އެމެރިކާގެ މަޝްހޫރު ނޫސް, ވޯލް ސްޓްރީޓް ޖަރނަލުން މިޝިގަން ސްޓޭޓްގެ ރަށެއް ކަމުގައިވާ ޑިއަރބޯންގެ މުސްލިމުންނަށް މަލާމާތާއި ފުރައްސާރަ ރަައްދުކޮށް, މުސްލިމުންނާ މެދު ނަފުރަތު އުފެއްދުމުގެ ނިޔަތުގައި ލިޔުމެއް ޝާއިޢު ކުރުމާ ގުޅިގެން އެ ރަށުގައި ސަލާމަތީ ފިޔަވަޅުތައް ވަރުގަދަ ކޮށްފިއެވެ. ސަލާމަތީ ފިޔަވަޅުތައް ވަރުގަދަ ކޮށްފައިވާ ތަންތަނުގެ ތެރޭގައި އެ ރަށުގައި ހުންނަ މިސްކިތްތަކާއި, އަޅުކަން ކުރާ އެހެން ތަންތަނުގެ އިތުރުން ސަރުކާރުގެ އޮފީސް ޢިމާރާތްތައް ހިމެނެއެވެ. އަދި, މަގުތަކުގައި ފޯރިމަރާ ފުލުހުންގެ ޢަދަދު ވެސް ވަނީ އިތުރު ކޮށްފައެވެ.
ވޯލް ސްޓްރީޓް ޖަރނަލްގައި އެމެރިކާގެ މުސްލިމުންނަށް ފުރައްސާރަކޮށް ލިޔުމެއް ޝާއިޢު ކޮށްފައި ވަނީ "ޑިއަރބޯނަށް މަރުޙަބާ، އެމެރިކާގެ ޖިހާދުގެ ވެރިރަށް" މި ސުރުޚީގެ ދަށުންނެވެ. މި ލިޔުމަށް ޑިއަރބޯންގެ މޭޔަރު ޢަބްދުالله ޙައްމޫދުގެ އިތުރުން އެމެރިކާގެ މުސްލިމުންގެ ޙައްޤުތަކަށް ވަކާލާތުކުރާ ޖަމުޢިއްޔާތަކާއި, ޢަރަބިންނާ މެދު ގެންގުޅޭ ތަފާތު ކުރުންތައް ނައްތައިލުމަށް މަސައްކަތް ކުރާ ޖަމުޢިއްޔާތަކުން ވަނީ ނުރުހުން ފާޅުކޮށް, ކުށްވެރި ކޮށްފައެވެ.
މީގެ ތެރޭގައި ކައުންސިލް އޮން އެމެރިކަން-އިސްލާމިކް ރިލޭޝަންސާއި ޢަރަބް އެމެރިކަން އެންޓި-ޑިސްކްރިމިނޭޝަން ކޮމިޓީ ހިމެނެއެވެ. ޙައްމޫދު ވިދާޅުވީ, ވޯލް ސްޓްރީޓް ޖަރނަލްގައި ޝާއިޢު ކޮށްފައިވާ ލިޔުމަކީ އިސްލާމް ދީނާއި, މުސްލިމުންނާ މެދު ނަފުރަތު އުފެއްދުމުގެ ނިޔަތުގައި ޝާއިޢު ކޮށްފައިވާ ލިޔުމެއް ކަމުގައެވެ. އަދި, މިއީ ވަރަށް ނާތަހުޒީބު އަމަލެއްގެ ގޮތުގައި އޭނާ ސިފަ ކުރެއްވިއެވެ.
ޑިއަރބޯންގެ މުސްލިމުންނާއި, ސިޔާސީ އިސްވެރިންނަކީ ޓެރެރިޒަމަށް ހިތްވަރުދޭ ބަޔެއްގެ ގޮތުގައި ސިފަކޮށްފައިވާތީ, އޭނާ ވަނީ އެކަން ވެސް ކުށްވެރި ކުރައްވާފައެވެ. ވޯލް ސްޓްރީޓް ޖަރނަލްގައި މުސްލިމުންނަށް ފުރައްސާރަކޮށް ލިޔުމެއް ޝާއިޢު ކޮށްފައި ވަނީ އެ ނޫހުގެ މެދުއިރުމަތީގެ މީޑިޔާއާ ބެހޭ ރީސަރޗް އިންސްޓިޓިއުޓްގެ އެގްޒެކެޓިވް ޑިރެކްޓަރ ސްޓީވަން ސްޓެލިންސްކީއެވެ.
"ލިޔުން ޝާއިޢު ކުުރުމާ އެކު ޑިއަރބޯންގެ ފުލުހުން ވަނީ އަޅުކަން ކުރާ ތަންތަނާއި, މުހިންމު ޢިމާރާތްތަކުގައި ސަލާމަތީ ފިޔަވަޅުތައް ވަރުގަދަ ކޮށްފައި. މިއީ, ކަނޑައެޅިގެން ޑަބްލިޔު.އެސް.ޖޭ [ވޯލް ސްޓްރީޓް ޖަރނަލް]ގައި ޝާއިޢު ކޮށްފައިވާ ލިޔުމާ ގުޅިގެން އަޅަން މަޖުބޫރުވި ފިޔަވަޅުތަކެއް. އެއީ މުސްލިމުންނާ މެދު ނަފްރަތު އުފައްދުމުގެ އިތުރުން ޑިއަރބޯނަށް ދީފައިވާ ޙަމަލާއެއް،" ޙައްމޫދު ވިދާޅުވިއެވެ.
މުސްލިމުންނާ މެދު ނަފުރަތު އުފެދޭ ގޮތަށް ވޯލް ސްޓްރީޓް ޖަރނަލްގައި ހަޑިމުޑުދާރު ލިޔުމެއް ޝާއިޢު ކޮށްފައި މި ވަނީ, އެމެރިކާގެ މުސްލިމުންނާ މެދު އޮތް ނަފްރަތު އިތުރުވަމުންދާ ދަނޑިވަޅެއްގައެވެ. މީގެ އިތުރުން, ފަލަސްޠީނާއި ޔަހޫދީންނާ މެދު އޮތް ނަފްރަތު ވެސް އިތުރުވެފައިވާ ކަމުގައި އިންސާނީ ޙައްޤުތަކަށް ވަކާލާތުކުރާ ޖަމުޢިއްޔާތަކުން ބުނެއެވެ. މި ކަން އިތުރުވެފައި ވަނީ, އޮކްޓޫބަރު 7 ވަނަ ދުވަހު ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ލާއިންސާނީ ޢުދުވާނެއް ފެށި ހިސާބުން ކަން ފާހަގަ ކޮށްލަން ޖެހެއެވެ.
އެމެރިކާގައި ދިރިއުޅޭ މުސްލިމުންނާ ދެކޮޅަށް ދެމުންދާ ޙަމަލާތައް ވެސް ފަހަކަށް އައިސް ވަނީ އިތުރުވެފައެވެ. ހުސްވި އަހަރުގެ ނޮވެންބަރު މަހު ވަރމޮންޓްގެ ސްކޫލެއްގައި ތަޢުލީމު ހާސިލުކުރާ ފަލަސްޠީން ދަރިކޮޅުގެ ތިން ދަރިވަރަކަށް ބަޑިން ޙަމަލާދީ ޒަޚަމު ކޮށްލާފައިވެއެވެ. އެ ކުދިން ޙަމަލާ ދިނީ ދޮން ނަސްލުގެ ފިރިހެނެކެވެ. އަދި, އޮކްޓޫބަރު މަހު އިލިނޯއީގައި ފަލަސްޠީން ދަރިކޮޅުގެ ހަ އަހަރު ކުޑަކުއްޖަކަށް ވަޅިން ޙަމަލާދީ ޝަހީދު ކޮށްލާފައިވެއެވެ. އެ ކުއްޖާގެ ހަށިގަނޑުގެ 26 ތަނަކަށް ވަޅި ޖަހާފައިވެއެވެ.