އޮންލައިންކޮށް ހަދާ އިމްތިހާނުތައް މޮނިޓަރކުރެވޭނެ ނިޒާމެއް ޤާއިމްކުރަނީ

އޮންލައިންކޮށް ނަގާ އިމްތިހާނުތައް މޮނިޓަރކުރެވޭނެ ހަރުދަނާ ނިޒާމެއް ޤާއިމްކުރުމުގެ މަސައްކަތް މޯލްޑިވްސް ކޮލިފިކޭޝަންސް އޮތޯރިޓީ، އެމްކިޔުއޭއިން ފަށައިފިއެވެ.

ނޫސްވެރިންނާ ބައްދަލުކުރައްވާ ވާހަކަދައްކަވަމުން އެމްކިޔުއޭގެ ސީއީއޯ މަރިޔަމް ފިޒާނާ ރަޝީދު ވިދާޅުވީ އޮންލައިންކޮށް ނަގާ އިމްތިހާންތައް ރަނގަޅަށް މޮނިޓަރކުރެވޭނެ ނިޒާމެއް ޤާއިމްކުރުމުގެ މަސައްކަތް މިހާރު ފަށާފައިވާ ކަމަށާއި މި މަސައްކަތް 2 އަހަރެއްހާ ދުވަހުގެ ތެރޭގައި ނިންމާލެވޭނެ ކަމަށެވެ.

ފިޒާނާ ވިދާޅުވީ މިހާރު އޮންލައިންކޮށް ނަގާ އިމްތިހާންތަކަށް އެކްރެޑިޓޭޝަން ދިނުމުގެ ހުއްދަ ދެނީ ކޯސް ހިންގާ ތަނުން އިމްތިހާން ނެގުމަށް އޮންނަ ނިޒާމު އެމްކިޔުއޭއިން ވަރަށް ގާތުން ބެލުމަށްފަހު ކަމަށެވެ. އެގޮތުން އޮންލައިންކޮށް ކިޔަވައިދެވޭވަރަށް ކޯސް ހިންގާ ތަންތަނުގައި ވަޞީލަތް ޤާއިމްކޮށްފައިވޭތޯ ބަލާ ކަށަވަރުކުރާކަން ފިޒާނާ ފާހަގަކުރެއްވިއެވެ.

އޭނާ ވިދާޅުވީ އޮންލައިންކޮށް ނަގާ އިމްތިހާންތައް އެންމެ ރަނގަޅަށް ކުރިއަށް ނުގެންދެވޭކަމުގެ ޝަކުވާ، އެމްކިޔުއޭއަށް ލިބޭކަމަށެވެ. އަދި މިކަންކަން ރަނގަޅުކުރުމަށް ކަމާއިބެހޭ ފަރާތްތަކާއެކު މިހާރު މަޝްވަރާކުރަމުންދާކަން ފާހަގަކުރެއްވިއެވެ.

"އޮންލައިންކޮށް އިމްތިހާންތައް އަދި ކޯސްތައް ކުރިއަށްނުގެންދެވޭނެ ދާއިރާތަކެއް އެބަހުރި. މީގެ އިތުރުން އެކި ކޯސްތަކުގެ ޕްރެކްޓިކަލް ބައިތަކެއް އޮންލައިންކޮށް ކުރިއަށްނުގެންދެވޭނެ. އެހެންނަމަވެސް ބްލެންޑެޑްކޮށް ނުވަތަ އޮންލައިންނާއި ފޭސް ޓު ފޭސްކޮށް ކޯސްތައް ކުރިއަށްގެންދެވޭނެ. އެއީ އަޅުގަނޑު ޤަބޫލުކުރާ ކަމެއް." ފިޒާނާ ވިދާޅުވިއެވެ.

އޮންލައިން އިމްތިހާނުތައް މޮނިޓަރކުރެވޭނެ ހަރުދަނާ މެކޭނިޒަމެއް ޤާއިމްކުރެވުމާއެކު، އޮންލައިންކޮށް ނަގާ އިމްތިހާނުތަކަކީ އެންމެ އެކަށޭނަ ގޮތަކަށް ނެނގޭ އިމްތިހާނުތަކެއްކަން ކަށަވަރުކުރުމަށް މަގުފަހިވާނެއެވެ.

ރާއްޖޭގައި ކޯސްތައް އޮންލައިންކޮށް ކިޔަވައިދިނުމުގެ ގައިޑްލައިންގެ ދަށުން އޮންލައިންކޮށް ކިޔަވައިދިނުމާއި އިމްތިހާން ނެގުން މަނާ 7 ދާއިރާއެއް އޮވެއެވެ. މި 7 ދާއިރާއަކީ މެޑިސިން އެންޑް ޑެންޓިސްޓްރީ، ޕްރެކްޓިކަލް ޑިސިޕްލިން އޮފް ހެލްތު ސައިންސަސް، ނާސިން، ޓެކްނިކަލް އެންޑް ވޮކޭޝަނަލް އެޑިޔުކޭޝަން، އިންޖިނިއަރިން، އާކިޓެކްޗަރ އަދި ޓީޗިންއެވެ.