އައްޑޫގައި ތަރައްޤީކުރާ 32 މެގަވޮޓްގެ އިންޖީނުގެއާއެކު ދާއިމީ ޙައްލު ލިބޭނެ: ފެނަކަ

އައްޑޫގައި ތަރައްޤީކުރާ 32 މެގަވޮޓްގެ އިންޖީނުގެއާއެކު، ކުރިއަށް އޮތް ދެއަހަރެއްހާ ދުވަހުގެ ތެރޭގައި އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލު ލިބޭނެކަމަށް ފެނަކަ ކޯޕަރޭޝަނުން ބުނެފިއެވެ.

ފެނަކަ ކޯޕަރޭޝަނުން ކަރަންޓުގެ ޚިދުމަތް ދެމުންދާ ސަރަޙައްދުތަކުގެ ތެރެއިން އެންމެ ހާލަތު ދަށްކޮށް އޮތީ އައްޑޫ ސިޓީގެ ގުޅިފައިވާ ރަށްތަކުގައެވެ. އައްޑޫގެ އާބަދީ 35000އިން މަތީގައި އުޅޭއިރު، ގުޅިފައިވާ 4 ރަށުގައި ބޮޑު އާބާދީއެއް ދިރިއުޅެއެވެ. ކެޕޭސިޓީ ދަށްވުމާ ނެޓްވޯކްގެ މައްސަލަތަކުގެ ސަބަބުން އައްޑޫ ސިޓީން ކަރަންޓު ކެނޑުމުގެ މައްސަލަ ކުރިމަތިވާތާ 5އަހަރަށްވުރެ ދިގު މުއްދަތެއް ވަނީ ވެފައެވެ.

އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލެއް ގެނައުމަށް ނިމުނު ސަރުކާރުގެ ކުރީކޮޅު ޗައިނާގެ ކުންފުންޏަކާއެކު އެއްބަސްވުމެއް ހެދިއެވެ. 20 މެގަވޮޓްގެ ޕަވަރ ހައުސްގެ މިމަޝްރޫޢު ކުރިއަށްގެންދަން ހަވާލުކުރީ 37 މިލިއަން ރުފިޔާއަށެވެ. ނަމަވެސް އީއައިއޭ ނުހަދާ މަޝްރޫޢު ފެށުމާއި ޕްރޮޖެކްޓްގެ ފައިނޭންސިން މައްސަލަތަކާ ގުޅިގެން މުޅި މަޝްރޫޢު ހުއްޓިފައި އޮންނަތާ ދިގު މުއްދަތެއް ވަނީ ވެފައެވެ.

މުޅި މަޝްރޫޢު 44 މިލިއަން ރުފިޔާއިން ނިމޭނެކަމަށް ލަފާކުރިއިރު، މިހާތަނަށް 76 މިލިއަނަށްވުރެ ގިނަ ރުފިޔާ މަޝްރޫޢަށް ހޭދަކޮށްފައިވާ ކަމަށް ފެނަކައިން ވަނީ ބުނެފައެވެ. ނަމަވެސް އެހާ ބޮޑު ޚަރަދެއްކޮށްގެންވެސް، މަޝްރޫޢުގެ މަސައްކަތް އޮތީ ނުނިންމައެވެ. ދަޢުރު ނިމުނުއިރުވެސް އައްޑޫ ސިޓީގެ ކަރަންޓުގެ މައްސަލައަށް އޮތީ ވަގުތީ ހައްލެއްވެސް ނުހޯދިއެވެ.

އައްޑޫ ސިޓީގެ ކަރަންޓު މައްސަލަ ހައްލުކުރުމަށް ކުރިއަށްގެންދާ މަސައްކަތާ ގުޅޭގޮތުން ވާހަކަދައްކަވަމުން ފެނަކަ ކޯޕަރޭޝަންގެ ޗީފް ޓެކްނިކަލް އޮފިސަރ ޢަބްދުﷲ ނާޝިތު ވިދާޅުވީ އައްޑޫގެ އިންޖީނުގެ މަސައްކަތް މުޅިން ނިންމާ، މުޅި ވިއުގަ އަޕްގްރޭޑްކުރުމުގެ މަސައްކަތް ޗައިނާގެ ޑޮންގް ފަންގް އިލެކްޓްރިކް ކުންފުންޏާ އަލުން ހަވާލުކުރުމުގެ މަސައްކަތްތައް ފަށާފައިވާކަމަށެވެ. އެގޮތުން އެސްޓިމޭޓްތައް ހެދުމަށް، އީއައިއޭ ރިޕޯޓް ތައްޔާރުކުރުމާއި ސަރވޭގެ މަސައްކަތްތައް ފަށާފައިވާކަމަށެވެ. މިމަޝްރޫޢު ކުރިއަށްގެންދާނީ ކޮންޓްރެކްޓަރ ފައިނޭންސް އުސޫލުންކަމަށް ނާޝިތު ވިދާޅުވިއެވެ.

"އައްޑޫ ކަރަންޓުގެ މައްސަލައަށް ދާއިމީ ހައްލެއް ލިބޭނެ މި 32 މެގަވޮޓްގެ ޕަވަރ ހައުސްއާއެކު. 1.5 ނޫނީ 2 އަހަރުން މަސައްކަތް ނިންމާނަން." ފެނަކަ ކޯޕަރޭޝަންގެ ޗީފް ޓެކްނިކަލް އޮފިސަރ އަބްދުﷲ ނާޝިތު ވިދާޅުވިއެވެ.

ނާޝިތު ވިދާޅުވީ އައު އިންޖީނުގޭގައި ބޭނުންކުރާނީ ދުނިޔޭގައި މިވަގުތު ބޭނުންކުރާ އެންމެ ފެންވަރު ރަނގަޅު ބްރޭންޑް "ވަޓްސެލާ" އިންޖީނުކަމަށެވެ. މީގެއިތުރުން މިވަގުތު އައްޑޫގައި އޮތް ކަރަންޓު ނެޓްވޯކްވެސް ޒަމާނީ ވިއުގައަށް ބަދަލުކުރުމުގެ މަސައްކަތް ކުރުމަށް ވަނީ ހަމަޖެހިފައެވެ. މިހާރު އޮތް ނެޓްވޯކަކީ ވިއްސަކަށް އަހަރުވެފައިވާ ނެޓްވޯކެކެވެ.

އައްޑޫ ސިޓީއަށް މިވަގުތު ދިމާވަމުންދާ މައްސަލަތަކަށް ވަގުތީ ހައްލުގެނައުމަށްވެސް ފެނަކައިން ދަނީ މަސައްކަތް ކުރަމުންނެވެ. އެގޮތުން އައްޑޫ ސިޓީއަށް 1.6 މެގަވޮޓްގެ އިންޖީނެއް ގެންދިއުމުގެ މަސައްކަތް މިވަގުތުވެސް ކުރިއަށްދާކަމަށާއި، އައްޑޫގެ ކަރަންޓުގެ މައްސަލައަށް ވަގުތީ ހައްލެއް މިމަހު ލިބޭނެ ކަމަށް ފެނަކައިން މަޢުލޫމާތުދެއެވެ.