ދުނިޔޭގެ ޞިއްޙަތު ޖަމްޢިއްޔާގެ މެންބަރުކަން ފަލަސްޠީނަށް
-
ވޯޓުލުން ފިޔަވާ، އެހެން ގައުމުތަކަށް ލިބޭ ހުރިހާ ޙައްޤެއް ފަލަސްޠީނަށްވެސް ލިބޭނެ
-
ވޯލްޑް ހެލްތު އެސެމްބްލީގައި ރާއްޖޭން ވަނީ ވަރަށް ބޮޑަށް ވަކާލާތުކޮށްފައި
-
ލާއިންސާނީ އަމަލުތައް ރާއްޖެއިން ވަނީ ކުށްވެރިކޮށްފައި
ދުނިޔޭގެ ޞިއްޙަތު ޖަމްޢިއްޔާގެ މެންބަރުކަން ފަލަސްޠީނަށް ލިބިއްޖެއެވެ.
ވޯލްޑް ހެލްތު އެސެމްބްލީގައި ނިންމި މި ތާރީޚީ ނިންމުމާއެކު، ވޯޓުލުން ފިޔަވާ، އެހެން ގައުމުތަކަށް ލިބޭ ހުރިހާ ޙައްޤެއް ފަލަސްޠީނަށްވެސް ދުނިޔޭގެ ޞިއްޙަތު ޖަމްޢިއްޔާގައި ލިބިގެންދާނެއެވެ. ދުނިޔޭގެ ސިއްޙަތު ޖަމުޢިއްޔާގެ މެންބަރުކަން ފަލަސްޠީނަށް ލިބުނީ ރާއްޖޭގެވެސް ވޯޓާއެކުއެވެ.
މިކަމާއި ގުޅޭގޮތުން ސިއްޙީ ވަޒީރު ޑރ.ޢަބްދުﷲ ޚަލީލު އެކްސްގައި ކުރެއްވި ޕޯސްޓެއްގައި ވިދާޅުވީ ފަލަސްޠީނުގެ ރައްޔިތުންނަށް ލިބެންޖެހޭ ޙައްޤުތައް ކަށަވަރު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ފުރިހަމަ ލަފާފުޅާއެކު އިސްލާމީ ޤައުމުތަކާއެކު ވާރލްޑް ހެލްތު އެސެމްބްލީގައި ރާއްޖޭން ވަރަށް ބޮޑަށް ވަކާލާތުކޮށްފައިވާނެ ކަމަށެވެ.
ސްވިޓްޒަރލޭންޑުގެ ޖެނީވާގައި ބޭއްވި މިއަހަރުގެ ވޯލްޑު ހެލްތު އެންސެމްބުލީގައި ރާއްޖޭގެ ފަރާތުން ސިއްޙީ ވަޒީރު ޑރ.ޢަބްދުﷲ ޚަލީލު ބައިވެރިވެވަޑައިގެންފައެވެ.
މިއަދުންފެށިގެން ދުނިޔޭގެ ޞިއްޙަތު ޖަމްޢިއްޔާގެ މެންބަރުކަން ފަލަސްޠީނަށްވަނީ ލިބިފައި. ވާރލްޑް ހެލްތު އެސެމްބްލީގައި ނިންމި މި ތާރީޚީ ނިނިންމުމާއެކު، ވޯޓުލުން ފިޔަވާ، އެހެން ގައުމުތަކަށް ލިބިގެންވާ ހުރިހާ ޙައްޤެއް ފަލަސްޠީނަށްވެސް ދުނިޔޭގެ ޞިއްޙަތު ޖަމްޢިއްޔާގައި ލިބިގެންދާނެ.… pic.twitter.com/gq5slTn97x
— Abdulla Khaleel (@abkhaleel) June 1, 2024
މި އެސެމްބްލީގައި ތަޤްރީރުކުރައްވަމުން ސިއްޙީ ވަޒީރު ޑރ. ޢަބްދުﷲ ޚަލީލުވަނީ ދިވެހިން އަބަދުވެސް ތިބޭނީ ފަލަސްޠީނުގެ ރައްޔިތުންނާއި އެކުގައިކަމަށް ވިދާޅުވެފައެވެ. އަދި މިހާރު އެޤައުމުގެ ރައްޔިތުންނާއި ދެކޮޅަށް ހިނގަމުންދާ ލާއިންސާނީ އަމަލުތައް ރާއްޖެއިން ވަނީ ކުށްވެރިކޮށްފައެވެ.
ޑރ. ޚަލީލު ވަނީ އިންޓަރނޭޝަނަލް ހިއުމަނިޓޭރިއަން ލޯ އާއި ޚިލާފަށް އެތައް ކަމެއް ފަލަސްތީނާއި ދެކޮޅަށް ހިނގަމުންދާކަން ފާހަގަކުރައްވާފައެވެ. އެގޮތުން ސިއްޙީ ޚިދުމަތްދޭ ތަންތަނަށް އަމާޒުކޮށް ހަމަލާދެމުންދާ ކަމަށާއި، މިފަދަ އަމަލުތައް ހުއްޓުވަން ޖެހޭކަމަށް ވަޒީރު ވިދާޅުވިއެވެ.
އަދި ވޯލްޑު ހެލްތު އޯގަނައިޒޭޝަން ނުވަތަ ދުނިޔޭގެ ސިއްޙަތު ޖަމުޢިއްޔާއިން ފަލަސްތީނަށް ދެމުންދާ އެހީ އިތުރުކޮށް، ސިއްހީ ޚިދުމަތްދޭ ފަރާތްތަކާއި ތަންތަނަށް ލިބެން ޖެހޭ ރައްކާތެރިކަން ކަށަވަރުކުރުމަށް މަސައްކަތްކުރުމަށް ވަޒީރު ގޮވާލެއްވިއެވެ.
ހައްދުފަހަނަ އަޅާފައިވާ ޔަހޫދީ އިސްރާޢީލުގެ ޢަމަލުތައް ކުށްވެރިކޮށް ޑރ. ޚަލީލުވަނީ ޤާނޫނުތަކާއި ގަވާއިދުތަކަށް ބޯލަނބައި، ފަލަސްތީނަށް އެހީދޭން ތައްޔާރަށް ތިބި ފަރާތްތަކަށް އެ ފުރުސަތު ދިނުމަށްވެސް ގޮވާލައްވާފައެވެ.
ވޯލްޑް ހެލްތު އެސެމްބްލީގައި ފަލަސްތީނާއި ގުޅޭގޮތުން ނެގި ވޯޓުގައި ރާއްޖެއިންވަނީ ބައިވެރިވެފައެވެ. އެގޮތުން ރާއްޖެއިން ވަނީ އެޤައުމުގެ ސިއްޙީ ހާލަތު ރަނގަޅު ކުރުމަށް ވޯޓު ދީފައެވެ.
77ވަނަ ވޯލްޑް ހެލްތު އެސެމްބްލީ ކުރިއަށް ދިޔައީ ސުވިޓްޒަލޭންޑުގެ ޖެނީވާގައެވެ. 192 ޤައުމެއްގެ ހެލްތު މިނިސްޓަރުން ބައިވެރިވެވަޑައިގެންނެވި މި އެސްމްބްލީގެ މިއަހަރުގެ ޝިއާރަކީ "އޯލް ފޯ ހެލްތު، ހެލްތު ފޯ އޯލް' އެވެ. އެގޮތުން ދުނިޔެއަށް ކުރިމަތިވެފައިވާ ސިއްހީ ގޮންޖެހުންތަކާއި ކުރިމަގުގައި އިސްކަންދޭނެ ދާއިރާތަކާއި ގުޅޭގޮތުން މި ބައްދަލުވުމުގައި ފުޅާ ދާއިރާއެއްގައި ވަނީ މަޝްވަރާކޮށްފައެވެ.