ކުއްޖަކު ގެއްލިގެން ރިޕޯޓުކޮށްފިނަމަ އެކްސްޕްލޮއިޓޭޝަންގެ ތަޙުޤީޤެއް ފުލުހުން ހިންގަންޖެހޭގޮތަށް އިރުޝާދެއް

ކުޑަ ކުއްޖަކު ގެއަށް ނައިސްގެން ނުވަތަ ގެއްލިގެން ރިޕޯޓުކޮށްފިނަމަ އެކްސްޕްލޮއިޓޭޝަންގެ ތަޙްޤީޤެއް ފުލުހުން ހިންގަންޖެހޭ ގޮތަށް އިރުޝާދެއް ޕްރޮސިކިއުޓަރ ޖެނެރަލް އޮފީހުން ނެރުއްވައިފިއެވެ.

މި އިރުޝާދަކީ ކުޑަކުދިންގެ ބޭނުން ނަހަމަގޮތުގައި ހިފުމުގެ ކުށް ނުވަތަ އެކްސްޕްލޮއިޓްކުރުމުގެ ކުށުގެ މައްސަލަތައް ބަލައި ދަޢުވާކުރާނެ ގޮތާބެހޭގޮތުން ޕީޖީ އޮފީހުން ނެރުއްވާފައިވާ އިރުޝާދެކެވެ.

ޕްރޮސިކިއުޓަރ ޖެނެރަލްގެ އޮފީހުން ވިދާޅުވީ ކުޑަކުދިންގެ ބޭނުން ނަހަމަ ގޮތުގައި ހިފުމުގެ ބާވަތްތަކުގެ ކުށްތަކަކީ ތަޙްޤީޤުކުރުމާއި ދައުވާކުރުމުގައި ގޮންޖެހުންތަކަކާ ދިމާވާ ބާވަތްތަކެއްގެ ކުށްތަކެއް ކަމަށެވެ. އަދި މިފަދަ އިރުޝާދެއް ނެރުމުގެ މައިގަނޑު މަޤުސަދަކީ ޖިނާއީ ޢަދުލުގެ ނިޒާމުގައި ޙަރަކާތްތެރިވާ ހުރިހާ އިދާރާތަކުން މިފަދަ ކުށްތައް ތަޙްޤީޤުކުރުމާއި ދަޢުވާކުރުމުގައި އެއްގޮތަކަށް ޢަމަލުކުރާކަން ކަށަވަރުކުރުންކަމަށް ޕީޖީ އޮފީހުން ވިދާޅުވިއެވެ.

ޕީޖީ އޮފީހުން ވިދާޅުވީ، މި އިރުޝާދުގެ ސަބަބުން ކުޑަކުދިންނާ ދެކޮޅަށް ކުރެވޭ އަދި ކުޑަކުދިން ގްރޫމް ކޮށްގެންނާއި ރެކްރޫޓުކޮށްގެން އެކުދިން ލައްވާ ކުށްކުރުވާ މީހުންގެ މައްސަލަތައް ރާއްޖޭގެ ހުރިހާ ދިމާއެއްގައި މިހާރަށްވުރެ ހަރުދަނާ ގޮތެއްގައި ބަލައި ފިޔަވަޅު އެޅުމަށް މަގުފަހިވާނެ ކަމަށެވެ.

މި އިރުޝާދަކީ ޕްރޮސިކިއުޓަރ ޖެނެރަލްގެ ޤާނޫނުގެ 15 ވަނަ މާއްދާގެ ދަށުން ޖިނާއީ ކުށެއްކަމަށް ތުހުމަތުކުރެވޭ ޢަމަލުތަކާ ގުޅިގެން ބަލާ ބެލުންތަކާއި ހިންގާ ތަޙްޤީޤުތައް ބަލައި އެކަންކަން ހިނގަނީ ޤާނޫނާ އެއްގޮތަށްތޯ ބެލުމަށް އޮތް މަސްއޫލިއްޔަތުގެ ދަށުން ނެރެފައިވާ އިރުޝާދެއްކަމަށް ޕީޖީ އޮފީހުން ވިދާޅުވެއެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގައި ކުޑަކުދިން އެކްސްޕްލޮއިޓްކުރުމުގެ ކުށު ގައި، ތަފާތު އެކިއެކި ކުށް ކުރުމަށްޓަކައި ކުޑަކުދިން ރެކްރޫޓްކޮށް، ނުވަތަ އެނޫން ގޮތަކަށްވެސް ބޭނުންކުރުމަކީ، އޭގެ ޒާތުގައި ކުށެއްކަމަށް ބަޔާންކޮށްފައިވެއެވެ.