ކަނޑޫދޫ ރައްޔިތުންގެ މާޔޫސްކަން ފިލުވައިދީ، ހިނިތުންވުން ގެނެސްދޭނަން: ރައީސް

ސަރުކާރުތަކުން ތ.ކަނޑޫދޫއަށް އިހުމާލުވެފައި އޮތް އޮތުން ނިމުމަކަށް ގެނެސް، ރައްޔިތުންގެ މާޔޫސްކަން ފިލުވައިދީ ހިނިތުންވުން ގެނެސްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ކޮޅުމަޑުލަށް ކުރައްވާ ދަތުރުފުޅުގައި ކަނޑޫދޫއަށް ވަޑައިގެން ދެއްކެވި ވާހަކަފުޅުގައެވެ.

ކަނޑޫދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ތ.އަތޮޅުގެ ދިގު މާޒީގައި އެއަތޮޅު އެހާބޮޑަށް ބާކީވެ ފަހަތަށް ގޮސްފައި އޮތް އޮތުން ނިމުމަކަށް ގެނެސްދެއްވާނެކަމުގެ ޔަޤީންކަން ދެއްވާކަމަށެވެ. ރައީސްވަނީ ތ.އަތޮޅަކީ ތަރައްޤީގައި އެންމެ ކުރީ ސަފުގައި ފުރުޞަތުތައް ލިބޭ އަދި ތަރައްޤީވެފައިވާ ރަށްތަކެއް ހިމެނޭ އަތޮޅަކަށް ހައްދަވައިދެއްވާނެކަމުގެ ޔަޤީންކަން ދެއްވާފައެވެ.

ރައީސްގެ ވާހަކަފުޅުގައި ސަރުކާރެއް ހޮވަނީ ރައްޔިތުންނަށް ބޭނުންވާ ކަންކަން ކޮށްދިނުމަށްކަމަށާއި، މިސަރުކާރުން ރައްޔިތުން އެދޭ އަމާޒަށް ހުރިހާ ކަމެއްވެސް ވާސިލްކޮށްދެއްވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ މިސަރުކާރުން ވެރިކަމާ ހަވާލުވިއިރު އޮތް އިޤްތިޞާދީ ދަތި ޙާލަތު ރަނގަޅުކުރުމަށް މަސައްކަތްކުރައްވަމުން ގެންދަވާކަމަށާއި، އެ މަސައްކަތްތަކަށް ބައިނަލްއަޤްވާމީ މާލީ އިދާރާތަކުން ތަޢުރީފްކުރާކަމަށެވެ. އެގޮތުން އައިއެމްއެފުން އަމިއްލައަށް ކުރި ދިރާސާއިން ސަރުކާރުން އިޤްތިޞާދު ހަމައަކަށް އެޅުވުމަށް އަމިއްލައަށް އެޅި ފިޔަވަޅުތައް ރަނގަޅުކަމަށް ފާހަގަކޮށްފައިވާކަން ހާމަކުރައްވާ ރައީސް ވިދާޅުވީ މާ ލަސްތަކެއްނުވެ އޭގެ ފައިދާ ރައްޔިތުންނަށް ކުރަންފަށާނެކަމަށެވެ.

ރައީސް ވިދާޅުވީ އިޤްތިޞާދީ އުނދަގޫ ނިންމުންތަކާއެކުވެސް ތަރައްޤީ ގެނެސްދެއްވާނެކަމަށެވެ.

"އަޅުގަނޑުމެން މަސައްކަތްކުރާނަން މަސައްކަތްތައް ތަރުތީބުކޮށްގެން ރައްޔިތުން އެންމެ އެދޭ ކަންކަމަށް އިސްކަންދީގެން، ޕީއެސްއައިޕީގެ މަޝްރޫޢުތައް ކުރިއަށް ގެންދަން. މިއާއެކު އާމްދަނީން ދެކޮޅުޖެހި ހުރިހާ ކަމެއްވެސް ކުރިއަށް ގެންދެވޭނެ". ރައީސް ވިދާޅުވިއެވެ.

ކަނޑޫދޫގައި ތެލަސީމިއާއަށް ފަރުވާހޯދާ 4 ކުދިން އެބަތިއްބެވެ. ނަމަވެސް ސިއްޙީ ޚިދުމަތުގެ ފެންވަރު ދަށްވެ، ލެބޯޓްރީގެ ޚިދުމަތް ނެތުމުން ދިމާވާ ދަތިތަކަށް އިޝާރާތްކުރައްވާ ރައީސް ވިދާޅުވީ ކަނޑޫދޫގައި އަޅަން ފަށައި ހުއްޓިފައިވާ ސިއްޙީ މަރުކަޒުގެ މަސައްކަތް ވީހާވެސް އަވަހަށް ފެށުމަށް އިސްކަންދެއްވާ ކަމާގުޅުން ހުރި މުއައްސަސާތަކާ ވާހަކަދައްކައިގެން އެ މަޝްރޫޢު ނިންމަވާދެއްވާނެކަމަށެވެ. ރައީސް ވިދާޅުވީ ތެލަސީމިއާއަށް ބޭނުންވާ ހުރިހާ ފަރުވާއެއް ފޯރުކޮށްދިނުމަކީ ސަރުކާރުގެ ސިޔާސަތެއްކަމަށާއި، އެކަމަށް ކެބިނެޓުގައިވެސް މުހިންމު ނިންމުންތަކެއް ނިންމާފައިވާކަމަށެވެ. ތެލަސީމިއާ ކުދިންނާއި އެކުދިންގެ އާއިލާތަކަށް ވަރަށް ޚާއްޞަ ސަމާލުކަމެއް ދެއްވާނެކަމަށް ރައީސް ވިދާޅުވިއެވެ. ރައީސް ވިދާޅުވީ ކަނޑޫދޫގައި އަޅާ ސިއްޙީ މަރުކަޒު ނިމޭއިރު ލެބޯޓްރީގެ ވަސީލަތްތަކާއެކު އެކަށީގެންވާ ތަމްރީން ލިބިފައިވާ މުވައްޒަފުންވެސް ތިބޭނެކަމަށެވެ.

"އެރަށެއްގެ އާބާދީއާއެއްވަރަށް އެކަށީގެންވާ ސައިޒުގެ ލެބޯޓްރީއެއް ޤާއިމްކޮށްދޭނަން. މިރަށުގައިވެސް ލެބޯޓްރީގެ ސާމާނާ އެ ތަމްރީން ލިބިފައިވާ މީހުންނާއެކު އެކަންވެސް ވާނެ". ރައީސް ވިދާޅުވިއެވެ.

ކަނޑޫދޫގެ ހުއްޓިފައި އޮތް ނަރުދަމާގެ މަޝްރޫޢަށްވެސް ހައްލެއް ގެންނަވާނެކަމަށް ވިދާޅުވަމުން ރައީސް ވަނީ އެގޮތަށް އެތައް ރަށެއްގައި މަޝްރޫޢުތައް ހުއްޓިފައި އެބައޮތްކަމަށެވެ. އެގޮތަށް ދިމާވެފައިވަނީ ނިމިދިޔަ ސަރުކާރުގައި ކުންފުނިތަކުން ބަލާނުލައި ކޮށްފައިވާ ޚަރަދުތަކުގެ ސަބަބުންކަމަށެވެ. ރައީސް ވިދާޅުވީ ކަނޑޫދޫގެ ނަރުދަމާ ނިޒާމު ޤާއިމްކުރުމުގެ މަސައްކަތް އަވަހަށް ނިންމަވާދެއްވާނެކަމަށެވެ.

މީގެ އިތުރުން ކަނޑޫދޫގެ ބަނދަރު ހަލާކުވެފައިވާ އޮތް އޮތުމަކީވެސް މައްސަލައެއްގެ ގޮތުގައި ފާހަގަކުރައްވާ ރައީސް ވިދާޅުވީ ބަނދަރު ޒަމާނީ ފެންވަރަށް ތަރައްޤީކޮށް ރައްޔިތުން ބޭނުންވާގޮތަށް އެ މަޝްރޫޢަށް ބަދަލު ގެނެސްދެއްވާނެކަމަށެވެ. މީގެ އިތުރުން ކުޅިވަރު ކުޅޭނެ ވަސީލަތާއި ސްކޫލަށް ދިމާވެފައިވާ ޖާގައިގެ މައްސަލަ ޙައްލުކޮށްދެއްވާނެކަމުގެ ޔަޤީންކަންވެސް ރައީސް ވަނީ ދެއްވާފައެވެ.

ކަނޑޫދޫއަކީ ރާއްޖޭގެ ނިސްބަތުން ފުޅާ ދާއިރާއެއްގައި ދަނޑުވެރިކަން ކުރާ ރަށެކެވެ. ނަމަވެސް ރައްކާތެރި ފެނުގެ ނިޒާމެއް ނެތުމާއި، ބިމުގެ ޖާގައިގެ ދަތިކަމުގެ ސަބަބުން ދަނޑުވެރިކަން ފުޅާކުރުމަށްވެސް ވަނީ ހުރަސްތަކެއް ކުރިމަތިވެފައެވެ. ރައީސް ވިދާޅުވީ އެކަން ހައްލުކޮށްދެއްވުމުގެ ގޮތުން ކައިރިން ފަޅު ރަށެއް ހޯދުމުގެ ފުރުޞަތު ކައުންސިލަށް މިހާރު އޮންނާނެކަމަށެވެ. އެހެންކަމުން ފަޅު ރަށެއް ހޯދުމަށް ޕްރޮޕޯސަލް ހުށައެޅުމަށް ރައީސް އެދިވަޑައިގެންނެވިއެވެ.

"ވަރަށް ބޮޑު ދޮރެއް މިހުޅުވައިދިނީ، އެދޮރުން ވަދެ ނަފާ ހޯދުމަކީ ކައުންސިލާ ރައްޔިތުންގެ އޮތް މަސައްކަތެއް" ރައީސް ވިދާޅުވިއެވެ.

ރައީސް ވިދާޅުވީ ކައުންސިލްތައް ފުރިހަމައަށް ބާރުވެރިކޮށް، ރައްޔިތުން މުއްސަނދިކުރުމަށް ޖާގަ ހޯދައިދެއްވާނެކަމަށެވެ.

ރާއްޖޭގެ އިޤްތިޞާދު ފުޅާކުރުމަށް ކުރައްވާ މަސައްކަތްތަކަށް އިޝާރާތްކުރައްވާ ރައީސް ވިދާޅުވީ، ރާއްޖޭގެ މުޅި އިޤްތިޞާދަށް އަންނަ ދިރުމުން ނޫންގޮތަކަށް ފަތުރުވެރިކަން ފުޅާކުރެވެން ނެތްކަމަށެވެ. އެހެންކަމުން މިހާރު ފަށްޓަވާފައިވާ މަސައްކަތްތަކާއެކު އިންވެސްޓަރުންގެ އިތުބާރު ލިބި ފަތުރުވެރިކަން ފުޅާކުރެވޭނެކަމަށް ރައީސް ވިދާޅުވިއެވެ. މިއާއެކު ތ.އަތޮޅުގައިވެސް އިތުރު ރިސޯޓްތައް ތަރައްޤީވެގެން އަންނާނެކަމަށް ރައީސް ވިދާޅުވިއެވެ.

ރައީސްގެ ވާހަކަފުޅު ނިންމަވާލައްވަމުން ވިދާޅުވީ ޒަމާނުއްސުރެ ބާކީވެފައި އޮތް ކަނޑޫދޫގެ ރައްޔިތުންގެ މާޔޫސްކަން ފިލުވައިދެއްވައި، ހިނިތުންވުން ގެނުވައިދެއްވާނެކަމަށެވެ.