ލައިބްރަރީ ދުވަސް ފާހަގަކުރުމަށް ހަފްތާގެ މުއްދަތަކަށް ގިނަ ހަރަކާތްތަކެއް

މިއަހަރުގެ ޤައުމީ ލައިބްރަރީ ދުވަސް ފާހަގަކުރުމަށް ގިނަ ހަރަކާތްތަކެއް ދިވެހިރާއްޖޭގެ ޤައުމީ ކުތުބުޚާނާއިން ދަނީ ބާއްވަމުންނެވެ.

މި ހަރަކާތްތައް ފަށަފައިވަނީ މިމަހުގެ 13 ވަނަ ދުވަހުއެވެ. އަދި މި ހަރަކާތްތައް މިމަހުގެ 20 ވަނަ ދުވަހާ ހަމައަށް ކުރިއަށްދާނެކަމަށް ޤައުމީ ކުތުބުޚާނާއިން ވިދާޅުވެއެވެ.

ޤައުމީ ކުތުބުޚާނާއިން ވިދާޅުވީ، ލައިބްރަރީ ދުވަސް ފާހަގަކުރުމަށް ކުތުބުޚާނާގެ ތާރީޚާ ބެހޭގޮތުން މަޢުލޫމާތު ކަރުދާހެއް ހެދުމުގެ މަސައްކަތް ކުރިއަށްދާ ކަމަށެވެ. އަދި ޤައުމީ ކުތުބުޚާނާގެ ދަށުން ހިންގާ ޗިލްޑްރެންސް މަލްޓި-މީޑިއާ ލައިބްރަރީގައިވެސް ގިނަ ހަރަކާތްތަކެއް ކުރިއަށްދާނެކަމަށް ވިދާޅުވިއެވެ.

ޗިލްޑްރެންސް މަލްޓި-މީޑިއާ ލައިބްރަރީގައި ހިންގާ ހަރަކާތްތަކާ ބެހޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން ލައިބްރޭރިއަން ހައްވާ ނަބާހާ ޢާމިރު ވިދާޅުވީ ދިވެހި ކުޑަކުދިންގެ ފޮތް ލިޔުންތެރިންނާއެކު ސްޓޯރީޓައިމް ވިތް އޯދަރސްގެ ނަމުގައި ޚާއްސަ ހަރަކާތެއް އޮންނާނެ ކަމަށެވެ.

މި ހަރަކާތުގައި ފޮތް ލިޔުންތެރިން، ލައިބްރަރީއަށް ޒިޔާރަތްކުރާ ކުދިންނަށް އެމީހުންގެ ދުލުން ވާހަކަ ކިޔައިދޭނެކަމަށް ނަބާހާ ވިދާޅުވިއެވެ. އަދި މި ހަރަކާތް ކުރިއަށްދާނީ ހެނދުނު 10:30 އިން 12:30 އަށް ކަމަށްވެސް އޭނާ ވިދާޅުވިއެވެ.

ހަމައެއާއެކު އެކްޓިވިޓީ ފެއަރގެ ނަމުގައި ކުޑަކުދިންނަށް އަމާޒުކޮށްގެން ތަފާތު އަތްތެރި ހަރަކާތްތަކެއްވެސް ކުރިއަށް ގެންދިއުމަށް ވަނީ ނިންމާފައެވެ. ނަބާހާ ވިދާޅުވީ، އެކްޓިވިޓީ ފެއަރގެ ދަށުން ކްލޭއާއި ޕޮޕްސިކަލް ސްޓިކްސް ބޭނުންކޮށްގެން ބުކް މާކް ހެދުމުގެ ހަރަކާތެއް ކުރިއަށްދާ ކަމަށެވެ. އަދި އަތުގައި އަޅާ ގަހަނާ ހެދުމާއި، ފޭސް ޕެއިންޓިންފަދަ ހަރަކާތްތައްވެސް ކުރިއަށްދާކަމަށް އޭނާ ވިދާޅުވިއެވެ.

މީގެ އިތުރުން "ފައިންޑް ދަ ޓްރެޝަރ"ގެ ނަމުގައި ހަރަކާތެއް ކުރިއަށްދާނެކަމަށްވެސް ނަބާހާ ވިދާޅުވިއެވެ.

"އަޅުގަނޑުމެން ބަހައްޓާފައި ހުންނާނެ ޑިސްޕްލޭއެއް. އޭގައި ހުންނާނެ އެކި ކުލަ ކުލައިގެ ޑައިމަންޑު. އެކި ޢުމުރުފުރާތަކުގެ ކުދިންނަށް ހުންނާނީ ކުލަ ޚާއްސަކޮށްފައި. ކޮންމެ ކުއްޖަކުވެސް ޑައިމެންޑެއް ނެގުމަށްފަހު، އޭގައި އޮންނަ ނަންބަރަކާ ދިމާވާ ފޮތެއް ކުއްޖާއަށް ލިބޭނީ. މިގޮތަށް ލިބޭ ފޮތް ގެއަށް ކިޔަން ގެންދެވޭނެ." ނަބާހާ ވިދާޅުވިއެވެ.

ނަބާހާ ވިދާޅުވީ، އެކިކަހަލަ ވާހަކަ ފޮތާއި، ކުޅޭ އެއްޗިއްސާއި ބޯޑު ގޭމްސްއާއި ތަޢުލީމާގުޅޭ ވީޑިއޯ ހިމެނޭ ސީޑީތައް ލައިބްރަރީއަށް ހަދިޔާކުރުމަށް ޚާއްސަ ފޮއްޓެއްވެސް ލައިބްރަރީ ދުވަހާ ގުޅިގެން ބަހައްޓާފައި ހުންނާނެ ކަމަށެވެ.

ކޮންމެ އަހަރަކުވެސް ރާއްޖޭގައި ޤައުމީ ލައިބްރަރީ ދުވަސް ފާހަގަކުރަނީ ޖުލައި މަހުގެ 12 ވަނަ ދުވަހުއެވެ. މި ދުވަސް ފާހަގަކުރަނީ ދިވެހިރާއްޖޭގެ ފުރަތަމަ ލައިބްރަރީ، ޤައުމީ ކުތުބުޚާނާ ވުޖޫދުވި ދުވަހާ ގުޅުވައިގެންނެވެ. މިއަހަރު ފާހަގަކުރަނީ 79 ވަނަ ޤައުމީ ލައިބްރަރީ ދުވަހެވެ.