ވަޒީފާގެ ބާޒާރަށް ބޭނުންވާ ފަންނުވެރިކަމާއި ހުނަރު ދެނެގަތުމަށް ސާވޭއެއް

ދިވެހިރާއްޖޭގެ ވަޒީފާގެ ބާޒާރަށް ބޭނުންވާ ފަންނުވެރިކަމާއި ހުނަރު ދެނެގަތުމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ޚާއްސަ ސާވޭއެއް ފަށައިފިއެވެ.

ނޭޝަނަލް ހިއުމަން ކެޕިޓަލް ނީޑްސް އެސެސްމެންޓް ސާވޭ އަށް މައުލޫމާތު އެއްކުރުމުގެ މަސައްކަތް މިހާރު ފަށާފައިވާއިރު، މިއީ ވޯލްޑު ބޭންކުގެ "ސަސްޓެއިނަބަލް އެންޑް އިންޓަގްރޭޓެޑް ލޭބަރ ސަރވިސަސް"، ސެއިލްސްގެ ދަށުން ކުރިއަށްގެންދާ ސާވޭއެކެވެ.

މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ވިދާޅުވީ ނޭޝަނަލް ހިއުމަން ކެޕިޓަލް ނީޑްސް އެސެސްމެންޓް ސާވޭގެ ޢަމަލީ މަސައްކަތް ކުރަނީ އެފް.ޖޭ. އެސް ކޮންސަލްޓިންގ ޕްރައިވެޓް ލިމިޓެޑް ކިޔާ ދިވެހި ކުންފުންޏަކުންކަމަށެވެ.

މި މަސައްކަތް އާންމު ފަރާތަކާއި ހަވާލުކުރި މައިގަނޑު ސަބަބަކީ އެއްކުރެވޭ ޑޭޓާގެ ނަޒާހަތްތެރިކަން ހިފެހެއްޓުމަށާއި، ސާރވޭގެ ނަތީޖާއަކީ ނުފޫޒުން މިންޖުކުރެވިފައިވާ އެއްޗެއްކަން ކަށަވަރު ކުރުމަށާއި، ކަމުގެ މާހިރުން މެދުވެރިކޮށް އިތުބާރު ހިފޭނެ މައުލޫމާތު އެއްކުރުންކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވެއެވެ.

މި ސާވޭއިން އެއްކުރެވޭ ހޯދުންތަކުގެ އަލީގައި، ތަމްރީނުދޭ އިދާރާތަކާއި އިންސްޓިޓިއުޓްތަކުން ހިންގާ ތަމްރީނު ޕްރޮގްރާމުތަކާއި، ވަޒީފާދޭ ފަރާތްތަކުން ބޭނުންވާ ހުނަރުތަކާ ދެމެދު ހުރި ފަރަގު ދެނެގަނެ، ރާއްޖެއަށް ބޭނުންވާ އިލްމާއި މަސައްކަތުގެ ހުނަރު ދަސްކޮށްދިނުމުގެ މަގުޗާޓެއް އެކުލަވާލެވޭނެ ކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ވިދާޅުވެއެވެ.

ރާއްޖޭގައި ވަޒީފާ އަދާކުރާ އުމުރުގެ މީހުންނާއި، މަސައްކަތްތެރިންނާއ،ި ވަޒީފާދޭ ފަރާތްތަކާއ،ި މަތީ ތަޢުލީމާއި ހުނަރު ދަސްކޮށްދޭ ފަރާތްތަކުގެ ފުރިހަމަ ބައިވެރިވުން މި ސާރވޭއަށް މުހިންމުވާތީ، އެފް.ޖޭ.އެސް ކޮންސަލްޓިންގ ޕްރައިވެޓް ލިމިޓެޑްގެ ސާރވެޔަރުންނަށް ފުރިހަމައަށް އެއްބާރުލުން ދިނުމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން އެދިވަޑައިގަންނަވައެވެ.