ޔޫކްރެއިނުން ރަޝިޔާގެ ފައުޖުތަކާ ދެކޮޅަށް ކުރަމުންދާ ހަނގުރާމައިގައި އެފް-16 މަރުކާގެ އަސްކަރީ މަތިންދާބޯޓުތައް ބޭނުން ކުރަން ފަށައިފިއެވެ. އެއީ އެމެރިކާގެ އަސްކަރިއްޔާގެ ބޭނުމަށް އުފައްދާފައިވާ އަސްކަރީ މަތިންދާބޯޓެކެވެ. ނަމަވެސް, ޔޫކްރެއިނަށް އެ މަރުކާގެ މަތިންދާބޯޓުތައް ފޯރުކޮށްދީފައި ވަނީ ނޭޓޯގެ އެހެން މެންބަރު ޤައުމުތަކުންނެވެ.
ޔޫކްރެއިނުން އެފް-16 މަރުކާގެ އަސްކަރީ މަތިންދާބޯޓުތައް ބޭނުން ކުރަން ފަށާފައިވާ ކަން އިޢުލާނު ކުރައްވާފައި ވަނީ އެ ޤައުމުގެ ރައީސް ވޮލޮޑޮމީރް ޒެލެންސްކީއެވެ. އޭނާ ވަނީ, އެފް-16 މަރުކާގެ ބޯޓުތަކުގެ ޕައިލެޓުންނާ ބައްދަލު ކުރައްވައި, ޔޫކްރެއިނަށް ލިބިފައިވާ ހަތަރު ބޯޓު ދައްކައިލައްވާފައެވެ.
"އެފް-16ތައް ޔޫކްރެއިނަށް ލިބިއްޖެ. އެ ކަން ކުރެވިއްޖެ. މި ޖެޓުތައް ބޭނުން ކުރުމަށް ތިޔަ ބޭފުޅުން ކުރަމުންދާ ތަމްރީނުތަކާ މެދު އަޅުގަނޑު ފަޚުރުވެރި ވަން. [އެފް-16 ޖެޓުތައް] މިހާރު ވެސް ބޭނުން ކުރަން ފަށައިފިން،" ޒެލެންސްކީ ވިދާޅުވިއެވެ. ޔޫކްރެއިނަށް ލިބިފައިވާ އެފް-16 މަރުކާގެ މަތިންދާބޯޓުތައް ބަހައްޓާފައި ވަނީ ކޮން ވައިގެ ބަނދަރެއްގައި ކަން އޮތީ ސިއްރު ކޮށްފައެވެ.
އެފް-16 މަރުކާގެ މަތިންދާބޯޓުތައް ލިބުމުން ޔޫކްރެއިންގެ ވައިގެ ސިފައިންގެ ގާބިލު ކަން އެތަކެއް ގުނައަކަށް އިތުރުވެގެން ދާނެ ކަމުގައި އެ ޤައުމުގެ އަސްކަރިއްޔާގެ އިސް ކޮމާންޑަރު އޮލެކްސާންދްރަ ސިރްސްކީ ވިދާޅުވިއެވެ. "އޭގެ މާނައަކީ [ރަޝިޔާގެ] އިސްތިޢުމާރީ ފައުޖުތަކުގެ ބޮޑު ބަޔެއް ނައްތައިލެވޭނެއޭ. މާނައަކީ, ޔޫކްރެއިންގެ ރަށްތަކަށް ޙަމަލާ ދޭން ރަޝިޔާއިން ބޭނުން ކުރަމުންދާ ގިނަ ޢަދަދެއްގެ އަސްކަރީ މަތިންދާބޯޓާއި މިސައިލްތައް ނައްތައިލެވޭނެއޭ،" ސިރްސްކީ ވިދާޅުވިއެވެ.
ޔޫކްރެއިނަށް ނޭޓޯގެ މަދަދުވެރިން އެފް-16 މަރުކާގެ އަސްކަރީ މަތިންދާބޯޓުތައް ފޯރުކޮށްދޭން ފަށާފައިވީ ނަމަވެސް, މިހާތަނަށް ފޮނުވާފައިވާ ޢަދަދު ސާފެއް ނޫނެވެ. އަދި, އެ މަރުކާގެ މަތިންދާބޯޓުތައް ބޭނުން ކޮށްގެން ޔޫކްރެއިންގެ ވައިގެ ދިފާޢީ ނިޒާމު ކިހާ މިންވަރަކަށް ހަރުދަނާ ކުރެވޭނެ ކަން އަންދާޒާ ކުރަން ދަތި ކަމުގައި މަސްރަޙު ދިރާސާ ކުރާ ފަރާތްތަކުން ބުުންނެވެ. ރަޝިޔާއިން ވަނީ އެފް-16 މަރުކާގެ މަތިންދާބޯޓުތައް ބޭނުން ކުރުމާ ދެކޮޅަށް އިންޒާރުދީ, އެ ބޯޓުތަކަށް ޙަމަލާދީ ވައްޓައިލާނެ ކަމަށް ބުނެފައެވެ.
އެމެރިކާގެ ލޮކްހީޑް މާޓިން ކުންފުނިން އުފައްދާ އެފް-16 މަރުކާގެ އަސްކަރީ މަތިންދާބޯޓަކީ, ޔޫކްރެއިންގެ ވައިގެ ސިފައިން މިހާރު ބޭނުން ކުރަމުންދާ އަސްކަރީ މަތިންދާބޯޓުތަކާ އަޅައިބަލާއިރު ފަހުގެ ޒަަމާނީ އުފެއްދުމެކެވެ. އެ މަރުކާގެ މަތިންދާބޯޓުތަކަކީ 20 މިލިމީޓަރުގެ ބަޑިއެއްގެ އިތުރުން, ބޮމާއި ރޮކެޓާއި މިސައިލް ބޭނުން ކުރުމުގެ ގާބިލު ކަން ލިބިފައިވާ ނުރައްކާތެރި މަތިންދާބޯޓެކެވެ.
ޔޫކްރެއިނަށް ނޭޓޯއިން އެފް-16 މަރުކާގެ މަތިންދާބޯޓު ފޮނުވާފައިވީ ނަމަވެސް, އެ މަތިންދާބޯޓުތައް ބޭނުން ކުރުމުގައި އެ ޤައުމަށް ގިނަ ގޮންޖެހުންތަކެެއް އެބަހުއްޓެވެ. ޒެލެންސްކީ ވިދާޅުވީ, އެ އުޅަނދުތައް ބޭނުން ކުރުމުގެ ތަމްރީނު ލިބިފައިވާ ޕައިލެޓުންގެ ޢަދަދު ވަރަށް މަދު ކަމުގައެވެ. "ކުރިއަށް އޮތް ދުވަސްތަކުގައި އިތުރު މަތިންދާބޯޓުތައް ލިބޭނެ. އަދި, ޕައިލެޓުން ދަނީ ތަމްރީނު ފުރިހަމަ ކުރަމުން،" ޒެލެންސްކީ ވިދާޅުވިއެވެ.
އެފް-16ތައް ލިބުމުގެ ކުރިން ޔޫކްރެއިނުން ބޭނުން ކުރަމުން ގޮސްފައި ވަނީ ކުރީގެ ރޫސީވިލާތުގެ ޒަމާނުގައި އުފައްދާފައިވާ އަސްކަރީ މަތިންދާބޯޓުތަކެކެވެ. އޭގެ ބަދަލުގައި, ޔޫކްރެއިނަށް ޙަމަލާ ދޭން ރަޝިޔާއިން ދަނީ އެންމެ ފަހުގެ ޒަމާނީ މަތިންދާބޯޓުތައް ބޭނުން ކުރަމުންނެވެ. އަދި, ޔޫކްރެއިންގެ ވައިގެ ސަރަޙައްދުގައި ރަޝިޔާގެ އަސްކަރީ މަތިންދާބޯޓުތަކުން ދަނީ ބާރުވެރި ކަން ހިންގަމުންނެވެ.