އަމިއްލަ ނަފްސުގެ ދިފާޢުގައި ކަމަށް ބުނެ އެމެރިކާގެ އިސްތިޢުމާރީ ސިފައިން އަނެއްކާ ވެސް ޢިރާޤަށް ވަރުގަދަ ވައިގެ ޙަމަލާތަކެއް ދީފިއެވެ. އެމެރިކާ ސިފައިން ޢިރާޤަށް ވައިގެ ޙަމަލާތަކެއް ދީފައި ވަނީ, ފަލަސްޠީނުގެ މުޖާހިދުންގެ ޖަމާޢަތް, ޙަމާސްގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާގެ އިތުރުން ލުބްނާންގެ މުޖާހިދުންގެ ޖަމުޢިއްޔާ, ޙިޒްބުاللهގެ އިސް ކޮމާންޑަރެއް ކަމުގައިވާ ފުޢާދް ޝުކްރު ޝަހީދު ކޮށްލުމުން މެދުއިރުމަތީގެ މަސްރަޙު ހޫނުވެފައިވާ ދަނޑިވަޅެއްގައެވެ. އެ ދެ މީހުން ވެސް ޝަހީދު ކޮށްލާފައި ވަނީ އެމެރިކާއިން ވާގިވެރިވާ ޔަހޫދީ ފައުޖުންނެވެ.
ޢިރާޤުގެ ފުލުހުންނާއި ޞިއްޙީ ޚިދުމަތްތެރިން ބުނީ, އެމެރިކާ ސިފައިން ބޮން އަޅާފައި ވަނީ ވެރިރަށް ބަޣްދާދުގެ ދެކުނުގެ ސަރަޙައްދަކަށް ކަމުގައެވެ. އެއީ, ހަތިޔާރު އެޅި ސިފައިންގެ ޖަމާޢަތެއް ކަމުގައިވާ ޕޮޕިޔުލަރ މޮބިލައިޒޭޝަން ފޯސަސް (ޕީއެމްއެފު)ން ޙަރަކާތްތެރިވާ ސަރަޙައްދެކެވެ. އެމެރިކާގެ ޙަމަލާތަކުގައި އެ ޖަމާޢަތުގެ ހަތަރު ސިފައިން ޝަހީދު ކޮށްލިއެވެ. ޕީއެމްއެފް އެކުލެވިގެން ވަނީ އީރާނުން ވާގިވެރިވާ ހަތިޔާރު އެޅި ޖަމާޢަތްތަކެއްގެ މައްޗަށެވެ.
ޢިރާޤުގެ ބާބިލް ޕުރޮވިންސުގެ އަލް-މަސީބަށް ވައިގެ ޙަމަލާތަކެއް ދީފައިވާނެ ކަން ނަން ހާމަ ކޮށްފައި ނުވާ އެމެރިކާގެ އޮފިޝަލަކު ވަނީ ކަށަވަރު ކޮށްދީފައެވެ. އެއީ, އަމިއްލަ ނަފްސުގެ ދިފާޢުގައި ދީފައިވާ ޙަމަލާތަކެއް ކަމަށާއި, ޙަމަލާ އަމާޒު ކޮށްފައި ވަނީ އެމެރިކާ ސިފައިންނަށް އަމާޒުކޮށް ޑްރޯން ޙަމަލާތަކެއް ދިނުމަށް ތައްޔާރުވަމުން ދިޔަ ބަޔަކަށް ކަމުގައި ވެސް އެ އޮފިޝަލު ބުންޏެވެ. ނަމަވެސް, އެ ސަރަޙައްދަށް ދީފައިވާ ޙަމަލާގެ ޒިންމާ ޕީއެމްއެފުން އެއްވެސް ބަޔެއްގެ ކޮނޑުގައި އަޅުވާފައެއް ނުވެއެވެ.
އެމެރިކާގެ އިސްތިޢުމާރީ ސިފައިން އަލް-މަސީބަށް ދީފައިވާ ރަޙުމު ކުޑަ ޙަމަލާތައް ޢިރާޤުގެ ސަރުކާރާއި އަސްކަރިއްޔާއިން ކުށްވެރި ކުރިއެވެ. އެއީ, ކުށުގެ އަމަލެއް ކަމަށާއި އެ ޤައުމުގައި ގާއިމުވެ ތިބި އެމެރިކާ ސިފައިންގެ އޮޕަރޭޝަނާއި މެންޑޭޓުން ބޭރުން ދީފައިވާ ޙަމަލާތަކެއް ކަމުގައި ވެސް ޢިރާޤުގެ އަސްކަރިއްޔާގެ ތަރުޖަމާނު ވިދާޅުވިއެވެ.
ޢިރާޤުގައި ޙަރަކާތްތެރިވާ ހަތިޔާރު އެޅި ޖަމާޢަތްތަކުން ހުސްވި ހަފުތާގައި ޢައިން އަލް-އަސަދު އަސްކަރީ ވައިގެ ބަނދަރަށް ރޮކެޓު ޙަމަލާތަކެއް ދީފައިވެއެވެ. އެ މަރުކަޒުގައި އެމެރިކާ ސިފައިންގެ ފައުޖެއް ގާއިމު ކޮށްފައި ތިބެއެވެ. ނަމަވެސް, އެ ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ޢިރާޤުގެ ސަލާމަތީ ބާރުތަކުން ހާމަކުރިއެވެ.
އަލް-މަސީބަށް އެމެރިކާ ސިފައިން ދީފައިވާ ޙަމަލާތަކަކީ, މި އަހަރުގެ ފެބުރުވަރީ މަހަށް ފަހު ޢިރާޤުގެ ރަށަކަށް އެ މީހުން ދީފައިވާ ފުރަތަމަ ޙަމަލާތަކެވެ. ފެބުރުވަރީ މަހުގެ ތެރޭގައި އެމެރިކާގެ ފައުޖުން ވަނީ ޢިރާޤުގެ އިތުރުން ސޫރިޔާގެ 85 އަމާޒަކަށް ވަރުގަދަ ޙަމަލާތަކެއް ދީފައެވެ. އެއީ, އީރާނުން ވާގިވެރިވާ ހަތިޔާރު އެޅި ޖަމާޢަތްތަކަށް އަމާޒުކޮށް ދީފައިވާ ޙަމަލާތަކެއް ކަމުގައި އެމެރިކާއިން އެއިރު ބުންޏެވެ.
ޕީއެމްއެފަކީ ޢިރާޤުގެ އަސްކަރިއްޔާއާ ގުޅިފައިވާ 150,000އެއްހާ ސިފައިންގެ މައްޗަށް އެކުލެވިގެންވާ ޖަމާޢަތެކެވެ. އޭގެ ތެރެއިން ގިނަ މެންބަރުންނަކީ އީރާނަށް ބައިޢަތު ހިފާފައިވާ, އީރާނުގެ އިސްލާމީ އިންޤިލާބީ ލަޝްކަރު (އައިއާރްޖީސީ)އާ ގާތް ގުޅުންތަކެއް ބާއްވަމުންދާ މެންބަރުންތަކެކެވެ. އެއީ, އެމެރިކާއަށް ހަޖަމު ކުރެވޭ ފަދަ ކަމެއް ނޫނެވެ.
ޢިރާޤަކީ ޔަހޫދީންގެ އެންމެ ބޮޑު މަދަދުގާރު, އެމެރިކާގެ އިތުރުން އީރާނާ އެކު ވެސް ގާތް ގުޅުންތަކެއް ބާއްވަމުންދާ ޤައުމެކެވެ. ޢިރާޤުގައި ގާއިމު ކޮށްފައި ތިބޭ އެމެރިކާގެ އިސްތިޢުމާރީ ސިފައިންގެ ޢަދަދު 2,500އަށް އަރައެވެ. 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ލާއިންސާނީ ޢުދުވާނެއް ފެށުމާ ގުޅިގެން, ޢިރާޤުގައި ޙަރަކާތްތެރިވާ ހަތިޔާރު އެޅި ޖަމާޢަތްތަކުން އެމެރިކާ ސިފައިންނަށް އަމާޒުކޮށް ޙަމަލާ ދިނުން އިތުރު ކޮށްފައިވެއެވެ.
ޢިރާޤަށް އަރައިގަނެފައިވާ އެމެރިކާއާއި ހުޅަނގުގެ އިސްތިޢުމާރީ ސިފައިން އެ ޤައުމުން ބާލަން ޢިރާޤުގެ ސަރުކާރުން ދަނީ މަސައްކަތް ކުރަމުންނެވެ. އަދި, ޢިރާޤުގައި ހިންގަމުންދާ އަސްކަރީ ޙަރަކާތްތައް ސެޕްޓެންބަރު 25ވަނަ ދުވަހުގެ ކުރިން ނިމުމަކަށް ގެނައުމަށް ވެސް ޢިރާޤު ސަރުކާރުން ބޭނުންވެއެވެ. ނަމަވެސް, އެމެރިކާ ސިފައިން ޢިރާޤުން ފޭބުމަކީ އީރާނަށް ލިބިގެންދާނެ ކާމިޔާބީއެއް ކަމަށް އެމެރިކާއިން ދެކެއެވެ.
އެމެރިކާގެ އިސްތިޢުމާރީ ސިފައިން ޢިރާޤަށް އަރައި, އެ ޤައުމުގެ ސަރުކާރު ވައްޓައިލާފައި ވަނީ 2003ވަނަ އަހަރުއެވެ. އެމެރިކާގެ ފައުޖުތަކުން ވަނީ ޢިރާޤުގެ ކުރީގެ ރައީސް ސައްދާމް ޙުސައިން ވެސް އަވަހާރަ ކޮށްލާފައެވެ. އެ ޤައުމަށް އަރައިގަނެ, އަތްގަދަ ކުރި އެމެރިކާގެ އިސްތިޢުމާރީ ސިފައިން 2011ވަނަ އަހަރު ޢިރާޤުން ފޭބި ނަމަވެސް, 2014ވަނަ އަހަރު ދެވަނަ ފަހަރަކަށް އެމެރިކާ ސިފައިން ވަނީ ޢިރާޤަށް އަރާފައެވެ. އެ ފަހަރު އެމެރިކާ ސިފައިން ފޮނުވާފައި ވަނީ, ހައްދުފަހަނަ އެޅި ނިރުބަވެރިއައިއެސާ ޖަމާޢަތާ ދެކޮޅަށް ހަނގުރާމަ ކުރުމަށެވެ.