ނަފްސާނީގޮތުން ދޭ އަނިޔާތަކުގެ މައްސަލަތައް ދަނީ އިތުރުވަމުން: އެފްޕީއޭ

ނަފްސާނީގޮތުން ދޭ އަނިޔާތަކުގެ މައްސަލަތައް އިތުރުވަމުންދާ ކަމަށް ފެލިމީ ޕްރޮޓެކްޝަން އޮތޯރިޓީ، އެފްޕީއޭއިން ހާމަކޮށްފިއެވެ.

ވޭތުވެދިޔަ 6 މަސްދުވަހު ޢާއިލީ ތަރައްޤީއާ ބެހޭ ވުޒާރާއިންކުރައްވާފައިވާ މަސައްކަތްތަކުގެ މައުލޫމާތު ނޫސްވެރިންނާއި ހިއްސާކުރެއްވުމަށް ބޭއްވެވި ބައްދަލުވުމުގައި ފެލިމީ ޕްރޮޓެކްޝަން އޮތޯރިޓީގެ ސީއީއޯ އައިމިނަތު ޝިރާނީ ނައީމު ވިދާޅުވީ އަހަރުގެ މިހާތަނަށް ގެވެށި އަނިޔާގެ 278 މައްސަލަ ރިޕޯޓުކޮށްފައިވާ ކަމަށެވެ.

ސީއީއޯ ޝިރާނީ ވިދާޅުވީ މީގެތެރޭގައި ހިމެނެނީ އަންހެނުން ޝާމިލުވާ 194 މައްސަލަ އާއި ފިރިހެނުންނަށް ގެވެށި އަނިޔާ ލިބިގެން ހުށަހަޅާފައިވާ 84 މައްސަލަ ކަމަށެވެ.

ޒާތީ ގުޅުންތަކުގެ މައްސަލަތަކުގެ ތެރެއިން ދެވޭ އަނިޔާތަކުގެ ތެރޭގައި ނަފްސާނީ އަނިޔާތަކުގެ މައްސަލަތައް އިތުރުވަމުންދާ ކަމަށާއި އެފަދަ 162 މައްސަލައެއް ރިޕޯޓުކޮށްފައިވާ ކަމަށް ޝިރާނީ ވިދާޅުވިއެވެ.

"ޒާތީ ގުޅުންތަކަށް ހުރި މައްސަލަތަށް، އޭގެތެރެއިން ކައިވެނިކޮށްގެން ނުވަތަ އިނދެވަރިކޮށްފައިވާ މައްސަލަތަކުގެތެރެއިން 123 މައްސަލަ އެބައުޅޭ، މައިންބަފައިން ނުވަތަ ބަލަދުވެރިންގެ ފަރާތުން 92 މައްސަލައެއް، އެންމެ ގިނައިން ކުރިއާ ޚިލާފަށް ފާހަގަކުރެވެނީ ނަފްސާނީ ގޮތުން އަދި އަނގަބަހުން ކުރާ އަނިޔާ އިތުރުވަމުންދާ ކަމަށް، އެގޮތުން 162 މައްސަލައެއް ފާހަގަކުރެވިފައިވޭ،" ޝިރާނީ ވިދާޅުވިއެވެ.

ޝިރާނީ ވިދާޅުވީ ސައިބާ ކްރައިމްސް ހިމެނޭ މައްސަލަތައްވެސް އިތުރުވަމުންދާކަން ފާހަގަކުރެވިފައިވާކަމަށެވެ. އެގޮތުން ބްލެކްމެއިލް ކުރުންފަދަ ކަންތައްތައް އިތުރުވަމުންދާކަމަށެވެ.
މީގެއިތުރުން ބެލެނިވެރިންނަށް ކުދިންގެ ފަރާތުން މާލީގޮތުން އެކި ކަހަލަ އަނިޔާތައް ދެމުންދާކަމަށް ޝިރާނީ ވިދާޅުވިއެވެ.

"ބެލެނިވެރިންނަށް ބޮޑެތި ކުދިންގެ ފަރާތުން މާލީގޮތުން އެކި ކަހަލަ އަނިޔާ ދެމުންދާކަން ފާހަގަކުރެވޭ، އެގޮތުން އުމުރުން ދުވަސްވީ މީހުންނަށް ދޭ އެލަވަންސް ހިފެހެއްޓުމާއި ބޭނުންކުރުން ހިމެނޭ،" ޝިރާނީ ވިދާޅުވިއެވެ.

މިފަދަ މައްސަލަތަކުގައި ފާހަގަކުރެވެނީ މަސްތުވާތަކެތި ބޭނުންކުރާ ފަރާތްތައްކަމަށް ޝިރާނީ ވިދާޅުވިއެވެ. މުޖުތަމަޢުގައި ހިނގާ ގެވެށި އަނިޔާގެ މައްސަލަތައް ހުއްޓުވުމަށް ގިނަ މަސައްކަތްތަކެއް ފެމިލީ ޕްރޮޓެކްޝަން އޮތޯރިޓީން އަންނަނީ ކުރައްވަމުންނެވެ. އެގޮތުން ގެވެށި އަނިޔާގެ ޢަމަލުތައް ހިންގާ މީހުން ރީހެބިލިޓޭޓްކުރުމާއި އެފަދަ ފަރާތްތަކާމެދު ޤާނޫނީ ފިޔަވަޅު އެޅުމަށް ކޯޓުތަކަށް މައްސަލަތައް ފޮނުވުން ހިމެނެއެވެ. އަދި ގެވެށި އަނިޔާގެ ޝިކާރައަކަށްވާ މީހުންގެ ތެރެއިން ޤާނޫނީ ވަކީލެއްގެ އެހީތެރިކަން ހަމަނުޖެއްސޭ ފަރާތްތަކަށް ޤާނޫނީ ވަކީލުން ހަމަޖައްސައިދިނުމުގެ ޚިދުމަތްވެސް ފެމިލީ ޕްރޮޓެކްޝަން އޮތޯރިޓީންވަނީ ފަށާފައެވެ.