އޭޝިއަން ކަޕް ކޮލިފައިންގ ޕްލޭއޮފްގައި ދިވެހިރާއްޖެ ޔަމަންއާ ބައްދަލުކުރާ އަވޭ މެޗް ޤަތަރަށް ބަދަލުކޮށްފިކަމަށް އެފްއޭއެމްއިން ބުނެފިއެވެ.
އެފްއޭއެމްގެ ނޯމަލައިޒޭޝަން ކޮމެޓީގެ ޗެއަރމަން ބައްސާމް އަދީލް ޖަލީލް ވިދާޅުވީ ޔަމަންގެ މަޝްރަހު މިހާރު ހުރި ގޮތުން އަވޭ މެޗު ރާއްޖެއަށް ބަދަލު ކުރުމަށް އޭއެފްސީއަށް ސީޓީ ފޮނުވާފައިވަނިކޮށް، އެމެޗް ޤަޠަރަށް ބަދަލުކުރިކަން އޭއެފްސީން އަންގާފައިވާކަމަށެވެ.
އޭޝިޔާ ސަރަޙައްދުން ވަރލްޑް ކަޕް ކޮލިފައިންގެ އެންމެ ފުލަށް ނުގޮސް ސަލާމަތްވާ ކޮންމެ ޓީމަކަށް އޭޝިޔަން ކަޕް ކޮލިފައިންގ ޕްލޭއޮފް ކުޅުމުގެ ފުރުޞަތު ލިބެއެވެ. ދިވެހި ރާއްޖެއަށް މިފަހަރު އޭޝިޔަން ކަޕް ކޮލިފައިންގ ޕްލޭއޮފް ކުޅުމުގެ ފުރުޞަތު ލިބިފައި މިވަނީ ވަރލްޑް ކަޕް ކޮލިފިކޭޝަން ގްރޫޕް ސީގެ ހަތަރުވަނަ ލިބުމުންނެވެ. މި ގްރޫޕްގެ އެންމެ ފުލުގައި އޮތީ އެއްވެސް ޕޮއިންޓެއް ނުލިބި ބޫޓާންއެވެ. ދިވެހިރާއްޖެ އޮތީ 6 ޕޮއިންޓާއެކު 4 ވަނާގައެވެ. ބައްސާމް ވިދާޅުވީ ގަތަރުގައި އަވޭ މެޗް ކުޅުމަށް ހަމަޖެހުމުން، ރާއްޖެއަށްވެސް ފައިދާ ކުރާނެކަމަށެވެ.
"ޔަމަންއަކީ ވަރަށް އުސްގައުމެއް، އެހެންކަމުން އެކަމުގެ އުނދަގޫތަކެއް ރާއްޖެއަށް ހުންނާނެ. ނަމަވެސް އެމެޗު ގަތަރަށް ބަދަލުވުމުން ރާއްޖެއަށް ފަސޭހަވެގެންދާނެ. އެއީ ގަތަރަކީ ރާއްޖެއާ އެއްކަހަލަ މޫސުމެއް އޮންނަ ތަނެއް. އެފްއޭއެމްއިން އެދުނު ގޮތަށް ރާއްޖޭގައި ކުޅުމަށް ދެ މެޗުވެސް ހަމަޖެހުނުނަމަ، ރާއްޖޭގެ ޓީމަށް ވަރަށް ބަޑަށް ފައިދާ ކުރީސް" ބައްސާމް ވިދާޅުވިއެވެ.
img:http://s2.psmnews.mv/images/660x400/14613067236743.jpg|ގައުމީ ފުޓްބޯޅަ ޓީމް (ފޮޓޯ:ޕީއެސްއެމް ވަހީދު)
އޭޝިޔަން ކަޕް ކޮލިފައިންގެ ފުރަތަމަ ލެގުގައި ޔަމަނާ ދެކޮޅަށް ދިވެހި ރާއްޖެ ނިކުންނާނީ އަންނަ ޖޫން މަހުގެ ދެވަނަ ދުވަހު ދިވެހިރާއްޖޭގައެވެ. އަދި ދެވަނަ ލެގުގެ މެޗް އޮންނާނީ ޖޫން ހަތްވަނަ ދުވަހު ގަޠަރުގައެވެ. ޕްލޭ އޮފްގައި ސަރކް ސަރަހައްދުގައި ހިމެނޭ އިންޑިޔާ ވާދަކުރަން ޖެހެނީ ލާއޯސްއާއެވެ، އަދި ބަނގްލަދޭޝް ވާދަކުރަން ޖެހެނީ ތަޖިކިސްތާނާއެވެ.