ޣައްޒާގައި ވެރިކަންކުރާ ޙަމާސް ޖަމާޢަތުގެ ހަތިޔާރު އެޅި ގޮފީގެ ވެރިޔާ މުޙައްމަދު ޟަޔިފް ޝަހީދު ކޮށްލާފައިވާނެ ކަމަށް ހައްދުފަހަނަ އެޅި ޔަހޫދީ ފައުޖުން ބުނެފިއެވެ. ޟަޔިފް ޝަހީދު ކޮށްލުމަށް ޔަހޫދީ ފައުޖުން ޣައްޒާގެ ޚާން ޔޫނިސަށް ރަޙުމު ކުޑަ ޙަމަލާތަކެއް ދީފައި ވަނީ ހުސްވި ޖުލައި މަހުއެވެ. 2023 އޮކްޓޫބަރު 7ގައި ޔަހޫދީންނާ ދެކޮޅަށް ޙަމާސުން ހިންގި އަސްކަރީ ޙަރަކާތް ރާވައި ހިންގުމުގައި ޞަޔިފް އިސް ދައުރެއް އަދާ ކުރައްވާފައިވާ ކަމުގައި ޔަހޫދީން ތުހުމަތު ކުރެއެވެ.
ޔަހޫދީ ފައުޖުން ބުނީ, ޟަޔިފް ޝަހީދު ކޮށްލާފައި ވަނީ ޖުލައި 13 ވަނަ ދުވަހު ޚާން ޔޫނިސަށް ދިން ޙަމަލާތަކެއްގައި ކަމުގައެވެ. އަލް-މަވާސީއަށް ޔަހޫދީ ފައުޖުން ދިން ޙަމަލާގައި 90އަށްވުރެ ގިނަ މީހުން ޝަހީދު ކޮށްލިއެވެ. ނަމަވެސް, ޔަހޫދީންގެ ޙަމަލާތަކުގައި ޟަޔިފް ޝަހީދުވި ކަން ޙަމާސުން ކަށަވަރު ކޮށްދީފައެއް ނުވެއެވެ. އެ ކަމާ ގުޅޭ ގޮތުން ޙަމާސްގެ އޮފިޝަލެއް ކަމުގައިވާ ޢިއްޒަތު ރިޝާޤު ވިދާޅުވީ, އެ ފަދަ މަޢުލޫމާތު ހާމަ ކުރާނީ ޙަމާސްގެ ސިޔާސީ ނުވަތަ ހަތިޔާރު އެޅި ގޮފީގެ އެންމެ އިސް ވެރިން ކަމުގައެވެ.
އެއީ, ޔަހޫދީ ފައުޖުން ޟަޔިފް ޝަހީދު ކޮށްލަން މަސައްކަތް ކޮށްފައިވާ ފުރަތަމަ ފަހަރެއް ނޫނެވެ. އޭނާ ޝަހީދު ކޮށްލަން ޔަހޫދީ ފައުޖުން ހަތް ފަހަރެއްގެ މަތިން މަސައްކަތް ކޮށްފައިވާއިރު, އޭގެ ކުރިން ޙަމަލާ ދީފައި ވަނީ 2021ވަނަ އަހަރުއެވެ. އޭނާއަކީ, ޔަހޫދީން ޝަހީދު ކޮށްލަން ބޭނުންވާ މުސްލިމުންގެ ލިސްޓުގެ އެންމެ ކުރީގައި އޮތް އެއް ނަމެވެ.
ޟަޔިފް ޝަހީދު ކޮށްލާފައިވާ ކަމަށް ޔަހޫދީ ފައުޖުން ބުނެފައި ވަނީ, ޙަމާސްގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ އަވަހާރަ ކޮށްލިތާ އެއް ދުވަސް ފަހުންނެވެ. ހަނިއްޔާ ޝަހީދު ކޮށްލާފައި ވަނީ އީރާނުގެ ރައީސް މަސްޢޫދު ޕީޒިޝްކިޔާން ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގެންނެވުމަށް އެ ޤައުމުގެ ވެރިރަށް ތަހްރާނަށް ކުރެއްވި ދަތުރުފުޅެއްގެ ތެރެއިންނެވެ.
ތަހްރާން ޔުނިވަރސިޓީގައި ބޭއްވި ހަނިއްޔާގެ ޖަނާޒާގައި އިމާމުވެ ކަށު ނަމާދު ކުރައްވާފައި ވަނީ އީރާނުގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަންޢީއެވެ. ހަނިއްޔާގެ ހަށިކޮޅު ފަސްދާނުލާން ހަމަޖެހިފައި ވަނީ އޭނާ ދިރިއުޅުއްވަމުން ގެންދެވި ޤަޠަރުގައެވެ. ޞަޔިފް ވެސް ޝަހީދު ކޮށްލާފައިވާނެ ކަމަށް ޔަހޫދީ ފައުޖުން ބުނެފައި ވަނީ ހަނިއްޔާގެ ޖަނާޒާއާއި ކަށު ނަމާދު ކުރިއަށް ދިޔަ ވަގުތުގައެވެ.
ހަނިއްޔާ ޝަހީދު ކޮށްލާފައި ވަނީ ޔަހޫދީ ފައުޖުން ކަމަށް ޙަމާސްގެ އިތުރުން އީރާނާއި އެކްސިސް އޮފް ރެސިސްޓެންސްގައި ހިމެނޭ ޖަމާޢަތްތަކުން ގަބޫލު ކުރެއެވެ. ނަމަވެސް, އެ ކަން ކަށަވަރު ކޮށްދޭން ޔަހޫދީ ފައުޖުން ދަނީ ދެކޮޅު ހަދަމުންނެވެ. އެއް ސަބަބަކީ, ހަނިއްޔާ ޝަހީދު ކޮށްލާފައި ވަނީ އީރާނުގެ ސިޔާދަތީ މިނިވަން ކަމަށް އަރައިގަނެ, ދީފައިވާ ޙަމަލާއެއްގައި ކަމަށް ވުމެވެ. އޭނާ ޝަހީދު ކޮށްލުމުން މުޖާހިދުންގެ ޖަމާޢަތްތަކުން ބަދަލު ހިފުމަށް ދީފާނެ ޙަމަލާއަކާ މެދު ވެސް ޔަހޫދީން ޖެހިލުންވެއެވެ.
ހަނިއްޔާ ޝަހީދު ކޮށްލުމާ ގުޅިގެން މެދުއިރުމަތީގެ މަސްރަޙު ހޫނުވެ, ޔަހޫދީންނާ މެދު އޮތް ދެކޮޅުވެރިކަން ވަނީ އެތަކެއް ގުނައަކަށް އިތުރުވެގެން ގޮސްފައެވެ. އަދި, މެދުއިރުމަތީގެ ޤައުމުތަކާއި ޔަހޫދީންނާ ދެމެދު ބޮޑު ހަނގުރާމައެއް ފެށިދާނެ ކަމުގެ ބިރު ވަނީ އިތުރުވެފައެވެ. ހަނިއްޔާ އަވަހާރަ ކޮށްލަން ދިން ޙަމަލާގެ ބަދަލު ހިފުމާ ގުޅޭ ގޮތުން ސަރަޙައްދީ ޤައުމުތަކާ އެކު މަޝްވަރާ ކުރަން އީރާނުން ތައްޔާރުވަމުންދާ ކަން އެ ޤައުމުގެ އޮފިޝަލުންތަކެއް ވަނީ ހާމަ ކޮށްފައެވެ.