ރަޝިޔާއިން އަތްގަދަ ކޮށްފައިވާ ޔޫކްރެއިންގެ ސަރަޙައްދަކަށް ވަރުގަދަ ޙަމަލާތަކެއްދީ, ޢާންމުންގެ 28 މީހުން މަރައިލައިފިއެވެ. ރަޝިޔާގެ އޮފިޝަލުން ބުނީ, ޔޫކްރެއިންގެ ފައުޖުތަކުން ޙަމަލާދީފައި ވަނީ އެ ޤައުމުގެ އިރުމަތީގައި އޮންނަ ލުހާންސްކް ސަރަޙައްދުގެ ރަށެއް ކަމުގައިވާ ލިސިޗަންސްކްގެ ބޭކަރީއަކާއި ރެސްޓޯރެންޓަކަށް ކަމުގައެވެ. މި ޙަމަލާގައި ނުވަ އަންހެނުންނާއި ކުޑަކުއްޖަކު މަރުވި ކަމުގައި ވެސް, އެ ސަރަޙައްދުގައި ވެރިކަން ކުރާ ރަޝިޔާގެ އިދާރާގެ އޮފިޝަލުން ބުންޏެވެ.
ލުހާންސްކްގައި ހުންނަ ރަޝިޔާގެ އިދާރީ އިސް އޮފިޝަލް, ލިއަނިދް ޕާސިޗްނިކް ވިދާޅުވީ, ޔޫކްރެއިނުން ލިސިޗަންސްކަށް ޙަމަލާދޭން ބޭނުން ކޮށްފައި ވަނީ އެމެރިކާއިން ފޯރުކޮށްދީފައިވާ 'ހައި މޮބިލިޓީ އާޓިލަރީ ރޮކެޓް ސިސްޓަމް' ނުވަތަ ހައިމާސް މަރުކާގެ މިސައިލެއް ކަމުގައެވެ. އަދި, މި ޙަމަލާގައި ބޭކަރީއާއި ރެސްޓޯރެންޓް ހުންނަ ޢިމާރާތް ސުންނާފަތިވެފައިވާ ކަމަށާއި, ޢިމާރާތުގެ ދަށުގައި އިތުރު މީހުންގެ ހަށިތައް ވޭތޯ ބެލުމަށް މަސައްކަތް ކުރަމުންދާ ކަމުގައެވެ.
އެ ޢިމާރާތަށް ޙަމަލާ ދީފައި ވަނީ, ޢާންމުންގެ ގިނަ ޢަދަދެއްގެ ބަޔަކު ޖަމާވެފައިވާ ވަގުތެއްގައި ކަމަށް ވެސް ޕާސިޗްނިކް ވިދާޅުވިއެވެ. ރަޝިޔާގެ ކުއްލި ހާލަތްތަކާ ބެހޭ ވުޒާރާއިން ބުނީ, ސުންނާފަތިވެފައިވާ ޢިމާރާތުގެ ދަށުން 10 މީހުން ސަލާމަތް ކޮށްފައިވާ ކަމުގައެވެ. އޭގެ ތެރެއިން ހަތަރު މީހެއްގެ ހާލު ސީރިޔަސް ކަމުގައި ވެސް އެ ވުޒާރާއިން ބުންޏެވެ.
ލިސިޗަންސްކަށް ޙަމަލާދީފައި ވަނީ ޔޫކްރެއިނުން ކަމަށް ރަޝިޔާއިން ތުހުމަތު ކުރި ނަމަވެސް, ޔޫކްރެއިނުން މި ޙަމަލާގެ ޒިންމާ އުފުލާފައެއް ނުވެއެވެ. އަދި, އެ ތަނަށް ޙަމަލާދޭން ބޭނުން ކޮށްފައި ވަނީ ކޮން ބާވަތެއްގެ ހަތިޔާރެއް ކަން ސާފު ނޫން ކަމުގައި މަސްރަޙު ދިރާސާ ކުރާ ފަރާތްތަކުން ވެސް ބުނެއެވެ.
ރަޝިޔާގެ ޚާރިޖީ ވުޒާރާއިން ވަނީ ލިސިޗަންސްކަށް ދީފައިވާ ޙަމަލާ ކުށްވެރި ކޮށްފައެވެ. އެ ވުޒާރާގެ ތަރުޖަމާނު މަރިޔާ ޒަޚަރްވާ ވިދާޅުވީ, ހުޅަނގުން ޔޫކްރެއިނަށް ފޯރުކޮށްދޭ މާލީ އެހީތެރިކަމުގެ ބޭނުންކޮށް ޢާންމު ރައްޔިތުން މަރަމުންދާއިރު ހުޅަނގުން އެ ކަމާ މެދު ވިސްނަން ޖެހޭ ކަމުގައެވެ. އެ ޙަމަލާގައި ޔޫކްރެއިނުން ބޭނުން ކޮށްފައި ވަނީ ހުޅަނގުން ފޯރުކޮށްދީފައިވާ ހަތިޔާރު ކަމަށް ވެސް އޭނާ ތުހުމަތު ކުރެއްވިއެވެ.
"އީ.ޔޫގެ ޤައުމުތަކުގެ ރައްޔިތުން ދައްކާ ޓެކްސް ފައިސާ ޚަރަދު ކުރާ ގޮތެއް އެ މީހުންނަށް އިނގެން ޖެހޭ. އެ ފައިސާ ޚަރަދު ކުރަނީ ނުރައްކާތެރި ހަތިޔާރު ގަނެ, ޔޫކްރެއިނަށް ފޮނުވަން. އަދި, ކީވްގެ ސަރުކާރުން ދަނީ އެ ހަތިޔާރުތައް ބޭނުން ކޮށްގެން ޢާންމު ރައްޔިތުން ގަތުލު ކުރަމުން،" ޒަޚަރްވާ ވިދާޅުވިއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ޔޫކްރެއިނަށް އަރައި ރަޝިޔާގެ ފައުޖުން ފެށި ހަނގުރާމައިގައި, ޔޫކްރެއިންގެ ބިމުގެ 18 އިންސައްތައަށް ވަނީ އަތްގަދަ ކޮށްފައެވެ. މިއީ, ދެވަނަ ބޮޑު ހަނގުރާމައަށް ފަހު ވިލާތުގައި ކުރާ މި ފަދަ އެންމެ ބޮޑު ހަނގުރާމައެވެ. ރަޝިޔާއިން އަތްގަދަ ކޮށްފައިވާ ސަރަޙައްދުތަކަކީ, އެ ޤައުމުގެ ބަޔެއްގެ ގޮތުގައި ދެކުނު ނަމަވެސް, ޔޫކްރެއިނުން ބުނަނީ ރަޝިޔާއިން އަތްގަދަ ކޮށްފައިވާ ސަރަޙައްދުތައް މިނިވަން ކުރާނެ ކަމުގައެވެ.
ރަޝިޔާއިން އަތްގަދަ ކޮށްފައިވާ ސަރަޙައްދުތަކުގެ ތެރޭގައި ޔޫކްރެއިންގެ އިރުމަތީ ދޮންބާސްގެ ލުހާންސްކާއި ދޮންޏެސްކުގެ އިތުރުން ދެކުނުގައި އޮންނަ ޒަޕޮރީޜިޔާގެ ބައެއް ސަރަޙައްދުތައް ވެސް ހިމެނެއެވެ. ރަޝިޔާގެ އިސްތިޢުމާރީ ސިފައިންނާ ދެކޮޅަށް ޔޫކްރެއިނުން ދަނީ ކައުންޓަރއޮފެންސިވެއް ނުވަތަ ރައްދު ޙަމަލާގެ އަސްކަރީ ކެމްޕޭނެއް ހިންގަމުންނެވެ. ނަމަވެސް, މި ކެމްޕޭންގެ ދަށުން ބޮޑެތި ކުރިއެރުންތަކެއް ހޯދިފައި ނުވާ ކަން ފާހަގަ ކޮށްލަން ޖެހެއެވެ.