ޣައްޒާގައި ފަށާފައިވާ ލާއިންސާނީ ޢުދުވާނާ އެކު, މެދުއިރުމަތީގެ މަސްރަޙު ހޫނުވެފައިވާ މި ދަނޑިވަޅުގައި, މި މައްސަލައިގެ ތެރެއަށް ފާޅުގައި ވަންނަން އީރާނުގެ ސަރުކާރާއި އަސްކަރިއްޔާއިން ބޭނުން ނުވާ ކަމަށް ބެލެވެއެވެ.
ޣައްޒާގެ ޢުދުވާނާ ގުޅިގެން އުފެދިފައިވާ މައްސަލަގަނޑުގެ ތެރެއަށް ވަންނަން އީރާނުން ބޭނުން ނުވި ނަމަވެސް, އެ ޤައުމުން ދަނީ ޣައްޒާގެ ދިފާޢުގައި ޖިހާދު ކުރަމުންދާ މުޖާހިދުންގެ ޖަމާޢަތް, ޙަމާސަށް އެއްބާރުލުމާއި އެހީތެރިކަން ފޯރުކޮށްދެމުންނެވެ. އަދި, ޣައްޒާގެ މުސްލިމުންގެ ދިފާޢުގައި ހަތިޔާރު ނަގާފައިވާ ލުބްނާނުގެ ހަތިޔާރު އެޅި ޖަމާޢަތް, ޙިޒްބުاللهއާއި, ޔަމަނުގައި ހަރަކާތްތެރިވާ ހަތިޔާރު އެޅި ޖަމާޢަތް, ޙޫޘީންނަށް ވެސް އީރާނުން ދަނީ ވާގިވެރިވަމުންނެވެ. އެއީ, ޔަހޫދީންނާއި އެމެރިކާއާ ދެކޮޅަށް ހަތިޔާރު ނަގާފައިވާ 'އެކްސިސް އޮފް ރެސިސްޓެންސް'ގައި ހިމެނޭ ޖަމާޢަތްތަކެވެ.
ސޫރިޔާގައި ތިބި އީރާނުގެ އަސްކަރީ ކޮމާންޑަރުން އެ ޤައުމުން ބާލަން ނިންމާފައިވީ ނަމަވެސް, ސޫރިޔާގެ ސަރުކާރަށް އީރާނުން އެހީތެރިކަން ފޯރުކޮށްދިނުމުގައި ދެމި އޮންނާނެއެވެ. އެއް ސަބަބަކީ, ސޫރިޔާގެ ރައީސް އަސަދަކީ, އެ ސަރަޙައްދުގ ޤައުމުތަކުގެ ތެރެއިން އިސްވެރިންގެ ތެރެއިން އީރާނުގެ އެންމެ ގާތް އެއް އެކުވެރިޔާއެވެ.
ސޫރިޔާގައި ތިބި އީރާނުގެ ސިފައިންގެ ތެރެއިން އިސް ކޮމާންޑަރުން އެ ޤައުމުން ބާލާފައިވީ ނަމަވެސް, އިރާނުގެ އިންޤިލާބީ ލަޝްކަރުގެ ބައެއް ސިފައިން އަދިވެސް ސޫރިޔާގައި ހަރަކާތްތެރިވާނެއެވެ. އަދި, އަސަދުގެ ސަރުކާރަށް ބޭނުންވާ ފަންނީ އެހީތެރިކަން ފޯރުކޮށްދޭނެއެވެ. ސޫރިޔާއިން ފައިބާފައި ވަނީ ކިހާ ޢަދަދެއްގެ ސިފައިން ކަން ސާފެއް ނޫނެވެ. އަދި, ސޫރިޔާގައި ތިބި ކޮމާންޑަރުން އެ ޤައުމުން ފައިބާފައިވާ ކަން އީރާނުން ރަސްމީ ސިފައެއްގައި ކަށަވަރު ކޮށްދީފައި ނުވާ ކަން ވެސް ފާހަގަކޮށްލަން ޖެހެއެވެ.