ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހައްދުން ނެއްޓިފައިވާ ކަމަށް ވިދާޅުވެ, އެ ކަން ގަބޫލު ކުރައްވާ ކަމުގައި އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ. ޔަހޫދީ ފައުޖުގެ ޢުދުވާނާ ގުޅޭ ގޮތުން ވާހަކަފުޅު ދައްކަވަމުން ބައިޑަން ވިދާޅުވީ, ޢުދުވާނުގެ ކަންކަން "މާ މައްޗަށް" ގޮސްފައިވާ ކަމުގައެވެ. އަދި, ޢުދުވާންތައް މެދުކަނޑައިލަން ޔަހޫދީންނަށް އެތަކެއް ގޮތަކުން ބާރު އަޅުއްވަމުން ގެންދަވާ ކަމުގައި އޭނާ ވިދާޅުވިއެވެ.
"އަޅުގަނޑުގެ ނަޒަރުގައި, ޣައްޒާއަށް [ޒަޔަނިސްޓު އިސްރާއީލުގެ ޔަހޫދީ ފައުޖުން] ދެމުންދާ ރައްދުގެ ކަންކަން ވަނީ ހައްދުން ނެއްޓި, މާ މައްޗަށް ގޮސްފައި. ޢުދުވާންތަކަށް ނިމުމެއް ގެންނަން އަޅުގަނޑު މި ދަނީ ގިނަ މަސައްކަތްތަކެއް ކުރަމުން. އެ ކަމަށް އެކި ގޮތްގޮތުން ބާރު އަޅަމުން. ޣައްޒާގައި ހައިހޫނު ކަމުގައި ގިނަ ބަޔަކު އެބަތިބި. ކުށެއް ނެތް ގިނަ ބަޔަކު ދަނީ ޝަހީދުވަމުން. މި ކަން ހުއްޓުވަން ޖެހޭ،" ބައިޑަން ވިދާޅުވިއެވެ.
ބައިޑަން ވިދާޅުވީ, އެމެރިކާގެ ޚާރިޖީ ސިޔާސަތުގެ ދަށުން މި ވަގުތު އެންމެ ބޮޑު އިސްކަމެއް ދެނީ, ޣައްޒާގައި ހިންގަމުންދާ ލާއިންސާނީ ޢުދުވާނަށް ނިމުމެއް ގެނެސް, އަސީރުން މިނިވަންކޮށް, ޣައްޒާގައި ހާލުގައި ޖެހިފައިވާ 2.3 މިލިޔަނެއްހާ މީހުންނަށް އިންސާނީ އެހީތެރިކަން ފޯރުކޮށްދިނުމަށް ކަމުގައެވެ. އަދި, ސަޢޫދީ ޢަރަބިއްޔާއާއި އިސްރާއީލާ ދެމެދު ސިޔާސީ ގުޅުން ގާއިމު ކުރުމަށް އޭނާގެ ސަރުކާރުން އިސްކަންދޭ ކަމުގައި ވެސް ބައިޑަން ވިދާޅުވިއެވެ.
މިއީ, ފަހުގެ ތާރީޚެއްގައި ޒަޔަނިސްޓު އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫގެ ޔަހޫދީ ސަރުކާރަށް އަމާޒުކޮށް މި ފަދަ ބަސްމަގެއް ބޭނުން ކުރައްވައިގެން ބައިޑަން ނުރުހުން ފާޅު ކުރައްވާފައިވާ ފުރަތަމަ ފަހަރެވެ. އޭނާ, ޖައްބާރު ނަތަންޔާހޫގެ އަސްކަރިއްޔާއަށް ފާޑު ވިދާޅުވެފައި މި ވަނީ, ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތައް ހުއްޓުމަކަށް ގެނައުމަށް އެމެރިކާގެ އެތެރެއިން ބާރު އަޅަމުންދާ ދަނޑިވަޅެއްގައެވެ.
މީގެ ކުރިން ބައިޑަން ވާހަކަފުޅު ދައްކަވާފައި ވަނީ ޔަހޫދީ ފައުޖުގެ ޢުދުވާންތަކުގެ ދިފާޢުގައެވެ. އަދި, ފަލަސްޠީނުގެ ކުށެއް ނެތް ޢާންމު ރައްޔިތުންގެ ފުރާނައަކީ މި ހަނގުރާމައިގެ އަގުގެ ގޮތުގައި ސިފަކުރައްވައި އޭނާ ކުރިން ދައްކަވާފައިވާ ވާހަކަފުޅުތަކަށް ދުނިޔޭގެ އެކި ކަންކޮޅުތަކުން ވަނީ ނުރުހުމާއި ފާޑުކިޔުންތައް އަމާޒުވެފައެވެ. ޔަހޫދީ ފައުޖުގެ އަމަލުތަކާ މެދު ނުރުހުންވެ, ބައިޑަން ފާޅު ކުރައްވާފައިވާ ޚިޔާލާ މެދު އިތުރު މަޢުލޫމާތު ހާމަ ކުރަން ވައިޓް ހައުސްއިން ވަނީ ދެކޮޅު ހަދާފައެވެ.
ޔަހޫދީ ފައުޖަށް ފާޑުވިދާޅުވެ ބައިޑަން ވާހަކަފުޅު ދައްކަވާފައި މި ވަނީ, ޒަޔަނިސްޓު އިސްރާއީލާ އެކު ސިޔާސީ ގުޅުން ގާއިމު ކުރުމާ ގުޅޭގޮތުން މަޝްވަރާ ކުރުމަށް ސަޢޫދީ ޢަރަބިއްޔާއިން ދެކޮޅު ހަދަމުންދާ ދަނޑިވަޅެއްގައެވެ. ސަޢޫދީ ޢަރައްޔާއިން ބުނީ, ޔަހޫދީ ފައުޖުން ޣައްޒާގައި ހިންގަމުންދާ ޢުދުވާންތައް ހުއްޓައިލައި, ފަލަސްޠީނުގެ މިނިވަން ދަޢުލަތެއް ގާއިމު ކޮށްދޭން އެއްބަސްވުމުން މެނުވީ, އިސްރާއީލާ އެކު އެއްވެސް މަޝްވަރާއެއް ނުކުރާނެ ކަމުގައެވެ.
ބައިޑަން ޔަހޫދީ ފައުޖުގެ ގަތުލުއާންމުތަކާ މެދު ހިތްހަމަނުޖެހުން ފާޅު ކުރައްވާފައިވީ ނަމަވެސް, ޔަހޫދީންގެ ޢުދުވާންތައް ހިންގަމުން ދަނީ އެމެރިކާގެ ފުރިހަމަ އެއްބާރުލުމާއި އެހީތެރިކަމާ އެކުގައެވެ. ޔަހޫދީންގެ ފައުޖަށް ބޭނުންވާ އެންމެ ފަހުގެ ޒަމާނީ ހަތިޔާރު ފޯރުކޮށްދެނީ އެމެރިކާއިންނެވެ. އެ ކަން މެދުކަނޑައިލާފައެއް ނުވެއެވެ. އޮކްޓޫބަރު 7 ވަނަ ދުވަހު ޔަހޫދީންގެ ޢުުދުވާން ފެށި ފަހުން ވެސް, އެތަކެއް މިލިޔަން އެމެރިކާ ޑޮލަރުގެ އަގުހުރި ހަތިޔާރު އެމެރިކާއިން ވަނީ ޔަހޫދީންނަށް ފޯރު ކޮށްދީފައެވެ.
ޔަހޫދީ ފައުޖުން ފާއިތުވި 24 ގަޑިއިރުގެ ތެރޭގައި ޣައްޒާއަށް ދީފައިވާ އެކި ޙަމަލާތަކުގައި ފަލަސްޠީނުގެ 107 މީހުން ވަނީ ޝަހީދު ކޮށްލާފައެވެ. އަދި, 142 މީހުން ޒަޚަމު ކޮށްލާފައެވެ. މި ޢުދުވާނުގައި މިހާތަނަށް ޝަހީދު ކޮށްލާފައިވާ މީހުންގެ ޢަދަދު 27,947 އަށް އުފުލިފައިވާއިރު, މި ޢަދަދު މާދަމާ އިރުއެރުމުގެ ކުރިން 28,000 އަށް އަރާނެއެވެ. މި ޢުދުވާނުގައި ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 67,000 އަށް އުފުލިފައެވެ.