ޔަހޫދީން ހިމާޔަތް ކޮށްދޭން މެދުއިރުމައްޗަށް އިތުރު މަނަވަރުތަކާއި ހަތިޔާރު އެމެރިކާއިން ފޮނުވަނީ

ޒަޔަނިސްޓު އިސްރާއީލާއި ޔަހޫދީންގެ ހިމާޔަތާއި ރައްކާތެރިކަން ކަށަވަރު ކޮށްދޭން އިތުރު މަނަވަރުތަކާއި އަސްކަރީ މަތިންދާބޯޓުތައް މެދުއިރުމައްޗަށް ފޮނުވަން ނިންމާފައިވާ ކަން އެމެރިކާގެ ދިފާޢީ އިދާރާ, ޕެންޓެގަނުން ހާމަކޮށްފިއެވެ. މެދުއިރުމަތީގައި ހަރަކާތްތެރިވާ އަސްކަރީ މަނަވަރުތަކާއި މަތިންދާބޯޓުތައް އިތުރު ކުރަން އެމެރިކާއިން ނިންމާފައި މި ވަނީ ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ގުޅިގެން އެ ސަރަޙައްދުގެ މަސްރަޙު ހޫނުވެފައިވާ ދަނޑިވަޅެއްގައެވެ.

ދާދިފަހުން ޔަހޫދީ ފައުޖުން ވަނީ ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ އިސްވެރިޔާ އިސްމާޢީލް ހަނިއްޔާ ޝަހީދު ކޮށްލާފައެވެ. އޭނާ ޝަހީދު ކޮށްލާފައި ވަނީ އީރާނުގެ ރައީސް މަސްޢޫދު ޕީޒިޝްކިޔާން ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގެންނެވުމަށް ތަހްރާނަށް ކުރެއްވި ދަތުރުފުޅެއްގެ ތެރެއިންނެވެ. ހަނިއްޔާ ޝަހީދު ކޮށްލުމާ އެކު, މެދުއިރުމަތީގައި ނުރައްކާތެރި ހަނގުރާމައެއް ފެށިދާނެ ކަމުގެ ބިރު ވަނީ އިތުރުވެފައެވެ.

މެދުއިރުމަތީގެ ޤައުމުތަކުގައި ހަރަކާތްތެރިވާ މުޖާހިދުންނާއި ހަތިޔާރު އެޅި ޖަމާޢަތްތަކުގެ މައްޗަށް އެކުލެވިގެންވާ އެކްސިސް އޮފް ރެސިސްޓެންސުން ވަނީ ހަނިއްޔާ ޝަހީދު ކޮށްލުމުން އެ ކަމުގެ ބަދަލު ހިފާނެ ކަން އިޢުލާނުކޮށް, ޔަހޫދީންނަށް ވަރުގަދަ އިންޒާރެއް ދީފައެވެ. އެކްސިސްއަކީ ޙަމާސްގެ އިތުރުން ލުބްނާންގެ މުޖާހިދުންގެ ޖަމުޢިއްޔާ, ޙިޒްބުاللهއާއި ޔަމަނާއި ސޫރިޔާގެ އިތުރުން ޢިރާޤުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުގެ މައްޗަށް އެކުލެވިގެންވާ ބާރުގަދަ ލަޝްކަރެކެވެ.

އީރާނުން ވެސް ވަނީ ހަނިއްޔާ އަވަހާރަ ކޮށްލުމުން އެ ކަމުގެ ބަދަލު ހިފާނެ ކަމަށް ބުނެ ޔަހޫދީންނަށް އިންޒާރު ދީފައެވެ. މެދުއިރުމަތީގައި ހަރަކާތްތެރިވާ އެމެރިކާގެ އަސްކަރީ މަނަވަރުތަކާއި މަތިންދާބޯޓުތައް އިތުރު ކުރަން އެ ޤައުމުގެ ދިފާޢީ ވަޒީރު ލޮއިޑް އޮސްޓިން ނިންމަވާފައި ވަނީ, ހަނިއްޔާ އަވަހާރަ ކޮށްލުމާ ގުޅިގެން ޒަޔަނިސްޓު އިސްރާއީލާއި ޔަހޫދީންނާ ދެކޮޅަށް އެކްސިސުން ދީފައިވާ އިންޒާރުތަކާ ގުޅިގެންނެވެ. އެމެރިކާއަކީ ޔަހޫދީންގެ އެންމެ ބޮޑު އެކުވެރިޔާއެވެ.

ޕެންޓެގަނުން ބުނީ, ބެލިސްޓިކް މިސައިލް ފަދަ ހަތިޔާރު ދިފާޢުކޮށް ވައްޓަައިލުމުގެ ގާބިލު ކަން ލިބިފައިވާ ކަނޑުގެ ސިފައިންގެ ކްރޫޒަރ އަދި ޑިސްޓްރޯޔަރ މަރުކާގެ މަނަވަރުތައް މެދުއިރުމަތީގެ އިތުރުން ވިލާތުގެ ކަނޑުގެ ސަރަޙައްދުތަކަށް ފޮނުވަން ނިންމާފައިވާ ކަމުގައެވެ. އަދި, މެދުއިރުމަތީގައި ޤައުމުތަކުގައި ހުރި އެމެރިކާގެ އަސްކަރީ ވައިގެ ބަނދަރުތަކަށް އިތުރު އަސްކަރީ މަތިންދާބޯޓުތައް ފޮނުވަން ނިންމާފައިވާ ކަމުގައެވެ.

"އިސްރާއީލުގެ ދިފާޢީ ކަންކަން ހަރުދަނާ ކޮށް, އެ ޤައުމަށް ދީފާނެ ޙަމަލާތަކެއް ދިފާޢު ކުުރުމުގައި އެހީތެރިކަން ފޯރުކޮށްދިނުމުގެ ގޮތުން އެ ސަރަޙައްދުގައި އަސްކަރީ ބާރުވެރިކަން އިތުރު ކުރުމަށް އޮސްޓިން ވަނީ އަމުރު ކުރައްވާފައި،" ޕެންޓެގަނުން ނެރުނު ބަޔާނެއްގައި ބުނެފައިވެއެވެ.

ޔަހޫދީންގެ ހިމާޔަތާއި ރައްކާތެރިކަން ފޯރުކޮށްދޭން އެ ޤައުމުގެ އައްސޭރިފަށުގައި އެމެރިކާގެ ކަނޑުގެ ސިފައިންގެ އަސްކަރީ މަތިންދާބޯޓު އުފުލާ މަނަވަރު ޔޫއެސްއެސް ތިއެޑޯ ރޫޒެވެލްޓާއި, އެ ކެރިއަރ ސްޓްރައިކް ގުރޫޕުގައި ހިމެނޭ މަނަވަރުތަކާއި ސަބްމެރިންތައް މިހާރު ވެސް ދަނީ ހަރަކާތްތެރިވަމުންނެވެ. އެ މަނަވަރުތަކުގެ ބަދަލުގައި ޔޫއެސްއެސް އެބްރަހަމް ލިންކަން މަނަވަރާއި ކެރިއަރ ސްޓްރައިކް ގުރޫޕު އެ ސަރަޙައްދަށް ފޮނުވަން އޮސްޓިން ވަނީ އަމުރު ކުރައްވާފައެވެ.

އޭޕްރިލް 13ވަނަ ދުވަހު އިރާނުން ޒަޔަނިސްޓުންގެ ދަޢުލާތާ ދެކޮޅަށް ދީފައިވާ ވަރުގަދަ ޙަމަލާތައް ދިފާޢު ކުރުމަށް ވެސް އެމެރިކާއިން ވަނީ ޔަހޫދީންނަށް އެހީތެރިކަން ފޯރުކޮށްދީފައެވެ. ޔަހޫދީންނަށް ޙަމަލާ ދޭން އީރާނުން 300އަށްވުރެ ގިނަ ބެލިސްޓިކް މިސައިލާއި ޑްރޯން ބޭނުން ކޮށްފައިވާއިރު, އޭގެ ތެރެއިން ގިނަ ޙަމަލާތައް ދިފާޢު ކުރުމުގައި އެމެރިކާއިން އިސް ދައުރެއް އަދާ ކުރިއެވެ.

ޖުުލައި 31ވަނަ ދުވަހު އިސްރާއީލުގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫއަށް ފޯނުން ގުޅުއްވައި ވާހަކަފުޅު ދައްކަވަމުން ރައީސް ޖޯ ބައިޑަން ވަނީ, ޔަހޫދީންގެ ހިމާޔަތާއި ރައްކާތެރިކަން ކަށަވަރު ކޮށްދިނުމުގައި އެމެރިކާއިން ދެމި އޮންނާނެ ކަމުގެ ޔަގީންކަން އަރުވާފައެވެ. ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ އެންމެ ބޮޑު މަދަދުގާރަކީ ވެސް އެމެރިކާ އަދި ބައިޑަނެވެ.