ފަތުރުވެރިކަން ކުރިއެރުވުމަށް އިންޑިއާގެ ދެ ވަޒީރަކާއެކު މުހިންމު މަޝްވަރާތަކެއް

އިންޑިއާއިން އަންނަ ފަތުރުވެރިންގެ ޢަދަދު އިތުރުކޮށް، އެޤައުމުގެ އެހީތެރިކަމާއެކު ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމާގުޅޭގޮތުން އިންޑިއާގެ ބައެއް ވަޒީރުންނާ ރާއްޖޭގެ ފަތުރުވެރިކަމާބެހޭ ވަޒީރު އިބްރާހީމް ފައިޞަލް މަޝްވަރާކުރައްވައިފިއެވެ. މި މަޝްވަރާތައް ކުރިއަށްގެންގޮސްފައިވަނީ ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް މިހާރު އިންޑިއާއަށް ކުރައްވަމުންގެންދަވާ ދަތުރުފުޅުގެތެރެއިންނެވެ.

ފައިޞަލް ވަނީ އިންޑިއާގެ ފަތުރުވެރިކަމާ ބެހޭ ވަޒީރު ޝްރީ ގަޖެންދްރާ ސިންގ ޝެކާވަތު އަދި މަދަނީ އުދުހުންތަކާއި ބެހޭ ވަޒީރު ޝްރީ ކިންޖަރަޕޫ ރަމަމޯހަން ނައިޑޫއާ ބައްދަލުކުރައްވާފައެވެ.

I had the privilege of meeting with Honourable Minister of Civil Aviation Shri Kinjarapu Rammohan Naidu this afternoon. Our conversation focused on strengthening connectivity between the Maldives and India, as well as exploring ways to elevate tourism between our two nations. pic.twitter.com/G56oRr8Sj5

— Ibrahim Faisal (@ifaisalofficial) July 30, 2024

މި ބައްދަލުވުންތަކާއި ގުޅޭ ތަފްސީލް ޕީއެސްއެމް ނިއުސްއާ ޙިއްސާކުރައްވަމުން ވަޒީރު އިބްރާހީމް ފައިޞަލް ވިދާޅުވީ އިންޑިއާ ފަތުރުވެރިންގެ ޢަދަދު އިތުރުކުރުމަށް ކުރެވިދާނެ މަސައްކަތްތަކާއި ގުޅޭގޮތުން މަޝްވަރާކުރެއްވިކަމަށެވެ. އަދި ފަތުރުވެރިކަމުގެ ދާއިރާއިން އިންވެސްޓުމަންޓުތައް ގެނައުމާއި ގުޅޭގޮތުންވެސް މަޝްވަރާކުރެވިފައިވާ ކަމަށް ވަޒީރު ވިދާޅުވިއެވެ

"އެރައިވަލްސް އިތުރުކުރުން، އަދި އިންވެސްޓުމަންޓު ގެނައުން، އަދި ފަތުރުވެރިކަމުގެ ދާއިރާއިން ސްކޮލަރޝިޕްތަކާއި ތަމްރީންތައް ކުރިއަށްގެންދިޔުމާއި ގުޅޭގޮތުން ވަނީ މަޝްވަރާކުރެވިފައި، މި ކަންތައްތައް ހިމެނޭ ޕްރޮޕޯސަލް ހުށަހެޅުމަށް ވަޒީރު ވަނީ އެދިވަޑައިގެންފައި." ވަޒީރު ފައިޞަލް ވިދާޅުވިއެވެ.

ފައިޞަލް ވިދާޅުވީ އިންޑިއާގެ މަދަނީ އުދުހުންތަކާއި ބެހޭ ވަޒީރާއެކު ބޭއްވި ބައްދަލުވުމުގައި މައިގަނޑުގޮތެއްގައި މަޝްވަރާކުރެއްވީ އެޤައުމުގެ އިތުރު އެއަރލައިންތަކުގެ ދަތުރުތައް ރާއްޖެއަށް ފެށުމާއި، މިހާރުވެސް ދަތުރުތައް ބާއްވާ އެއަރލައިންތަކުން ރާއްޖެއަށް ބާއްވާ ދަތުރުތަކުގެ ޢަދަދު އިތުރުކުރުމަށްކަމަށެވެ.

"ވެލްކަމް އިންޑިއާ" ނަމުގައި އިންޑިއާގައި ރާއްޖެ އިޝްތިހާރުކުރުމުގެ ބޮޑު ހަރަކާތެއް މިހާރުވަނީ ފަށާފައެވެ.

އެމްއެމްޕީއާރުސީން ވިދާޅުވީ، ރޯޑްޝޯ ކޮންސެޕްޓަށް ބާއްވާ މި ހަރަކާތުގެ މަޤްޞަދަކީ އިންޑިއާގެ ބޮޑު 3 ސިޓީއެއްގައި ރާއްޖޭގެ ފަތުރުވެރިކަން އިޝްތިހާރުކުރުން ކަމަށެވެ. މި ރޯޑްޝޯގެ ހަރަކާތްތައް ނިއުދިއްލީގައި ބާއްވާފައިވާއިރު، ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 24 ފަރާތަކުން ބައިވެރިވެފައިވެއެވެ. އަދި އިންޑިއާގެ ފަތުރުވެރިކަމުގެ ދާއިރާގެ 150 އަށްވުރެ ގިނަ ފަރާތުން ނިއުދިއްލީގައި ބޭއްވި ރޯޑްޝޯއަށް ޒިޔާރަތްކޮށްފައިވެއެވެ.

ރޯޑް ޝޯގެ ދެވަނަ މަންޒިލަކީ މުމްބާއީއެވެ. އެގޮތުން އޮގަސްޓު ފުރަތަމަ ދުވަހު މުމްބާއީގައި ރޯޑް ޝޯ ބޭއްވުމަށްފަހު 03 އޮގަސްޓުގައި ބެންގަލޫރުގައިވެސް ރޯޑް ޝޯ ބޭއްވުމަށް ވަނީ ނިންމާފައެވެ.

Pleased to meet with Hon'ble Tourism Minister Shri Gajendra Singh Shekhawat today. Our discussions focused on enhancing tourism collaboration and strengthening the ties between our two nations. Together, we look forward to fostering mutual growth and enriching our tourism sectors pic.twitter.com/EQhDOVhEJ5

— Ibrahim Faisal (@ifaisalofficial) July 30, 2024

ފައިޞަލް ވިދާޅުވީ މިހާރު މިކުރެވޭ މަސައްކަތްތަކާއެކު އިންޑިއާއިން އަންނަ ފަތުރުވެރިންގެ ޢަދަދުތަކަށް ބޮޑެތި ކުރިއެރުންތަކެއް ލިބިގެންދާނެކަމަށެވެ. އަދި އަމާޒަކީ އަހަރު ނިމޭއިރު ރާއްޖޭގެ ފަތުރުވެރިކަމުގެ ގަދަ 3 ޤައުމު ލިސްޓަށް އިންޑިއާ ގެނައުންކަމަށްވެސް ވަޒީރު ވަނީ ވިދާޅުވެފަައެވެ.

އަހަރުގެ މިހާތަނަށް އިންޑިއާއިން ރާއްޖެއަށް 70000އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، އެޤައުމަކީ ރާއްޖެއަށް 6 ވަނައަށް އެންމެ ގިނައިން ފަތުރުވެރިން އަންނަ ޤައުމެވެ. މިދިޔަ އަހަރު ނިމުނުއިރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ އިންޑިއާއިންނެވެ. އެ އަހަރުތެރޭ އެ ޤައުމުން ރާއްޖެއަށް 2 ލައްކައަށްވުރެ ގިނަ ފަތުރުވެރިން އައިސްފައިވެއެވެ.