ފުވައްމުލައް ސިޓީގެ 50 މަގެއް ތަރައްޤީކުރުމުގެ މަސައްކަތް ފަށައިފި
-
ތަރައްޤީކުރާ މަގުގެ ސަރަހައްދުގެ 12.7 ކިލޯމީޓަރަށް އަރާނެ
-
މިއީ ރަށުގެ މަގު ހެދުމަށް ކުރިއަށްގެންދާ މަޝްރޫޢުގެ ދެވަނަ ފިޔަވަހި
-
މަސައްކަތް ހަވާލުކޮށްފައިވަނީ އެމްޓީސީސީއާ
ފުވައްމުލައް ސިޓީގެ މަގު ހެދުމުގެ ދެވަނަ ފިޔަވަހީގެ ޢަމަލީ މަސައްކަތް ރަޢީސުލްޖުމްހޫރިއްޔާ ޑރ.މުޙައްމަދު މުޢިއްޒު އިފްތިތާޙުކޮށްދެއްވައިފިއެވެ.
މި މަސައްކަތް އިފްތިތާޙުކޮށްދެއްވީ ރައީސުލްޖުމްހޫރިއްޔާ ރާއްޖޭގެ ދެކުނަށް ފައްޓަވާފައިވާ ދަތުރުފުޅުގެ ތެރެއިން، މިއަދު ފުވައްމުލައް ސިޓީއަށް ވަޑައިގެން އެރަށުގައި ބޭއްވި ހާއްސަ ރަސްމިއްޔާތެއްގައެވެ.
ފުވައްމުލައް ސިޓީޣެ މަގުހެދުމުގެ ދެވަނަ ފިޔަވަހީގެ ޢަމަލީ މަސައްކަތް ފައްޓަވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އިތުރުން އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބާއި ފުވައްމުލައް ސިޓީގެ މޭޔަރ އިސްމާޢީލް ރަފީޤް އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީގެ ސީއީއޯ ޢަބްދުﷲ ޒިޔާދުއެވެ.
އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން ފުވައްމުލައް ސިޓީގެ 50 މަގެއް ތާރު އަޅައިގެން ތަރައްޤީކުރާނެއެވެ. އެއީ ގާތްގަނޑަކަށް 12.7 ކިލޯމީޓަރުގެ ސަރަހައްދެއްކަމަށް އެމްޓީސީސީން ބުނެއެވެ.
ފުވައްމުލަކަށް ދިމާވާ އެންމެ ބޮޑު އެއް މަސައްލައަކީ ވިއްސާރަ ދުވަސްވަރު މަގުގައި ފެން ބޮޑުވެ ފެން ނުހިނދުމުގެ މައްސަލައެވެ. އެތައް ދުވަހަކުން ފެންގަނޑު ހިނދޭއިރު މަގުތައް ވަރަށް ބޮޑަށް ޗަކަވެ ބޭނުންކުރުމަށްވެސް ދަތިވެއެވެ. އެހެންކަމުން މަގު ހެދުމުގެ މަސައްކަތުގެ ތެރޭގައި ފެން ހިންދާ ނިޒާމުވެސް ޤާއިމްކުރާނެކަމަށް އެމްޓީސީސީން ބުނެއެވެ.
ފުވައްމުލައް ސިޓީގެ މަގު ހެދުމަށް ކުރިއަށްގެންދާ 225 މިލިއަން ރުފިޔާގެ މަޝްރޫޢު ސަރުކާރުން އެމްޓީސީސީއާ ހަވާލުކޮށްފައިވަނީ ދެ އަހަރު ދުވަހުގެ ތެރޭގައި ނިންމާގޮތަށެވެ.
މި ޕްރޮޖެކްޓަކީ ސިޓީތަކުގެ މަގުތައް ހެދުމަށް ސަރުކާރުން ވެޑައިގެންފައިވާ ވަޢުދުގެ ދަށުން، ސިޓީއެއްގައި ފަށާ ފުރަތަމަ މަޝްރޫޢުއެވެ.
ފުވައްމުލައް ސިޓީގެ މަގު ހެދުމުގެ ދެވަނަ ފިޔަވަހީގެ ޢަމަލީ މަސައްކަތް ފަށާފައިވާއިރު، މި މަސައްކަތުގެ ފުރަަތަމަ ފިޔަވަހީގެ މަސައްކަތް 2022 ވަނަ އަހަރު ވަނީ ނިންމާލާފައެވެ.