ޝަރުޢީ ނިޒާމުގެ ތެރެއިން ރައީސް ޔާމީނަށް އިންސާފު ލިބުން އަވަސްކުރަންޖެހޭ: ރައީސް

ޝަރުޢީ ނިޒާމުގެ ތެރެއިން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ވީހާވެސް އަވަހަށް އިންސާފު ލިބެންޖެހޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އެމަނިކުފާނު އައްޑޫ ސިޓީއަށް ކުރައްވަމުންގެންދަވާ ދަތުރުފުޅުގެ ތެރެއިން އައްޑޫ ސިޓީ ފޭދޫގައި ބޭއްވެވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ ރިޔާސީ ކެންޕޭނުގައި ވެވަޑައިގެންނެވި އެންމެ މުހިންމު އެއް ވަޢުދަކީ ރާއްޖޭގެ ޝަރުޢީ ނިޒާމު މިނިވަންކަމަށް ހުރަސް ނާޅުއްވާނެކަމަށް ވިދާޅުވެ ވެވަޑައިގެންނެވި ވަޢުދު ކަމަށެވެ. އެގޮތުން އެމަނިކުފާނުގެ ސަރުކާރުން މިހާތަނަށް އައިއިރު އެއްވެސް ވަރަކަށް ޝަރުޢީ ކޯޓުތަކަށާއި ޝަރުޢީ ނިޒާމަށް ނުފޫޒު ފޯރުވާފައިވާނުވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ.

ސިޔާސީ ގޮތުން މީހުން ހައްޔަރުކުރުން ނިމުމަކަށް ގެންނަންޖެހޭކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، ކުރީގެ ރައީސް، ރައީސް ޔާމީނަށްވެސް އިންސާފު ލިބެންޖެހޭ ކަމަށެވެ. އަދި އުންމީދަކީ ޝަރުޢީ ނިޒާމުގެ ތެރެއިން ދާދި އަވަހަށް ރައީސް ޔާމީނަށް އިންސާފު ލިބުންކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

"އަޅުގަނޑު ޤަބޫލުކުރާ ގޮތުގައި މިހާ ދުވަސް ވެގެންދިޔައިރު ރައީސް ޔާމީނަށް އިންސާފު ލިބުން ލަސްވުމަކީ އަޅުގަނޑުމެންނަށް ޤަބޫލުކުރެވޭނެ ގޮތެއް ނޫން. އެމަނިކުފާނަށްވެސް ޖުޑިޝަރީގެ ތެރެއިން އިންސާފު ލިބެން ޖެހޭނެ. ޖުޑިޝަރީ ހިނގަނީ ސަރުކާރުގެ އެއްވެސް ނުފޫޒެއް ނެތި. އެހެންވީމަ، އެމަނިކުފާނަށްވެސް އިންސާފު ލިބި، ޖަސްޓިސް ސާވްވުމަކީ މި ޤައުމަށް އޮތް އެންމެ އިންސާފުވެރި ގޮތް. އެމަނިކުފާނަށްވެސް އެންމެ އިންސާފުވެރި ގޮތް. އަޅުގަނޑު އުންމީދުކުރަނީ ޖުޑިޝަރީގެ ތެރެއިން ޝަރީޢަތުގެ ތެރެއިން އެމަނިކުފާނަށް ދާދި އަވަހަށް އިންސާފު ލިބިގެންދާ ކަމަށް." ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ސިޔާސީ ގޮތުން މީހުން ޖަލަށްލުމާއި، އަދަބު ދިނުން މި ސަރުކާރުން ނިމުމަކަށް ގެންނަވާނެކަމަށެވެ. އަދި ސިޔާސީގޮތުން މީހުންނަށް އަދަބު ދެއްވާނެ ލީޑަރަކަށް އެ މަނިކުފާނު ނުވާނޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.