އެމްޓީސީސީގެ ޚާއްސަގޮތުން ކުރާ އާންމު ޖަލްސާ މިމަހުގެ 11ވަނަ ދުވަހު

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީގެ ޚާއްސަގޮތުން ކުރާ އާންމު ޖަލްސާ މިމަހުގެ 11 ވަނަ ދުވަހު ބޭއްވުމަށް ނިންމައިފިއެވެ. އެ ޖަލްސާ ބޭއްވުމަށް ހަމަޖެހިފައިވަނީ މޯލްޑިވްސް ސެކިއުރިޓީޒް ޑިޕޮސިޓަރީ ގެ އޮންލައިން ވެބް އެޕްލިކޭޝަން ފަހިވޯޓް މެދުވެރިކޮށެވެ.

އެމްޓީސީސީން ބުނީ، މިދިޔަމަހުގެ 23 ވަނަ ދުވަހުގެ ކުރިން ހިއްސާދާރުންގެގޮތުގައި އެ ކުންފުނީގައި ރަޖިސްޓްރީކޮށްފައިވާ ފަރާތްތަކަށް މި ޖަލްސާގައި ބައިވެރިވެވޭނެކަމަށެވެ.

މިޖަލްސާގައި ކުންފުނީގެ އަސާސީ އަދި ހިންގާ ޤަވާއިދަށް ހުށަހަޅާފައިވާ އިސްލާޙުތައް ފާސްކުރަން ހުށަހެޅުމަށް ކުންފުނީގެ ޑިރެކްޓަރުންގެ ބޯޑުން ވަނީ ނިންމާފައެވެ.

މިދިޔަ އަހަރު ބޭއްވި، 2022 ވަނަ އަހަރުގެ އަހަރީ ޢާންމު ޖަލްސާގައި ހިއްސާގެ ފައިދާގެ ގޮތުގައި، މޫނުމަތީ އަގު 5 ރުފިޔާގެ ހިއްސާއަކަށް 4 ރުފިޔާ ބެހުމަށް ޑިރެކްޓަރުންގެ ބޯޑުން ވަނީ ފާސްކޮށްފައެވެ. ނަމަވެސް އެއަހަރުގެ އަހަރީ ޢާންމު ޖަލްސާއަށް އެ ހުށައެޅުން ހުށަހެޅުމަށްފަހު، ހިއްސާދާރުންގެ ވޯޓުން އެއައިޓަމް ފާސްނުވާކަމަށް ކަނޑައެޅިއެވެ. ކުންފުނީގެ މިހާރުގެ މެނޭޖްމަންޓުންވަނީ، 2022 ވަނަ އަހަރުގެ ޙިއްޞާގެ ފައިދާއާބެހޭ ގޮތުން މަޝްވަރާކޮށް، ޑިރެކްޓަރުންގެ ބޯޑުގެ ނިންމެވުމުގެ މަތިން، މި އަހަރު ބާއްވާ ޚާއްޞަ ޢާންމު ޖަލްސާއަށް 2022 ވަނަ އަހަރުގެ ހިއްސާގެ ފައިދާގެ ގޮތުގައި މޫނުމަތީ އަގު 5 ރުފިޔާގެ ޙިއްޞާއަކަށް 4 ރުފިޔާ ބެހުމަށް އަލުން ހުށަހެޅުމަށް ނިންމާފައެވެ.

ޖަލްސާގައި ބައިވެރިވުމަށް ހިއްސާދާރުން ޖޫން 9ގެ ކުރިން ރަޖިސްޓްރީކުރަން ޖެހޭނެއެވެ.

މިޖަލްސާގައި ބައިވެރިވުމަށް ބޭނުންވާ ހިއްސާދާރުން މޯލްޑިވްސް ސެކިއުރިޓީޒް ޑިޕޮސިޓަރީގެ އިންފިނިޓީ ޕޯރޓަލް މެދުވެރިކޮށް، ނުވަތަ އެޕްލިކޭޝަން ފޯމު އީމެއިލް ކޮށްގެންވެސް ރަޖިސްޓަރ ކުރެވިދާނެކަމަށް އެމްޓީސީސީން ބުންޏެވެ.