އިނގިރޭސިވިލާތުގެ އެކި ކަންކޮޅުތަކުގައި ހަމަނުޖެހުން ހިންގައި ދަޢުލަތާއި ޢާންމުންގެ މުދަލަށް ގެއްލުން ދިނުމުގެ ފަހަތުގައި ތިބީ ކަނާތު ފިޔައިގެ ހައްދުފަހަނަ އެޅި ސިޔާސަތުތައް ކުރިއަރުވާ ކުށްވެރިންތަކެއް ކަމަށް ބޮޑުވަޒީރު ކީރް ސްޓާމަރ ސިފަ ކުރައްވައިފިއެވެ. ހަމަނުޖެހުންތައް އެންމެ ހަރުކަށި އިބާރާތުން ކުށްވެރި ކުރައްވައި ވާހަކަ ދައްކަވަމުން ސްޓާމަރ ވިދާޅުވީ, ހަމަނުޖެހުމުގައި ބައިވެރިވާ ހުރިހާ އެންމެން އިންސާފުގެ ކުރިމައްޗަށް ހާޒިރު ކުރާނެ ކަމުގައެވެ.
އިނގިރޭސިވިލާތުގެ އެކި ކަންކޮޅުތަކުގައި ހަމަނުޖެހުން ހިންގަން ފަށާފައި ވަނީ ހުޅަނގުއުތުރުގައި އޮންނަ ހާޓްލީޕޫލްގެ ރަށެއް ކަމުގައިވާ ސައުތުޕޯޓުގައި ދިން ވަޅީގެ ޙަމަލާތަކެއްގައި ތިން ކުޑަކުދިން މަރައިލުމާ ގުޅިގެންނެވެ. އެ ކުދިންގެ ގާތިލަކީ އިނގިރޭސިވިލާތަށް ހިޖުރަ ކޮށްފައިވާ މުސްލިމެއް ކަމަށް ބުނެ ސޯޝަލް މީޑިޔާގައި ދޮގު މަޢުލޫމާތުތަކެއް ވަނީ ފަތުރާފައެވެ. ނަމަވެސް, ޙަޤީޤަތަކީ, އެ އަމަލު ހިންގި 17 އަހަރުގެ އެކްސެލް ރޫޑެކުބާނާއަކީ އިނގިރޭސިވިލާތަށް އުފަން, އެ ޤައުމުގެ ރައްޔިތެއް ކަމެވެ.
އެ ހާދިސާއާ ގުޅިގެން މުޒާހަރާ ކުރަން ފުރަތަމަ ފަށާފައި ވަނީ ބޭރު ޤައުމުތަކުން އިނގިރޭސިވިލާތަށް ހިޖުރަ ކުރުމުގެ ފުރުޞަތު ދިނުމާ ދެކޮޅު ހެދުމުގެ ގޮތުންނެވެ. އަދި, އެ ޤައުމުގައި ދިރިއުޅޭ މުސްލިމުންނާ ދެކޮޅަށް އަޑު އުފުލުމުގެ ގޮތުންނެވެ. ނަމަވެސް, މުޒާހަރާގެ ބައިވެރިން ފުރަތަމަ ވެސް އަމާޒު ހިފާފައި ވަނީ މިސްކިތްތަކަށް ޙަމަލާ ދިނުމަށެވެ. މުޒާހަރާގެ ބައިވެރިން ވަނީ އެ ޤައުމުގެ އެކި ރަށްތަކުގައި ހުރި މިސްކިތްތަކަށް ގައު އުކައި, ބޮޑެތި ގެއްލުންތަކެއް ދީފައެވެ. އެ ކަމާ ގުޅިގެން ދާޚިލީ ވުޒާރާއިން ވަނީ މިސްކިތްތައް ކައިރީގައި ސަލާމަތީ ފިޔަވަޅުތައް ހަރުދަނާ ކޮށްފައެވެ.
ސައުތުޕޯޓުން ފެށި މުޒާހަރާތައް މިހާރު ވަނީ ވެރިރަށް ލަންޑަނުގެ އިތުރުން ލިވަރޕޫލާއި, ބްރިސްޓަލް އަދި މެންޗެސްޓަރއަށް ވެސް ފެތުރިފަައެވެ. އަދި, މުޒާހަރާގެ ބައިވެރިން ދަނީ ދައުލަތާއި ޢާންމުންގެ މުދަލަށް ގެންލުންދީ, މުޒާހަރާތައް ހުއްޓުވަން މަސައްކަތް ކުރަމުންދާ ފުލުހުންނާއި ކުރިމަތިލައި, ހަމަނުޖެހުން ހިންގަމުންނެވެ. އެ ހަމަނުޖެހުންތަކުގައި ގިނަ ޢަދަދެއްގެ ފުލުހުންނަށް އަނިޔާވިއެވެ.
އޮގަސްޓު 4ވަނަ ދުވަހު މުޒާހަރާގެ ބައިވެރިން ވަނީ އިނގިރޭސިވިލާތުގެ އުތުރުގައި އޮންނަ ރޮތަރަމްގައި ހުންނަ ހޮޓަލަކަށް ވެސް ޙަމަލާ ދީފައެވެ. އެއީ, އެ ޤައުމަށް ހިޖުރަކޮށް, ޙިމާޔަތް ހޯދަން މަސައްކަތް ކުރަމުންދާ ގިނަ ޢަދަދެއްގެ ބަޔަކު ބައިތިއްބާފައި ތިބި ހޮޓަލެއް ކަމުގައި ދާޚިލީ ވުޒާރާއިން ހާމަކުރިއެވެ. އެ ސަރަޙައްދުގައި ވެސް މުޒާހަރާގެ ބައިވެރިން ވަނީ ފުލުހުންނައި ކުރިމަތިލައި, ހަމަނުޖެހުން ހިންގާފައެވެ. ހޮޓަލުގައި ހުޅުޖަހަން ވެސް މުޒާހަރާގެ ބައިވެރިން މަސައްކަތް ކުރިއެވެ. ރޮތަރަމްގައި ހިނގި ހަމަނުޖެހުންތަކުގައި 10 ފުލުހަކަށް ބޮޑެތި އަނިޔާތަކެއް ލިބުނެވެ.
"ކަނާތު ފިޔައިގެ ހައްދުފަހަނަ އެޅި ސިޔާސަތުތަކަށް ތަޢީދު ކުރާ ކުށްވެރިންތަކެއް ހިންގަމުންދާ ހަމަނުޖެހުންތައް އެންމެ ހަރުކަށި އިބާރާތުން ކުށްވެރި ކުރަން. އެއްވެސް ޝައްކެއް ނުކުރާތި, ހަމަނުޖެހުން ހިންގުމުގައި ބައިވެރިވާ އެންމެންނާ ދެކޮޅަށް ޤާނޫނީ ފިޔަވަޅު އަޅާނަން،" މުޒާހަރާގެ ބައިވެރިންނަށް އިންޒާރު ކުރައްވައި ސްޓާމަރ ވިދާޅުވިއެވެ. ހަމަނުޖެހުންތަކާ ގުޅިގެން ޢާންމުންގެ ހިތްތަކުގައި ބިރުވެރިކަން އުފެދިފައިވާ ކަމުގައި ވެސް އޭނާ ވިދާޅުވިއެވެ.
އިނގިރޭސިވިލާތުގެ ފުލުހުންގެ އިދާރާތަކުގެ ވެރިންގެ ޤައުމީ ކައުންސިލުން ބުނީ އޮގަސްޓު 3ވަނަ ދުވަހުން ފެށިގެން މިއަދާ ހަމައަށް 147 މީހުން ހައްޔަރު ކޮށްފައިވާ ކަމުގައެވެ. އަދި, މުޒާހަރާތަކުގެ ތެރެއިން ހަމަނުޖެހުން ހިންގަމުންދާ އިތުރު މީހުން ހައްޔަރު ކުރާނެ ކަމުގެ އިންޒާރު ވެސް އެ ކައުންސިލުން ކުރިއެވެ. ހަމަނުޖެހުންތައް ހުއްޓުވަން ގިނަ ޢަދަދެއްގެ ފުލުހުން ދަނީ މަގުތަކުގައި ހަރަކާތްތެރިވަމުންނެވެ.
"މުޒާހަރާގެ ބައިވެރިން ހިންގަމުންދާ ހަމަނުޖެހުންތަކުން ހާސިލު ކުރެވުނު ހަމައެކަނި ކަމަކީ, ދަޢުލަތާއި ޢާންމުންގެ މުދަލަކަށް ބޮޑެތި ގެއްލުންތަކެއްދީ, ޢާންމު ރައްޔިތުންގެ ހިތްތަކުގައި ބިރުވެރިކަމާއި ނުތަނަވަސް ކަން އުފެއްދުން،" ދެކުނު ޔޯކްޝަރ ފުލުހުންގެ އިދާރާގެ އެސިސްޓެންޓް ޗީފް ކޮންސްޓަބަލް ލިންޑްސޭ ބަޓަރފީލްޑް ވިދާޅުވިއެވެ.
އިނގިރޭސިވިލާތުގައި މި ފަދަ ނުރައްކާތެރި ހަމަނުޖެހުންތަކެއް އެންމެ ފަހުން ހިނގާފައި ވަނީ 2011ވަނަ އަހަރުއެވެ. އެ ފަހަރު ހަމަނުޖެހުންތައް ފެށުނީ, ފުލުހުން ބަޑިން ޙަމަލާދީ ކަޅު ނަސްލުގެ ފިރިހެނެއް މަރައިލުމުންނެވެ. އެ ކަމާ ދެކޮޅަށް އަޑުއުފުލަން ވެސް އެތަކެއް ހާސް ބަޔަކު އިނގިރޭސިވިލާތުގެ ބޮޑެތި ރަށްތަކުގެ މަގުތަކަށް އެއްވިއެވެ.