ބީސީސީގެ ހިޔަލަ މާކެޓުން 1 އަހަރު ދުވަހަށް ކިއޮސްކްތައް ދޫކުރަނީ

"ހިޔަލަ ވީކެންޑް މާކެޓު"ގެ ނަން ހިޔަލަ މާކެޓަށް ބަދަލުކޮށް 1 އަހަރު ދުވަހުގެ މުއްދަތަށް އެތަނުގެ ކިއޮސްކްތައް ކުއްޔަށް ހިފުމަށް ބިޒްނަސް ސެންޓަރ ކޯޕަރޭޝަން، ބީސީސީން ހުޅުވާލައިފިއެވެ.

ހިޔަލަ ވީކެންޑް މާކެޓަކީ ދިވެހި އަންހެން ވިޔަފާރިވެރިންނަށް ވިޔަފާރީގެ އިތުރު ފުރުސަތުތައް ފަހިކުރުމުގެ ގޮތުން އިޤްތިސާދީ ތަރައްޤީއާއި ވިޔަފާރިއާ ބެހޭ ވުޒާރާގެ އިސްނެގުމާއެކު ބީސީސީން ކުރިއަށްގެންދާ މާކެޓެކެވެ.

ހުޅުމާލޭ ކޮންޓެއިނާ ޕާކު ސަރަހައްދުގައި "ހިޔަލަ ވީކެންޑް މާކެޓު"ގެ ނަމުގައި ޤާއިމުކޮށްފައިވާ ސަރަހައްދަށް ލިބެމުންދާ ތަރުޙީބަށް ބަލައި، މި ސަރަހައްދުގެ ނަން ހިޔަލަ މާކެޓަށް ބަދަލުކޮށް، މި ސަރަހައްދަކީ ވިޔަފާރީގެ ބޭނުމަށް ކޮންމެ ދުވަހަކުވެސް ހުޅުވާ ތަނެއްގެ ގޮތުގައި ބީސީސީން މިހާރު ވަނީ ހަމަޖައްސާފައެވެ.

ދިވެހި އަންހެން ވިޔަފާރިވެރިންނަށް ވިޔަފާރީގެ އިތުރު ފުރުސަތު ފަހިކޮށް ދިނުމުގެ ގޮތުން، މި ސަރަހައްދުގައި ބަހައްޓާފައިވާ ކިއޮސްކްތައް 1 އަހަރު ދުވަހުގެ މުއްދަތަށް ކުއްޔަށް ދޫކުރުމަށް ބީސީސީން ވަނީ ހުޅުވާލާފައެވެ. މި ބަދަލާއެކު، ކިއޮސްކުތައް މެދުވެރިކޮށް ދިވެހި އަންހެން ވިޔަފާރިވެރިންނަށް ވިޔަފާރި ކުރުމުގެ އިތުރު ފުރުސަތުތައް ފަހިވެ، ވިޔަފާރިތައް އިތުރު ހަރުފަތަކަށް ގެންދިޔުމަށް ވަރަށް ބޮޑު ބާރަކަށް ވެގެންދާނެކަމަށް ބީސީސީން ވަނީ ބުނެފައެވެ.

ހިޔަލަ މާކެޓުގެ ކިއޮސްކުތައް ކުއްޔަށް ހިފުމަށް އެދި ފޯމު ހުށަހެޅުމުގެ ފުރުސަތު 9 ޖޫން 2024 ވާ އާދިއްތަ ދުވަހުގެ 16:00ގެ ނިޔަލަށް ވަނީ ހުޅުވާލާފައެވެ.

އަންހެނުން އުފައްދާ އުފެއްދުންތައް ވިއްކުމަށް ޚާއްޞަ ސަރަހައްދެއް ހުޅުމާލޭގައި ކަނޑައަޅައި، ވިޔަފާރި ކުރުމަށް ފަސޭހަ އިންތިޒާމުތަކެއް ހަމަޖައްސައިދެއްވުމަކީ ރައީސުލްޖުމްހޫރިއްޔާ ޑރ. ،މުހައްމަދު މުއިއްޒުގެ ރިޔާސީ ވަޢުދެކެވެ. ހިޔަލަ މާކެޓަކީ ރައީސުލްޖުމްހޫރިއްޔާގެ ރިޔާސީ ވައުދާ އެއްގޮތަށް، ވެރިކަމުގެ ފުރަތަމަ 14 ހަފްތާގެ މަގުޗާޓުގައި ހިމަނުއްވައިގެން ފެށި މާކެޓެކެވެ.