ރައީސް މުޢިއްޒަކީ ރައްޔިތުން އެދޭ ތަރައްޤީއާއި ކުރިއެރުން ގެނެސްދެވޭނެ ލީޑަރެއް: ޝަރީފް
-
މި ސަރުކާރު ހަވާލުވިއިރު ޤައުމު އޮތީ ވަރަށް ބޮޑަށް ދަރަނިވެރިވެފައިކަން ފާހަގަކުރެއްވި
-
ރައީސް މުޢިއްޒުގެ ސަރުކާރުން އިޤުތިޞާތު ހަމައަކަށް އަޅުވާނެކަމާމެދު ޝައްކެއް ނުކުރައްވާ
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަކީ އައްޑޫ ސިޓީގެ ރައްޔިތުން އެދޭ ތަރައްޤީއާއި ކުރިއެރުން ގެނެސްދެއްވާނެ ލީޑަރެއްކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ ރައީސް ޑރ. މުޢިއްޒު އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގެ ތެރެއިން އައްޑޫ ސިޓީ މަރަދޫގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ޝަރީފް ވިދާޅުވީ ރައީސް ޑރ. މުޢިއްޒު ވެރިކަމާއި ހަވާލުވިއިރު، ޤައުމުގެ މާލީ ޙަލަތު އޮތީ ވަރަށް ގޯސްކޮށް ކަމަށާއި އެގޮތުން، މިދިޔަ ސަރުކާރުގެ ވެރިކަން ނިމުނުއިރު، ދައުލަތުގެ ދަރަނި 120 ބިލިޔަން ރުފިޔާއަށް އަރާފައިވާކަމަށެވެ. އެހެންނަމަވެސް، މިވަގުތު ޤައުމު އޮތީ ބަގުރޫޓުވެފައި ނޫން ކަމަށާއި، ރައީސް މުޢިއްޒާއި އެމަނިކުފާނުގެ އިޤުތިޞާދީ ޓީމުން، ޤައުމުގެ އިޤުތިޞާދު ހަމައަކަށް އަޅުއްވާނެކަމާމެދު އެއްވެސް ވަރަކަށް ޝައްކުނުކުރާކަމަށްވެސް ޝަރީފް ވިދާޅުވިއެވެ.
ޝަރީފް ވިދާޅުވީ އައްޑޫ ސިޓީއަށް ރައީސް ޑރ. މުޢިއްޒު ވެވަޑައިގެންނެވި ވަޢުދުތައްވެސް ފުއްދަވައި ދެއްވާނެކަމާމެދު ޝައްކު ނުކުރައްވާކަމަށެވެ. އަދި ރައީސް މުޢިއްޒަކީ ރައްޔިތުން އެދޭ ގޮތަށް ކަންކަން ކުރެއްވުމަށް ތައްޔާރަށް ހުންނެވި ލީޑަރެއްކަމަށްވެސް ޝަރީފް ވިދާޅުވިއެވެ.
ޔޫރަޕާއި ސިންގަޕޫރުފަދަ ތަންތަން ކުރިއަރާ ދިޔައީ އެންމެ ދުވަހަކުން ނޫންކަން ފާހަގަކުރައްވަމުން ޝަރީފް ވިދާޅުވީ އިޤުތިޞާދު ހަރުދަނާކޮށް ކުރިއެރުމަށް ވަގުތު ނަގާނެ ކަމަށާއި، ރާއްޖޭގެ އިޤުތިޞާދު ބިނާކުރުމަށް ރައީސާއި އެމަނިކުފާނުގެ ޓީމުން ގެންދަވަނީ އަވަދިނެތި މަސައްކަތްކުރައްވަމުން ކަމަށެވެ.