"އަލްބޭނިއާ މެޗުގައި އަހަރެން ބޭނުންވި ގޮތަށް ގޭމް ޕްލޭން މަސައްކަތްކުރި،ސްޕެއިނުގެ ކޯޗު، ލުއިސް ޑި ލާ ފުއެންޓޭ
ޔޫރޯ 2024 ގެ ގްރޫޕް ބީ ގައި ރޭ އަލްބޭނިއާ އަތުން 0-1 އިން މޮޅުވި މެޗަށްފަހު ސްޕެއިނުގެ ކޯޗު، ލުއިސް ޑި ލާ ފުއެންޓޭ ވަނީ، އެންމެންނަށް ވެސް ހުވަފެންދެކެވެން އެބައޮތް ކަމަށާއި، އޭނާގެ ޓީމުން ހުވަފެންދެކުނަސް ހަމަބިމުގައި ތިބުމަށް ގޮވާލައިފައެވެ.
ފުއެންޓޭ ބުނީ، މުބާރާތުގެ ގްރޫޕް ސްޓޭޖުގައި ކުޅުނު ހުރިހާ މެޗެއްވެސް ދިޔައީ ވަރަށް ވާދަވެރިކޮށް ކަމަށާއި، ހާއްސަކޮށް ތިން މެޗު ކާމިޔާބުކޮށް، ބައިކޮޅަށް ލަނޑެއްވަނަނުދީ ނިންމާލެވުމަކީ ވަރަށް އުނދަގުލުން ކުރެވުނު ކަމެއް ކަމަށެވެ.
މުބާރާތުގެ ގަދަ 16 ގެ ބުރުގައި ވާދަކުރަންޖެހޭނެ ޓީމެއް ބުދަ ދުވަހުގެ ކުރީން ނޭނގުނުނަމަވެސް، ކޮންމެ ޓީމަކާ ދެކޮޅަށް ކުޅެން ވެސް އޭނާގެ ޓީމުން ތިބޭނީ ތައްޔާރަށް ކަމަށް ފުއެންޓޭ ބުންޏެވެ.
ދެވަނަ ހާފު ފެށިގެން އުނދަގޫތައް ކުރިމަތިވި ކަމަށާއި، އަދިވެސް ރަނގަޅު ކުރެވޭނެ ކަންތައްތައް އެބަހުރި ކަމަށް ފާހަގަކޮށް ފުއެންޓޭ ބުނީ، އޭނާގެ ކުޅުންތެރިންވެސް ތިބީ އެކަމަށް ތައްޔާރަށް ކަމަށެވެ. އެންމެ ވަރުގަދަ ޓީމުތަކާ ދެކޮޅަށް ނިކުންނަންޖެހޭއިރު އެންމެ މޮޅު ކުޅުން ކުޅެވޭ ވަރުގެ ލެވެލްއެއްގައި ތިބެން ޖެހޭނެ ކަމަށް ވެސް ފުއެންޓޭ ވަނީ ބުނެފައެވެ.
ފުއެންޓޭ ބުނީ، މުބާރާތުގައި މިހާތަނަށް ދެއްކި މޮޅު ކުޅުމާއެކު ފޭވަރިޓެއްގެ ޓެގު ލިބުނަސް އެކަމަށް މާބޮޑު ސަމާލުކަމެއް ނުދޭނެ ކަމަށެވެ. އެގޮތުން، އޭނާ ބުނީ، އެއް ދުވަހު ގްރޫޕުގެ އެއްވަނަ ލިބިފައި، އަނެއް ދުވަހު އެއްވެސް ކަމެއް ނުކުރެވޭތަން އަންނަ ކަމަށެވެ. އެހެންކަމުން، އޭނާގެ ކުޅުންތެރިންނަށް އިތުރު ޕްރެޝަރެއް ކުރިމަތިކުރުވާން ބޭނުމެއްނެތް ކަމަށް ވެސް ފުއެންޓޭ ވަނީ ބުނެފައެވެ.
އަލްބޭނިއާ މެޗަށް ނިކުތްއިރު ގެނައި ބަދަލުތަކާ ބެހޭގޮތުން ބުނީ، އޭނާ ބޭނުންވީ މެޗު ކާމިޔާބުކުރަން ކަމަށާއި، އެކަން ކުރެވިއްޖެ ކަމަށެވެ. އަދި މުޅި ޓީމުގައި މިހާތަނަށް އެއްވެސް މެޗެއްގައި ކުޅެފައިނުވާ ހުރީ އެންމެ ކުޅުންތެރިއެއް ކަމަށް ވެސް ފުއެންޓޭ ވަނީ ބުނެފައެވެ.
އެގޮތުން، ފުއެންޓޭ ވަނީ، އޭނާގެ ޓީމުގައި ހިމެނޭ ޒުވާން ކުޅުންތެރިންނަށް އިތުރު ތަޖުރިބާއެއް ލިބި އުނދަގޫ މެޗެއްގައި ކުޅެން ފުރުޞަތު ދެވުމުން ހިތްހަމަޖެހޭ ކަމަށް ވެސް ބުނެފައެވެ.