ލުބްނާންގެ މުޖާހިދުންގެ ޖަމުޢިއްޔާ، ޙިޒްބުﷲގެ ހަތިޔާރު އެޅި ގޮފީގެ އިސް ކޮމާންޑަރެއް ކަމުގައިވާ ފުޢާދު ޝުކްރު ޝަހީދު ކޮށްލުމުން އެ ކަމުގެ ބަދަލު ހިފާނެ ކަމުގެ އިންޒާރު އެ ޖަމާޢަތުގެ ވެރިޔާ އަލް-ސައްޔިދް ޙަސަން ނަޞްރުﷲ ދެއްވައިފިއެވެ. ހައްދުފަހަނަ އެޅި ޔަހޫދީ ފައުޖުން ޝުކްރު ޝަހީދު ކޮށްލާފައި ވަނީ ލުބްނާންގެ ވެރިރަށް ބައިރޫތަށް ދިން ރަޙުމު ކުޑަ ޙަމަލާތަކެއްގައެވެ.
ޔަހޫދީ ފައުޖުން ޙަމަލާތައް އަމާޒު ކޮށްފައި ވަނީ ބައިރޫތުގެ ދެކުނުގައި އޮންނަ އަލް-ޟާޙިޔާގެ ޙާރަތު ޙުރަޔިކް އަވަށުގައި ހުރި ޙިޒްބުاللهގެ ޝޫރާ ކައުންސިލްގެ އިދާރާ ކައިރީގައި ހުރި އިމާރާތަކަށެވެ. ޙަމަލާތަކުގައި ޝުކްރު ޝަހީދު
ކޮށްލާފައިވާނެ ކަމުގައި ޔަހޫދީ ފައުޖުން ބުންޏެވެ. ޔަހޫދީ ފައުޖުން ބައިރޫތަށް ޙަމަލާ ދީފައި ވަނީ ވެރިވެގަނެފައިވާ ސޫރިޔާގެ އަލް-ޖޫލާންގެ އުސްބިންތަކަށް ދާދި ފަހުން ދިން ރޮކެޓް ޙަމަލާއެއްގައި ޔަހޫދީންގެ 12 މީހުން މަރުވުމުން އެ ޙަމަލާގެ ބަދަލު ހިފުމުގެ ގޮތުންނެވެ.
ޝުކްރުގެ ޖަނާޒާއަށް ފަހު ޓީވީ މެދުވެރި ކުރައްވައި ލުބްނާންގެ ރައްޔިތުންނާ މުޚާޠަބު ކުރައްވައި ވާހަކަފުޅު ދައްކަވަމުން ނަޞްރުﷲ ވިދާޅުވީ ޝުކްރު ޝަހީދު ކޮށްލުމާ އެކު ޔަހޫދީ ފައުޖުން ހުރިހާ ރަތް ރޮނގެއް ހުރަސް ކޮށްފައިވާ ކަމުގައެވެ. އަދި، ޙިޒްބުﷲގެ މުޖާހިދުންނާއި ޔަހޫދީންނާ ދެމެދު އުފެދިފައިވާ ނުތަނަވަސް ކަން އެތަކެއް ގުނައަށް އިތުރުވެގެން ގޮސްފައިވާ ކަމުގައެވެ.
ނަޞްރުﷲ ވިދާޅުވީ، ޔަހޫދީންގެ ކިބައިން ޝުކްރު ޝަހީދު ކޮށްލުމުގެ ބަދަލު ހިފަން ގިނަ ޤައުމުތަކާއި ޖަމާޢަތްތަކުން ޙިޒްބުﷲގެ ކިބައިން އެދެމުންދާ ކަމަށާއި، ޔަހޫދީންގެ ކިބައިން ބަދަލު ހިފުން ނޫން ގޮތެއް އެ ޖަމާޢަތަށް ނެތް ކަމުގައެވެ. "މި ވަގުތު އެއްވެސް މަޝްވަރާއެއް ހިނގަމުން ނުދޭ. ނަމަވެސް، ޔަހޫދީންނާ އަޅުގަނޑުމެންނާ ދެމެދު މި ވަގުތު އޮތް ދުވަސްތަކާއި ރޭތައް ގޮސް ނިމޭނީ ހަނގުރާމައިން،" ނަޞްރުﷲ އިންޒާރު ކުރެއްވިއެވެ.
ބައިރޫތަށް ޔަހޫދީ ފައުޖުން ދިން ޙަމަލާއާ ގުޅިގެން ޙިޒްބުﷲގެ އަސްކަރީ ޙަރަކާތްތައް ވަނީ މަޑު ޖައްސައިލާފައެވެ. އެ ކަމަށް އިޝާރާތް ކުރައްވައި ނަޞްރުﷲ ވިދާޅުވީ، ޔަހޫދީންނާ ދެކޮޅަށް ހިންގަމުންދާ އަސްކަރީ ޙަރަކާތްތައް މަޑުޖައްސައިލާފައި ވަނީ ޝުކްރަށް އިޙުތިރާމު ކުރުމުގެ ގޮތުން ކަމުގައެވެ.
ޝުކްރު އަވަހާރަ ކޮށްލަން ބައިރޫތަށް ޙަމަލާ ދިނުމަށް ފަހު ޔަހޫދީ ފައުޖުން ވަނީ އީރާނުގެ ވެރިރަށް ތަހްރާނަށް ވައިގެ ޙަމަލާތަކެއްދީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ވެސް ޝަހީދު ކޮށްލާފައެވެ. ހަނިއްޔާ އަވަހާރަ ކޮށްލުމުން ޙަމާސްގެ އިތުރުން އީރާނާއި، އެ ޤައުމުން ވާގިވެރިވާ އެކްސިސް އޮފް ރެސިސްޓެންސްގެ މުޖާހިދުންނާއި ހަތިޔާރު އެޅި ޖަމާޢަތްތަކުން ވަނީ ޔަހޫދީންގެ ކިބައިން ބަދަލު ހިފާނެ ކަމުގެ އިންޒާރު ދީފައެވެ.
ނަޞްރުﷲ ވިދާޅުވީ މެދުއިރުމަތީގެ މަސްރަޙުގައި އުފެދިފައިވާ ނުތަނަވަސް ކަން ހައްލު ކުރެވެން އޮތީ އެންމެ ގޮތެއް ކަމަށާއި، އެއީ ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެނައުން ކަމުގައެވެ.
2023 އޮކްޓޫބަރު 7ން ފެށިގެން ޔަހޫދީ ފައުޖުން ހިންގަމުންދާ ޢުދުވާނާއި ގަލުތުއާންމުގައި ޝަހީދު ކޮށްލާފައިވާ މުސްލިމުންގެ ޢަދަދު ވަނީ 39,480އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނޭއިރު ޒަޚަމު ކޮށްލާފައިވާ މީހުންގެ ޢަދަދު ވަނީ 91,128އަށް އުފުލިފައެވެ.