މެލޭޝިޔާގެ ކުރީގެ ބޮޑުވަޒީރު ނަޖީބް ރަޒާކްގެ މައްޗަށް އިއްވާފައިވާ ޖަލު ހުކުމުގެ މުއްދަތުން ބައެއް މަޢާފުކޮށްދީފައެވެ. ދަޢުލަތުގެ ފައިސާއަށް ޚިޔާނާތްތެރިވުމާއި މަނީ ލޯންޑްރިންގ ކުށް ސާބިތުވެ ނަޖީބް މިހާރު ގެންދަވަނީ 12 އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ. ނަމަވެސް, އޭނާއަށް އިއްވާފައިވާ ޖަލު ހުކުމުގެ މުއްދަތު ހަ އަހަރަށް ކުޑަ ކުރަން މެލޭޝިޔާގެ ކުށްތަކަށް މަޢާފު ދިނުމާ ބެހޭ ބޯޑު, ޕާޑަންސް ބޯޑުން ވަނީ ނިންމާފައެވެ.
ނަޖީބްގެ މައްސަލަ ބެލުމަށް ބޭއްވި ބޯޑުގެ ބައްދަލުވުމުގެ ރިޔާސަތު ބަލަހައްޓަވާފައި ވަނީ މެލޭޝިޔާގެ ކުރީގެ ރަސްގެފާނު ސުލްޠާން ޢަބްދުالله އަޙްމަދު ޝާހެވެ. ނަޖީބްގެ ޖަލު ހުކުމް ކުޑަކުރަން ބޯޑުން ނިންމާފައިވާ ސަބަބު ހާމަކޮށްފައެއް ނުވެއެވެ. ނަމަވެސް, އޭނާގެ މައްޗަށް އިއްވާފައިވާ ޖޫރިމަނާގެ ބޮޑު ބައެއް ވެސް މިހާރު ވަނީ މަޢާފުކޮށްދީފައެވެ. ޖޫރިމަނާގެ ތެރެއިން ނަޖީބް މިހާރު ދައްކަވަން ޖެހިވަޑައިގަންނަވާނީ 10.59 މިލިޔަން އެމެރިކާ ޑޮލަރެވެ. ނަޖީބްގެ މައްޗަށް އިއްވާފައިވާ ޖަލު ހުކުމް ތަންފީޒު ކުރަން ފަށާފައި ވަނީ 2022 ވަނަ އަހަރުގެ އޮގަސްޓު މަހުއެވެ.
ނަޖީބްގެ މައްޗަށް އިއްވާފައިވާ ޖަލު ހުކުމުގެ މުއްދަތުން ބައެއް މަޢާފު ކުރުމަށް ނިންމުމާ ގުޅިގެން, ޚިޔާނާތާ ދެކޮޅަށް ބޮޑުވަޒީރު އަންވަރު އިބްރާހީމްގެ ސަރުކާރުން ތަންފީޒު ކުރަމުންދާ ސިޔާސަތުތަކާ މެދު ވަނީ ސުވާލު އުފެދިފައެވެ. އަންވަރު ވެރިކަމަށް ވަޑައިގެންނެވީ ޚިޔާނާތާ ދެކޮޅަށް މަސައްކަތް ކުރެއްވުމުގެ ވަޢުދާ އެކުގައެވެ. ނަމަވެސް, 2022 ވަނަ އަހަރުގެ ނޮވެންބަރު މަހު އޭނާގެ ސަރުކާރު އެކުލަވައިލައްވާފައި ވަނީ, ޚިޔާނާތުގެ ކުށް ސާބިތުވެފައިވާ ނަޖީބްގެ ޔުނައިޓެޑް ނޭޝަނަލް މެލޭސް އޮގަނައިޒޭޝަން (ޔޫ.އެން.އެމް.އޯ)ގެ ބައިވެރިވުމާ އެކުގައެވެ.
މިއާއެކު, ޚިޔާނާތާ ދެކޮޅަށް އަންވަރުގެ ސަރުކާރުން ފަށާފައިވާ މަސައްކަތްތައް ތަންފީޒު ކުރާނެ ކަމާ މެދު ސުވާލު އުފެދިފައި ވަނިކޮށް, އޭނާގެ ސަރުކާރުން ވަނީ ނަޖީބާއި ޔޫ.އެން.އެމް.އޯގެ އެހެން އިސްވެރިންނާ ދެކޮޅަށް އުފުލާފައިވާ ޚިޔާނާ ގުޅޭ އެހެން ދަޢުވާތަކެއް އަނބުރާ ގެންގޮސްފައެވެ.
ނަޖީބާ ދެކޮޅަށް 12 އަހަރު ދުވަހުގެ ޖަލު ހުކުމެއް އިއްވާފައި ވަނީ މެލޭޝިޔާގެ ދައުލަތުގެ ފަންޑެއް ކަމުގައިވާ ވަން-މެލޭޝިޔާ ޑިވެލޮޕްމަންޓް ބަރްހާދްގެ ފައިސާގެ ތެރެއިން 4.5 ބިލިޔަން އެމެރިކާ ޑޮލަރަށް ޚިޔާނާތްތެރިވުމާއި މަނީ ލޯންޑްރިންގގެ ދަޢުވާގައެވެ. އެ ފައިސާގެ ތެރެއިން 1 ބިލިޔަން ޑޮލަރު އޭނާގެ އަމިއްލަ އެކައުންޓަށް ވެސް ޖަމާކޮށްފައިވެއެވެ.
އެ ފަންޑަކީ ނަޖީބުގެ ސަރުކާރުން 2009 ވަނަ އަހަރު އުފައްދާފައިވާ ފަންޑެކެވެ. ވެރިކަމުގައި ހުންނެވި އިރު ނަޖީބު ވަނީ، ކޮރަޕްޝަންގެ ތުހުމަތުތައް ތަހުޤީޤު ކުރުމަށް ހުރަސް އަޅުއްވާފައެވެ. އެއީ، މެލޭޝިޔާގެ ބޮޑުވަޒީރު ކަމުގެ މަޤާމު އޭނާ ފުރުއްވި ފުރަތަމަ އަހަރެވެ. ވަން-އެމް.ޑީ.ބީން ގެއްލިފައިވާ ފައިސާއަކީ ސަޢޫދީ ޢަރަބިއްޔާގެ ޝާހީ ޢާއިލާއިން ހަދިޔާކޮށްފައިވާ ފައިސާއެއް ކަމަށް ބެލެވެއެވެ.
ދަޢުލަތުގެ ފައިސާއަށް ޚިޔާނާތްތެރިވެފައިވާ ކަމުގެ ތުހުމަތުތަކަށް ނަޖީބް އިންކާރުކުރައްވައެވެ. އަދި, ވަން-އެމް.ޑީ.ބީގެ ފައިސާއަށް ޚިޔާނާތްތެރިވެފައި ވަނީ އެ ކުންފުނީގެ އިސް މުވައްޒަފުންތަކެއް ކަމަށް އޭނާ ތުހުމަތު ކުރައްވައެވެ. އަދި, މެލޭޝިޔާގެ އެންމެ މަތީ ކޯޓުގައި ކުރިއަށް ދިޔަ އިސްތިޢުނާފުގެ މަރުޙަލާ ނާކާމިޔާބުވުމާ ގުޅިގެން ނަޖީބް ވަނީ ޖަލު ހުކުމް މަޢާފުކޮށްދިނުމަށް އެދި މެލޭޝިޔާގެ ރަސްގެފާނަށް ހުށަހަޅުއްވާފައެވެ.