ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނަށް ނިމުމެއް ގެނައުމާ ގުޅޭ މަޝްވަރާތަކަށް އެމެރިކާގެ ޚާރިޖީ ވަޒީރު މެދުއިރުމަައްޗަށް ދަތުރުފުޅެއް ފައްޓަވާފައިވާ ދަނޑިވަޅުގައި, ޣައްޒާގެ ދެކުނުގައި އޮންނަ ޚާން ޔޫނިސަށް ދެމުންދާ ޙަމަލާތައް ޔަހޫދީ ފައުޖުން އިތުރު ކުރަން ފަށައިފިއެވެ. ފާއިތުވި 24 ގަޑިއިރުގެ ތެރޭގައި ޔަހޫދީ ފައުޖުން ޣައްޒާގެ އެކި ހިސާބުތަކަށް ބޮންއަޅައި 107 މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ.
ޔަހޫދީންގެ މި ޢުދުވާނަށް ނިމުމެއް ގެނައުމަށް ޤަޠަރާއި މިޞްރުން ގުޅިގެން ވަނީ އެއްބަސްވުމެއްގެ ދެލިކޮޕީ ތައްޔާރު ކޮށްފައެވެ. އަދި, ޙަމާސް ޖަމާޢަތުން ދަނީ މި އެއްބަސްވުން ދިރާސާ ކުރަމުންނެވެ. މި އެއްބަސްވުމާ ގުޅޭ ގޮތުން މަޝްވަރާ ކުރެއްވުމަށް އެމެރިކާގެ ޚާރިޖީ ވަޒީރު އެންތަނީ ބްލިންކަން މިހާރު ގެންދަވަނީ މެދުއިރުމަތީގެ ބައެއް ޤައުމުތަކަށް ދަތުރުފުޅެއް ކުރައްވަމުންނެވެ. ސަޢޫދީ ޢަރަބިއްޔާގެ ވެރިރަށް ރިޔާޟަށް ވަޑައިގެންނެވުމަށް ފަހު މިހާރު އޭނާ ހުންނެވީ މިޞްރުގެ ވެރިރަށް ޤާހިރާގައެވެ.
ޣައްޒާގެ އެންމެ ދެކުނުގައި އޮތް ރަފަޙަށް ޢުދުވާން ފުޅާ ކުރަން ތައްޔާރުވަމުންދާ ކަމަށް ޔަހޫދީން އިޢުލާނު ކޮށްފައިވާ މި ދަނޑިވަޅުގައި, ޣައްޒާގެ ރައްޔިތުން ތިބީ ބްލިންކަންގެ ދަތުރުފުޅާ އެކު, ޢުދުވާންތައް ނިމުމަކަށް އަންނާނެ ކަމުގެ އުންމީދާ އެކުގައެވެ. ޣައްޒާގެ އުތުރާއި މެދުތެރޭގެ ސަރަޙައްދަށް ޔަހޫދީ ފައުޖުން ދިން ޙަމަލާތަކުން ސަލާމަތްވުމަށް މިލިޔަނަކަށް ވުރެ ގިނަ މީހުން ވަނީ ރަފަޙަށް ދަތުރު ކޮށްފައެވެ. އަދި, ޔަހޫދީން އެ ރަށަށް ބޮން އެޅުން އިތުރުކޮށްފި ނަމަ, އެތަކެއް ހާސް ބަޔަކު ޝަހީދުވާނެއެވެ.
ބްލިންކަންގެ ދަތުރުފުޅާ ގުޅޭ ގޮތުން އެމެރިކާގެ ޚާރިޖީ ވުޒާރާގެ ތަރުޖަމާނު މެތިޔު މިލަރ ވިދާޅުވީ, ރިޔާޟަށް ވަޑައިގަންނަވައި އޭނާ ސަޢޫދީ ވަލީއަޙުދު މުޙައްމަދު ބިން ސަލްމާނާ ބައްދަލު ކުރައްވާފައިވާ ކަމުގައެވެ. އަދި, ޢުދުވާންތަކަށް ނިމުމެއް ގެންނަން ސަރަޙައްދީ ފެންވަރެއްގައި ކުރެވިދާނެ މަސައްކަތްތަކާ ގުޅޭ ގޮތުން މަޝްވަރާ ކުރައްވާފައިވާ ކަމުގައެވެ. ޣައްޒާގައި ހާލުގައި ޖެހިފައިވާ 2.3 މިލިޔަނެއްހާ މީހުންނަށް އިންސާނީ އެހީގެ ސާމާނު ފޯރުކޮށްދިނުން އަވަސް ކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރައްވާފައިވާ ކަމުގައި އޭނާ ވިދާޅުވިއެވެ.
ބްލިންކަން މިހާރު ހުންނެވީ ޤާހިރާގައެވެ. އަދި, މިޞްރުގެ ރައީސް ޢަބްދުލްފައްތާޙް އަލް-ސީސީއާ އެކު މަޝްވަރާތައް ބޭއްވެވުމަށް ފަހު އޭނާ ޤަޠަރާއި ޒަޔަނިސްޓު އިސްރާއީލަށް ވެސް ވަޑައިގަންނަވާނެއެވެ. ޔަހޫދީންނާއި ޙަމާސް ޖަމާޢަތާ ދެމެދު އެކުލަވައިލަން މަސައްކަތް ކުރާ އެއްބަސްވުމުގައި އެމެރިކާއިން ބައިވެރިވެފައި މި ވަނީ ޔަހޫދީންގެ ދިފާޢުގައެވެ.
އެމެރިކާގެ މައިގަނޑު ބޭނުމަކީ ޙަމާސް ޖަމާޢަތުން ރަހީނު ކޮށްފައިވާ އަސީރުން މިނިވަން ކުރެވޭނެ ގޮތެއް ހޯދުމެވެ. ނަމަވެސް, ޔަހޫދީން ހިންގަމުންދާ ޢުދުވާންތައް ހުއްޓައިލަން އެއްބަސްނުވަނީސް, އަސީރުން މިނިވަން ކުރަން ޙަމާސުން އެއްބަހެއް ނުވާނެއެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 27,585 އަށް އުފުލިފައެވެ. އޭގެ ތެރޭގައި 11,500 އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 66,630 އަށް އުފުލިފައިވާއިރު, އޭގެ ތެރޭގައި 8,600 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ.