އިނގިރޭސި ބޮޑުވަޒީރުކަމަށް އިންތިޚާބުވި ކީރް ސްޓާމަރއަށް ރައީސް ތަހުނިޔާ ވިދާޅުވެއްޖެ

އިނގިރޭސިވިލާތުގެ ބޮޑުވަޒީރުކަމަށް ކީރް ސްޓާމަރ އިންތިޚާބުވުމާ ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަހުނިޔާ ވިދާޅުވެއްޖެއެވެ.

އެކްސްގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ވަނީ އިނގިރޭސިވިލާތުގެ ބޮޑުވަޒީރަކު އިންތިޚާބުކުރުމަށް ބޭއްވި ޢާންމު އިންތިޚާބު، ދަ ލޭބަރ ޕާޓީގެ ފަރާތުން ވާދަކުރެއްވި ކެންޑިޑޭޓު ކީރް ސްޓާމަރ ކާމިޔާބުކުރެއްވުމާ ގުޅިގެން ޕާޓީއަށާއި ސްޓާމަރއަށް ތަހުނިޔާ ވިދާޅުވާ ކަމަށެވެ.

އަދި ސްޓާމަރގެ ޒަޢާމަތުގައި އިނގިރޭސިވިލާތް އިތުރަށް ތަރައްޤީވެ ކުރިއަރައިގެން ދިއުމަށް އެދިވަޑައިގަންނަވާކަމުގައި ވިދާޅުވިއެވެ. އަދި އައު ބޮޑުވަޒީރުގެ ޒަޢާމަތުގައި ދެ ޤައުމުގެ ގުޅުން އިތުރަށް ބަދަހިކޮށް، ދުނިޔެއަށް ދިމާވާ ގޮންޖެހުންތަކުން އަރައިގަތުމަށް އެކުގައި މަސައްކަތްކުރުމަށް އުއްމީދުކުރައްވާކަމަށް ރައީސުލްޖުމްހޫރިއްޔާގެ މެސެޖުގައި ވިދާޅުވިއެވެ.

Congratulations to Prime Minister-elect @Keir_Starmer and @UKLabour on their resounding victory! I am confident that under your able leadership, the #UK will see a new dawning of prosperity. The Government and the people of #Maldives extend our best wishes and look forward to…

— Dr Mohamed Muizzu (@MMuizzu) July 5, 2024

އިނގިރޭސިވިލާތުގެ ބޮޑުވަޒީރަކު ހޮވުމަށް ބޭއްވި އިންތިޚާބުގައި ކީރް ސްޓާމަރއާ އެންމެ ގާތުން ވާދަކުރީ މިހާރުގެ ބޮޑުވަޒީރު އަދި ކޮންޒަވޭޓިވް ޕާޓީގެ ކެންޑިޑޭޓް ރިޝީ ސުނާކްއެވެ. މި އިންތިޚާބުގައި 9 ކެންޑިޑޭޓުން ވާދަކުރިއެވެ.

އިއްޔެ ބޭއްވި މިއިންތިޚާބަށްޓަކައި އިނގިރޭސިވިލާތުގެ އެކި ކަންކޮޅުތަކުގައި 40,000އަށްވުރެ ގިނަ ވޯޓުލާ މަރުކަޒު ގާއިމުކުރިއެވެ. އިނގިރޭސިވިލާތުގެ ޢާންމު އިންތިޚާބު ބާއްވަނީ ކޮންމެ 5 އަހަރަކުން އެއް އަހަރުއެވެ.