އިންސާނީ ވަގުފާރީގެ މައްސަލަތައް އަވަސްކުރަން ޤާނޫނަށް އިޞްލާހު ގެންނަންޖެހޭ: ދާޚިލީ ވަޒީރު

އިންސާނީ ވަގުފާރީގެ ޝިކާރައަކަށްވާ މީހުންގެ ޝަރީޢަތްތައް އަވަސްކުރުމަށް ޤާނޫނަށް އިޞްލާޙު ގެނަންޖެހޭކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ބައިނަލްއަޤުވާމީ އިންސާނީ ވަޤުފާރިއާ ދެކޮޅަށް މަސައްކަތްކުރާ ދުވަސް ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.

ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ އިންސާނީ ވަގުފާރީގެ މައްސަލަތަކުގެ ޝަރީޢަތްތައް ލަސްވުމަކީ އެކަމުގެ ޝިކާރައަކަށްވާ މީހުންނަށް ލިބޭ ބޭއިންސާފެއް ކަމަށެވެ. އަދި މައްސަލަތައް ސާބިތުވާ މިންވަރު ދަށްނަމަ އެމީހުން އިތުރަށް އިންސާނީ ވަގުފާރިއަށް ހުށައެޅިދާނެދާނެކަމުގެ ބިރު އެބައޮތްކަމަށް ވަޒީރު ވިދާޅުވިއެވެ.

އިޙްސާން ވިދާޅުވީ އިންސާނީ ވަގުފާރީގެ މައްސަލަތައް އަވަސްކުރުމަށް ޕްރޮސިކިޔުޝަން މަރުޙަލާގައި ހުންނަ ކަންކަމާއި، ދަޢުވާ ކުރުމުގައި ހުރި ގޮންޖެހުންތައް ދެނެގަނެ، އެކަންކަން ހައްލުކުރުމަށް ޤާނޫނުތަކަށް ބަދަލު ގެންނަންޖެހޭ ކަމަށެވެ. އަދި ތަޙުޤީޤުތަކާއި ޝަރީޢަތްތައް އަވަސްކުރުމަށް ސަރުކާރުން ޚާއްސަ އިސްކަމެއްދެެއްވާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ އިންސާނީ ވަގުފާރިއަކީ އިންސާނުން އަޅުވެތިކޮށްގެން ހިންކާ ނުރައްކާތެރި ނުބައި ޢަމަލެއް ކަމަށެވެ.

"އިންސާނީ ވަގުފާރިކުރާ މީހުން އެކި މީހުންގެ ހައްޤުތަކަށް އަރައިގަނެ ފަރުދުންގެ ކަރާމަތާއި މިނިވަންކަން ގެއްލުވާލާ. މިއީ ޒަމާނީ އަޅުވެތިކަމުގެ ވައްތަރެއް. މި ކުށް ހިންގާ ފަރާތްތައް، ކުށުގެ ޝިކާރައަކަށްވާ މީހުންނަށް ބިރު ދައްކާ ހާލަތު ރަނގަޅުވާނެކަމަށް ވިސްނައިދީ ގަދަކަމުން މަސައްކަތްކުރުވައި، އެމީހުންނަށް ޖިންސީ ގޯނާކުރޭ." ވަޒީރު ޢަލީ އިޙްސާން ވިދާޅުވިއެެވެ.

ތަފާސްހިސާބުތަކުން ދައްކާގޮތުގައި އިންސާނީ ވަގުފާރީގެ ޝިކާރައަކަށްވާ ކޮންމެ 3 މީހެއްގެ ތެރެއިން އެކަކަކީ ކުޑަކުއްޖެކެވެ. ވަޒީރު ވިދާޅުވީ މި ކުށަށް އަރައިގަންނަ މީހުން ކުޑަކުދިންގެ ޙައްޤުތަކަށް އަރައިގަނެ ގަވައިދާ ޚިލާފަށް އެކުދިން އެޑެޕްޓުކޮށް، އެކުދިންނަށް ޖިންސީ އަނިޔާކުރާ ކަމަށެވެ.

ވަޒީރު ވިދާޅުވީ އިންސާނީ ވަގުފާރި ހުއްޓުވުމަށް މިހާރު ކުރާ މަސައްކަތްތައް އިތުރަށް ހަރުދަނާކުރަން ޖެހޭ ކަމަށެވެ. އެގޮތުން މި ކުށް ހުއްޓުވުމަށް މައިގަނޑު 4 ސިޔާސަތެއް ސަރުކާރުން ގެންގުޅުއްވާކަން ވަޒީރު ފާހަގަކުރެއްވިއެވެ. އެއީ މި ކުށް ހުއްޓުވުމުގައި މަސައްކަތްކުރާ ޤާބިލް މީހުން ބިނާކުރުމާއި، ކުށާ ގުޅޭގޮތުން މުޖުތަޢު ހޭލުންތެރިކުރުވުމާއި، ކުށުގެ ޝިކާރައަކަށްވާ މީހުންނަށް ރައްކާތެރި މާޙައުލެއް ޤާއިމްކޮށްދިނުމުގެ އިތުރުން ކުށް ރިޕޯޓުކުރެވޭނެ ފޯން ލައިނެއް ޤާއިމްކުރުންކަމަށް ވަޒީރު ވިދާޅުވިއެވެ.

އިންސާނީ ވަޤުފާރިއާ ދެކޮޅަށް މަސައްކަތްކުރާ ދުވަސް ފާހަގަކުރުމަށް ބޭއްވި ރަސްމިއްޔާތުގައި މި ކުށް ރިޕޯޓުކުރެވޭނެ ޚާއްސަ ފޯން ލައިނެއް ވަނީ އިފްތިތާޙްކޮށްފައެވެ. މި ފޯން ލައިންގެ ނަންބަރަކީ 9193939އެވެ.

ކޮންމެ އަހަރަކުވެސް ބައިނަލްއަޤުވާމީ ގޮތުން އިންސާނީ ވަޤުފާރިއާ ދެކޮޅަށް މަސައްކަތްކުރާ ދުވަހުގެ ގޮތުގައި ފާހަގަކުރަނީ ޖުލައި މަހުގެ 30 ވަނަ ދުވަހުއެވެ. މި ދުވަހާ ގުޅިގެން މިއަހަރު ކަނޑައަޅާފައިވާ ޝިޢާރަކީ "މީހުން އިންސާނީ ވަގުފާރިކުރުން ހުއްޓުވުމަށްކުރާ މަސައްކަތުގައި އެއްވެސް ކުޑަކުއްޖަކު އިސްތިސްނާ ނުކުރުން" މި ޝިޢާރެވެ.