އިންތިޚާބުތަކަށް ދައުލަތުން އެތައް ޚަރަދެއްކުރޭ، ވޯޓުލާން ނުކުތުން ވަރަށް މުހިންމު: ފުއާދު

ކޮންމެ އިންތިޚާބަކަށް ދައުލަތުން އެތައް ޚަރަދެއްކުރާއިރު ވޯޓުލާން ކޮންމެ މީހަކުވެސް ނުކުތުމަކީ ކުރުން ވަރަށް މުހިންމުކަމެއްކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީޤު ވިދާޅުވެއްޖެއެވެ.

ފުއާދު މިހެން ވިދާޅުވެފައި މިވަނީ މިމަހުގެ 20 ވަނަ ދުވަހު 6 ބައި-އިލެކްޝަނެއް ބޭއްވުމަށް އިލެކްޝަންސް ކޮމިޝަނުން ތައްޔާރުވަމުންދާ ދަނޑިވަޅެއްގައެވެ. ބައި-އިލެކްޝަންތަކުގައި ވޯޓުލާން ނުކުންނަ މީހުންގެ ނިސްބަތް މަދުކަން ފާހަގަކޮށްލެވެއެވެ.

ޕީއެސްއެމް ނިއުސްއަށް ދެއްވި ބަސްދީގަތުމެއްގައި އިލެކްޝަންސް ކޮމިޝަންގެ ރައީސް ފުއާދު ތައުފީޤު ވިދާޅުވީ، ކޮންމެ ބައި-އިލެކްޝަނަކަށްވެސް އިލެކްޝަންސް ކޮމިޝަނުން ތައްޔާރުވަނީ ވޯޓުލުމުގެ ޙައްޤު ލިބޭ ހުރިހާ މީހުންވެސް ވޯޓުލާން އަންނާނެކަމަށް އުންމީދު ކޮށްގެން ކަމަށެވެ.

އެގޮތުން ވޯޓުލާ ފޮށިތައް ތައްޔާރުކޮށް، ވޯޓު ކަރުދާސް ޗާޕުކޮށް، އޮފިޝަލުން ހޯދުންފަދަ މަސައްކަތްތައް ކުރަނީ އެތައް ޚަރަދެއްކޮށްގެން ކަމަށާއި ވޯޓުލާން މީހުން ނައުމުން މިކަންކަން އިސްރާފަކަށްވާކަން ފުއާދު ފާހަގަކުރެއްވިއެވެ.

"ކޮންމެ މީހަކުވެސް ޤަބޫލުކުރަންވީ ވޯޓުލުމަކީ ޤައުމީ ވާޖިބެއްކަމުގައި. އެއީ ޤައުމަށް ކޮށްދެންޖެހޭ ޤައުމީ ޚިދުމަތެއް. ބައެއް ޤައުމުތަކުގައި ވޯޓުލާން ނުދާ މީހުންނަށް ދޭ އަދަބުތަކެއްވެސް ހުރޭ. އެގޮތުން ދައުލަތުންދޭ އެކި އިނާޔަތްތައް ވޯޓުނުލާ މީހުންނަށް ކަނޑާލާ." ފުއާދު ވިދާޅުވިއެވެ.

މިމަހުގެ 20 ވަނަ ދުވަހު 6 ބައި-އިލެކްޝަނެއް އޮންނާނެއެވެ. މި ބައި-އިލެކްޝަންތަކުގައި ވާދަކުރާ ކެންޑިޑޭޓުންގެ ނަންތައް މިހާރު ވަނީ ތަރުތީބުކޮށް އިޢުލާނުކޮށްފައެވެ. މި ބައި-އިލެކްޝަންތަކުގައި ވޯޓުލެވޭ މީހުންގެ ފައިނަލް ލިސްޓު ޢާންމުކުރާނީ އަންނަ އާދިއްތަ ދުވަހުއެވެ.

ބައި އިލެކްޝަން ބާއްވާ ދާއިރާތަކަކީ:

• މާލެ ސިޓީ ކައުންސިލްގެ ހުޅުމާލެ ދާއިރާ
• މާލެ ސިޓީ ކައުންސިލްގެ މައްޗަންގޮޅި މެދު ދާއިރާ
• މާލެ ސިޓީ ކައުންސިލްގެ ހެންވޭރު ހުޅަނގު ދާއިރާ
• ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާ
• ފ. ބިލެތްދޫ ކައުންސިލްގެ ރައީސް
• ރ. ރަސްމާދޫ ކައުންސިލްގެ އަންހެން މެންބަރުގެ ގޮނޑި

މީގެ ކުރިން މިމަހު 10 ބައި-އިލެކްޝަނެއް ބާއްވަން އިލެކްޝަންސް ކޮމިޝަނުން ނިންމިއެވެ.

ނަމަވެސް، އެންމެ ކެނޑިޑޭޓެއް ވާދަކުރަން ހުށަހެޅުމުން 3 ބައި އިލެކްޝަނެއްގެ ގޮނޑި ވަނީ އިންތިޚާބަކާއި ނުލައި ޕީއެންސީއަށް ލިބިފައެވެ.

އެއީ ޅ. ހިންނަވަރު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރުކަމާއި، ޅ. އަތޮޅު ކައުންސިލްގެ ރައީސްގެ ގޮނޑިއާއި އަދި ރ. ހުޅުދުއްފާރު ކައުންސިލް މެމްބަރުކަމުގެ ގޮނޑިއެވެ. އަދި ފ. ބިލެއްދޫ އަންހެނުންގެ ތަރައްޤީއަށް މަސައްކަތް ކުރާ ކޮމެޓީން ހުސްވެފައިވާ ގޮނޑިއަށް މެންބަރަކު އިންތިޚާބުކުރަން މީގެ ކުރިން އިޢުލާނުކުރި ނަމަވެސް، އެއްވެސް ކެންޑިޑޭޓަކު މި ގޮނޑިއަށް ކުރިމަތިލާފައިނުވެއެވެ. އެހެންކަމުން އެ ގޮނޑީގެ ބައި އިލެކްޝަނަށް އަލުން އިޢުލާންކުރާނެކަމަށް އިލެކްޝަނުން ވިދާޅުވެއެވެ.

މި މަހު ބާއްވާ ބައި-އިލެކްޝަންތަކުގެ ތެރެއިން މާލެ ސިޓީ ކައުންސިލުގެ ގޮނޑިތަކާއި ކުޅުދުއްފުށީ ސިޓީ ކައުންސިލްގެ ގޮނޑިއާއި ބިލެއްދޫ ކައުންސިލް ރައީސްގެ ގޮނޑިއަށް ވާދަކުރަނީ ވެރިކަންކުރާ ޕީއެންސީއާއި އިދިކޮޅު އެމްޑީޕީގެ ކެނޑިޑޭޓުން އެކަންޏެވެ. އަދި ރ. ރަސްމާދޫ ކައުންސިލުގެ އަންހެން މެންބަރުގެ ގޮނޑިއަށް ވާދަކުރަނީ ވެރިކަން ކުރާ ޕީއެންސީގެ ކެނޑިޑޭޓަކާއި އަމިއްލަގޮތުން ވާދަކުރާ ކެނޑިޑޭޓެކެވެ.

ކުޅުދުއްފުށި އަދި މާލެ ސިޓީ ކައުންސިލުގެ ގޮނޑިތައް ހުސްވީ އެ ގޮންޑިތައް ތަމްސީލު ކުރައްވަމުން ގެންދެވި މެންބަރުން ރައްޔިތުން މަޖިލީހަށް އިންތިޚާބުވެވަޑައިގަތުމުންނެވެ.