ޣައްޒާގެ ތޮއްޖެހިފައިވާ ހަސްފަތާލުތަކަށް ބޭނުންވާ އެހީއެއް ނުލިބޭ: ދުނިޔޭގެ ޞިއްޙަތު ޖަމުޢިއްޔާ
ޔަހޫދީ ފައުޖުން މެދުކެނޑުމެއް ނެތި ޣައްޒާއަށް ދެމުންދާ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު އިންތިހާއަށް އިތުރުވެ, ޣައްޒާގެ ހަސްފަތާލުތައް ތޮއްޖެހިފައިވާ ކަމަށާއި, އެ ތަންތަނަށް ބޭނުންވާ ސާމާނު ފޯރުކޮށްދޭން ޔަހޫދީން ހުރަސް އަޅަމުންދާ ކަން ދުނިޔޭގެ ޞިއްޙަތު ޖަމުޢިއްޔާއިން ހާމަ ކޮށްފިއެވެ. އެ ޖަމުޢިއްޔާއިން ބުނީ, ހަސްފަތާލުތައް ހިންގަން ބޭނުންވާ ބޭހާއި ޞިއްޙީ ފަރުވާގެ ސާމާނު ހުސްވެފައިވާ ކަމަށާއި, އެ ތަންތަނަށް ބޭސް ފޯރު ކޮށްދޭން ޔަހޫދީން ދެކޮޅު ހަދަމުންދާ ކަމުގައެވެ.
"ޣައްޒާގެ ހަސްފަތާލުތައް ވަނީ ފުރިބާރުވެފައި. ތޮއްޖެހިފައި. އެންމެންނަށް ޞިއްޙީ ފަރުވާދެވޭނެ މިންވަރަށް ބޭހާއި ބޭސްފަރުވާއަށް ބޭނުންވާ ސާމާނެއް ނެތް،" ހުޅަނގު އައްސޭރިއާއި ޣައްޒާއަށް ކަނޑައަޅާފައި ހުންނަވާ ދުނިޔޭގެ ޞިއްޙަތު ޖަމުޢިއްޔާގެ އިސް އޮފިޝަލް ރިޗަރޑް ޕީޕަރކޯން ވިދާޅުވިއެވެ.
އޭނާ ހުންނެވީ ޣައްޒާގެ އެންމެ ދެކުނުގައި އޮތް ރަފަޙުގައި. އެ ރަށުގައި ފަލަސްޠީނުގެ 1.4 މިލިޔަނަށް ވުރެ ގިނަ މީހުން މި ވަގުތު ދަނީ ދިރިއުޅެމުންނެވެ. އެ މީހުން ތިބީ ވަގުތީ ހިޔާތަކާއި ޓެންޓުތަކުގައެވެ. ޕީޕަރކޯން ވިދާޅުވީ, ބައެއް މީހުންނަށް ލިބިފައިވާ ޒަޚަމުތަކާ އެކު, އެ މީހުންގެ އަތްފައި ބުރިކުރަން ޖެހިފައިވާ ކަމުގައެވެ. އަދި, ޞިއްޙީ ފަރުވާއަށް ބޭނުންވާ ސާމާނާއި ބޭސް ލިބެން ހުރި ނަމަ, އެ ކަން ކުރަން ނުޖެހޭނެ ހާލަތްތައް ވެސް ހުރި ކަމުގައި އޭނާ ވިދާޅުވިއެވެ.
ޕީޕަރކޯން ވިދާޅުވީ, ޣައްޒާގެ ހަސްފަތާލުތަކަށް ބޭނުންވާ ބޭހާއި ޞިއްޙީ ފަރުވާގެ ސާމާނު ފޮނުވަން ޔަހޫދީން ގަސްދުގައި ހުރަސް އަޅަމުންދާ ކަމުގައެވެ. އަދި, ހުސްވި އަހަރުގެ ނޮވެންބަރު މަހުން ފެށިގެން ޣައްޒާއަށް އެތެރެ ކޮށްފައި ވަނީ ދުނިޔޭގެ ޞިއްޙަތު ޖަމުޢިއްޔާއިން އެދިފައިވާ ތަކެތީގެ އެންމެ 40 އިންސައްތަ ކަމުގައެވެ.
"ޖަނަވަރީ ފެށުނު ފަހުން އެއްވެސް ވަރަކަށް ބޭހާއި ސާމާނެއް ނުލިބޭ. ހަނގުރާމަ ހިނގަމުންދާ ހާލަތްތަކުގައި ވެސް, އިންސާނިއްޔަތަށް ޓަކައި މަސައްކަތް ކުރާ މީހުންނަށް އެ ފުރުޞަތު ފަހިކޮށްދޭން ޖެހޭނެ. އެހެންނޫނީ, އަޅުގަނޑުމެންނާއި އދގެ އިދާރާތަކާއި ޕާޓްނަރުންނަށް މަސައްކަތެއް ނުކުރެވޭނެ،" ޕީޕަރކޯން ވިދާޅުވިއެވެ.
ޔަހޫދީ ފައުޖުން މިހާރު ދަނީ ރަފަޙަށް އަރައި, ލާއިންސާނީ ޢުދުވާން ފުޅާ ކުރުމަށް ތައްޔާރު ވަމުންނެވެ. މި ކަމާ ދެކޮޅަށް މުޅި ދުނިޔެއިން ދަނީ އަޑު އުފުލަމުންނެވެ. އދގެ އިންސާނީ އެހީއާ ބެހޭ އިދާރާގެ އިސްވެރިޔާ މާޓިން ގްރިފިތްސް ވިދާޅުވީ, ރަފަޙުގައި ޔަހޫދީ ފައުޖުގެ ލާއިންސާނީ ޢުދުވާންތައް ފުޅާކޮށްފި ނަމަ, އެތަކެއް ހާސް ބަޔަކު ޝަހީދުވެގެން ދާނެ ކަމުގައެވެ.
ޔަހޫދީ ފައުޖުގެ ޙަމަލާތައް މި ވަގުތު އެންމެ ވަރުގަދަ ކޮށްފައި ވަނީ ރަފަޙާ އިންވެގެން އޮންނަ ޚާން ޔޫނިސްގައެވެ. އެ ރަށުގެ މައި ހަސްފަތާލު, އަލް-ނާޞިރް ހަސްފަތާލަށް ޔަހޫދީ ސިފައިން މިހާރު ވަނީ ވަދެފައެވެ. އަދި, ހަސްފަތާލުގެ ތެރޭގައި ދަނީ ގަތުލުއާންމެއް ހިންގަމުންނެވެ. މި ގަތުލުއާންމުގެ ތެރޭގައި ހަސްފަތާލުގައި ތިބި ބަލި މީހުންގެ ތެރެއިން ހަތަރު މީހަކު ޝަހީދު ކޮށްލާފައިވާ ކަމުގައި ޣައްޒާގެ ޞިއްޙީ ވުޒާރާއިން ބުނެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 28,775 އަށް އުފުލިފައެވެ. އޭގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 68,552 އަށް އަރައެވެ.