ބެޑްމިންޓަން އެސޯސިއޭޝަންގެ އަހަރީ އާންމު ޖަލްސާއާއި، ހިންގާ ކޮމެޓީ އިންތިޙާބް ކުރުން މިމަހުގެ 10ވަނަ ދުވަހު ބޭއްވުމަށް ތާވަލްކޮށްފިއެވެ.
މިއީ އިންތިޚާބާއި، އަހަރީ ޢާންމުޖަލްސާ ބާއްވަން ތާވަލްކުރި ހަތަރުވަނަ ފަހަރުއެވެ. ކުލަބް އަދި ޑެވެލޮޕްމަންޓް ކޮމެޓީ ތަކުގެ ފަރާތުން މިޖަލްސާގައި ބައިވެރިވާ ކުލަބް އަދި ޑެވެލޮޕްމަންޓް ކޮމެޓީ ތަމްސީލްކޮށް ވޯޓް ދެއްވާނެ ފަރާތެއްގެ މަޢުލުމާތު ހިންގާ ގަވާއިދުގައިވާ ގޮތުގެ މަތީން ޖަލްސާ ބޭއްވުމުގެ 48ގަޑިއިރު ކުރިން ބެޑްމިންޓަން އެސޯސިއޭޝަނަށް ލިޔުމަކުން އަންގަންވާނެކަމަށް އެސޯސިއޭޝަންއިން ނެރެފައިވާ ޢިޢުލާންގައި ބުނެފައިވެއެވެ. މިމަހުގެ ދިހަވަނަ ދުވަހު ބޭއްވުމަށް ހަމަޖެހިފައިވާ ޖަލްސާ އޮންނާނީ އެދުވަހު ހެނދުނު ދިހައެއް ޖަހާއިރު ހެންވޭރު ބޯޅަގެ ސެމިނާރރޫމްގައެވެ.
ބެޑްމިންޓަން އެސޯސިއޭޝަންގެ ރައީސް ކަމަށް ވާދަކުރައްވަނީ އެސޯސިއޭޝަންގެ މިހާރުގެ ރައީސް މޫސާ ނާޝިދާއި، ކޯޗު ހަސަން ރިޔާޒުއެވެ. އެސޯސިއޭޝަންގެ ނައިބް ރައީސް ކަމަށް ކުރިމަތިލާފައި ވަނީ އަޙްމަދު ޝާކިރުއާއި މަމްދޫން ރަޝީދުއެވެ. ހަޒާންދާރުގެ މަގާމަށް ކުރިމަތިލާފައިވަނީ މުޙައްމަދު ސައީދުއާއި މޫސާ ރަމީޒްއެވެ.