ދެކުނު އެމެރިކާގެ ޤައުމެއް ކަމުގައިވާ ޗިލީގެ މެދުތެރޭ ސަރަޙައްދުގެ ޖަންގަލިތަކުގައި ރޯވެފައިވާ އަލިފާންގަނޑުތައް މީހުން ދިރިއުޅޭ ސަރަޙައްދަށް ފެތުރި 51 މީހުން މަރުވެެއްޖެއެވެ. ޢާންމުން ދިރިއުޅޭ ސަރަޙައްދުތަކަށް ފެތުރެމުންދާ އަލިފާންގަނޑުތައް ކޮންޓްރޯލްކޮށް، ނިއްވައިލަން އެ ޤައުމުގެ އިދާރާތަކުން ގުޅިގެން ދަނީ މަސައްކަތް ކުރަމުންނެވެ. ޢާންމުންގެ ގެދޮރުގައި ރޯވެ, ފުރާނައަށް ނުރައްކާވާން ފެށުމުން ޗިލީގައި މިހާރު ވަނީ ކުއްލި ހާލަތު އިޢުލާނު ކޮށްފައެވެ.
މި މަސައްކަތުގައި ހަރަކާތްތެރިވާ އޮފިޝަލުން ވިދާޅުވީ، ރޯވެފައިވާ ސަރަޙައްދުތަކުން މަރުވެފައިވާ އިތުރު މީހުންގެ ހަށިތައް ފެންނަމުންދާ ކަމުގައެވެ. އަދި, އަލިފާނުގެ ސަބަބުން މަރުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ. އަލިފާންގަނޑުތަކުގެ އަސަރު އެންމެ ބޮޑަށް ކުރަމުން ދަނީ ވަލްޕަރައީސޯ ސަރަޙައްދަށެވެ. އެއީ, ގާތްގަނޑަކަށް އެއް މިލިޔަން މީހުންގެ އާބާދީއެއް ދިރިއުޅޭ ސަރަޙައްދެކެވެ.
އަލިފާންގަނޑުތަކުގެ ސަބަބުން އެންމެ ބޮޑަށް ގެއްލުންވެފައި ވަނީ ވަލްޕަރައީސޯގައި ފަތުރުވެރިންގެ މެދުގައި މަޤުބޫލު ރަށެއް ކަމުގައިވާ ވިންޏާ ދެލް މާރަށެވެ. އެ ރަށުގައި ގިނަ ޢަދަދެއްގެ ބަޔަކު ތާށިވެފައިވާ ކަމަށް ބެލެވޭއިރު, އެ މީހުން ސަލާމަތް ކުރުމަށް އޮފިޝަލުން ދަނީ މަސައްކަތް ކުރަމުންނެވެ. އެ ސަރަޙައްދުގައި ރޯވެފައިވާ އަލިފާންގަނޑުތައް ނިއްވައިލުމަށް ހެލިކޮޕްޓަރުތައް ބޭނުން ކުރަން ފަށާފައިވާ ކަމުގައި ޗިލީގެ އޮފިޝަލުން ވިދާޅުވެއެވެ.
ޗިލީގެ ދާޚިލީ ވަޒީރު ކެރޮލީނާ ތޯހާ ވިދާޅުވީ ފިހިގެން މަރުވެފައިވާ އިތުރު ފަސް މީހެއްގެ ހަށިގަނޑު, މަގެއްގެ މަތިން ފެނިފައިވާ ކަމުގައެވެ. އަދި, ކުރިއަށް އޮތް ދުވަސްތަކުގެ ތެރޭގައި މަރުވެފައިވާ އިތުރު ބަޔެއްގެ ހަށިތައް ފެންނާނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ. މިއީ 2010 ވަނަ އަހަރުގެ ނުރައްކާތެރި ބިންހެލުމަށް ފަހު, އެ ޤައުމަށް ކުރިމަތިވެފައިވާ އެންމެ ނުރައްކާތެރި ކާރިސާގެ ގޮތުގައި އޭނާ ސިފަ ކުރެއްވިއެވެ. ބިންހެލުމުގައި 500 މީހުން މަރުވެފައިވާ ކަން ފާހަގަ ކޮށްލަން ޖެހެއެވެ.
ހޫނު މޫސުމުގައި ޖަންގަލިތަކުގައި އަލިފާން ރޯވުމަކީ ޗިލީއަށް އައު ކަމެއް ނޫނެވެ. ހުސްވި އަހަރުގެ ހޫނު މޫސުމުގައި އެ ޤައުމުގެ ފިނިހޫނުމިން ވަނީ ރެކޯޑު މިންވަރަކަށް އުފުލި, ހޫނުގެ ތޫފާނެއް ކުރިމަތިވިއެވެ. އެ އަހަރު ހިިނގި އަލިފާނުގެ ހާދިސާތަކާއި, ގަދަ ހޫނާ ގުޅިގެން 27 މީހުން މަރުވިއެވެ. އަދި, ޖަންގަލިތަކުގައި ރޯވެ, 400,000 ހެކްޓަރުގެ ބިން އެނދިއެވެ.
ހުސްވި އަހަރާ އަޅައިބަލާއިރު, މި އަހަރު ރޯވެފައި ވަނީ ޖަންގަލިތަކުގެ ނިސްބަތުން ކުޑަ ސަރަޙައްދެއްގައި ކަމަށް ތޯހާ ވިދާޅުވިއެވެ. ނަމަވެސް, 43,000 ހެކްޓަރުގެ ސަރަޙައްދަކަށް އަލިފާންގަނޑު ފެތުރި, އަނދާފައިވާ ކަމުގައި އޭނާ ވިދާޅުވިއެވެ. ތޯހާ ވިދާޅުވީ, އެންމެ ބޮޑު ކަންބޮޑުވުމަކީ, އާންމުން ދިރިއުޅޭ ސަރަޙައްދުތަކަށް އަލިފާންގަނޑުތައް ފެތުރުން ކަމުގައެވެ.