ހަފްތާ 14ގައި ހިމެނޭ ހުރިހާ ވަޢުދެއް ކަނޑައަޅާފައިވާ ތާރީޚަށް ނިމޭނޭ: ރައީސް

ސަރުކާރުގެ ހަފްތާ 14 އެޖެންޑާގައި ހިމެނޭ މަސައްކަތްތައް، ކަނޑައަޅާފައިވާ ތާރީހަށް ނިންމޭނޭކަމުގެ ފުރިހަމަ ޔަގީންކަން އެބައޮތްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އައްޑޫ ސިޓީ ފޭދޫ އަދި ހިތަދޫ ރައްޔިތުންނާއި ބައްދަލުކުރައްވާ ސަރުކާރުން ކުރިއަށްގެންދަވާ މަސައްކަތްތަކާއި ގުޅޭގޮތުން ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ ހަފްތާ 14 މަގުޗާޓުގައި ހިމެނޭ މަސައްކަތްތަކަކީ ސަރުކާރުން ވަރަށް ފަރުވާތެރިކަމާއެކު ކުރިއަށްގެންދަވާ މަސައްކަތެއްކަމަށެވެ. އަދި ސަރުކާރުގެ ވުޒާރާތަކާއި އިދާރާތަކުން މި މަސައްކަތްތައް ފުރިހަމަކުރުމުގެ ޢަމާޒަށް ވަރަށް ރަނގަޅަށް ވާސިލުވަމުންދާކަމަށްވެސް އެމަނިކުފާނު ވިދާޅުވިއެވެ. ހިނގަމުންދާ ފެބްރުއަރީމަހަށް ގިނަ ސުންގަޑިތަކެއް ކަނޑައަޅާފައިވާ ސަރުކާރުގެ ހަފްތާ 14 މަގުޗާޓުގައި 161 ވަޢުދެއް ހިމެނެއެވެ. މީގެތެރޭގައި ޢުމްރާނީ މަސައްކަތްތަކާއި ސިޔާސަތުތައް އެކުލަވާލުމާއި ގުޅުންހުރި މަސައްކަތްތައް ހިމެނެއެވެ.

"ހަފްތާ 14 އެޖެންޑާގެ މަސައްކަތްތައް 100 އިންސައްތަ ނިމޭނެކަމުގެ ޔަގީންކަން އެބައޮތް. ސަރުކާރުގެ އިދާރާތަކުން ވަރަށް ރަނގަޅު ޕަރފޯމަންސްއެއް ދައްކަމުން ދަނީ. މީގެ މުހިންމު ގިނަ މަސައްކަތްތަކެއް ވަނީ ނިމިފައި." ރައީސުލްޖުމްހޫރިއްޔާ ވިދާޅުވިއެވެ.

އައްޑޫގެ ތަރައްގީގެ މަސައްކަތްތަކާއި ގުޅޭގޮތުން ރައީސުލްޖުމްހޫރިއްޔާ ވިދާޅުވީ، އައްޑޫގައި ހިއްކާފައިވާ 50 ހެކްޓަރުގެ ބިމުގައި މީހުން އާބާދުވުމަށް ބޭނުންވާ ޚިދުމަތްތައް ޤާއިމުކުރުމުގެ މަސައްކަތް ލަސްނުކޮށް ފައްޓަވާނެކަމަށެވެ. އަދި އެތަނުގައި ބޯހިޔާވަހިކަމަށް ބޭނުންވާ މަޝްރޫޢޫތައްވެސް ހިންގަވައިދެއްވާނެކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ އައްޑޫ އިންޓަނޭޝަނަލް އެއަރޕޯޓާއި ހަނިމާދޫ އެއަރޕޯޓް، ވެލާނާ އެއަރޕޯޓް އަދި މިނޫންވެސް ހިންގަމުންދާ މަޝްރޫޢުތައް އަވަސްކުރުމަށް ކުރަންޖެހޭ މަސައްކަތްތައްވެސް ސަރުކާރުން ކުރައްވަމުންދާކަމަށެވެ.

ރާއްޖޭގެ ޚާއްސަ އިޤްތިޞާދީ ސަރަޙައްދު ނުވަތަ އެސްއީޒެޑުގެ ޤާނޫނުގެ އެކުލަވާލުމުގެ މަސައްކަތް ކުރިއަށްދާކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ ރާއްޖޭގައި 110 މެގަވޮޓްގެ ހަކަތަ އުފެއްދޭ މަޝްރޫޢުއެއްގެ ޕްރޮޕޯސަލްއެއް މިހާރުވެސް ލިބިފައިވާކަމަށެވެ. އަދި މިފަދަ އެތައް މަޝްރޫޢެއްގެ މަސައްކަތް އެކުއެކީގައި ފަށައިގެން މިހާރުވެސް ކުރިއަށްދާކަމަށް ރައީސުލްޖުމްހުރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މަޝްރޫޢުތައް ހިންގަން ސަރުކާރުން ނަގާ ލޯނުތައްވެސް ވެގެންދާނީ ރައްޔިތުންނަށް ބުރަޔަކަށް ނުވާނެގޮތަަށް ނަގާ ލޯނުތަކަކަށްވެސް ރައީސުލްޖުމްހުރިއްޔާ ވިދާޅުވިއެވެ. އަދި ބޮޑެތި މަޝްރޫއުތައް ހިންގުމުގައި ދިވެހި ކުންފުނިތަކުގެ ބައިވެރިވުން އިތުކުރައްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.