ނޮވެންބަރުގައި އެމެރިކާގައި ބާއްވާ ރިޔާސީ އިންތިޚާބުގައި ޑިމޮކްރެޓިކް ޕާޓީގެ ފަރާތުން ވާދަ ކުރައްވާ ނައިބު ރައީސް ކަމަލާ ހެރިސްގެ ރަނިންގ މޭޓެއްގެ ގޮތުގައި މިނެސޯޓާގެ ގަވަރުނަރު ޓިމް ވޯލްޒް ކަނޑައަޅައި ދެ ބޭފުޅުން އެކުގައި ކެމްޕޭން ފައްޓަވައިފިއެވެ. ރަނިންގ މޭޓުގެ ގޮތުގައި ވޯލްޒް ކަނޑައެޅުމަށް ފަހު ދެ ބޭފުޅުން އެކުގައި ފުރަތަމަ ފަހަރަށް ކެމްޕޭންގައި ފެނިގެން ދިޔައީ ފިލަޑެލްފިޔާގައި ބޭއްވި ކެމްޕޭން ޖަލްސާއަކުންނެވެ.
ވޯލްޒަކީ 24 އަހަރު އެމެރިކާގެ އަސްކަރިއްޔާގައި, އަދި 2006ވަނަ އަހަރުން ފެށިގެން 2018ވަނަ އަހަރާ ޖެހެންދެން އެމެރިކާގެ ޤާނޫނު ހަދާ މަޖިލީހުގެ ތިރިގެ, ހައުސް އޮފް ރެޕްރެޒެންޓެޓިވްސްގައި އަގުހުރި ޚިދުމަތްތަކެއް ކުރައްވާފައިވާ ބޭފުޅެކެވެ. އޭގެ ކުރިން އޭނާ ވަނީ ސޯޝަލް ސްޓަޑީޒް މުދައްރިސެއްގެ ގޮތުގައި ހައި ސްކޫލެއްގައި އެތަކެއް އަހަރަކު މަސައްކަތް ކުރައްވާފައެވެ. މިނެސޯޓާގެ ގަވަރުނަރުގެ މަޤާމުގައި އޭނާ ވަނީ ގިނަގުނަ ހެޔޮ ބަދަލުތަކެއް އެ ސްޓޭޓްގެ ރައްޔިތުންނަށް ހޯދައިދެއްވާފައެވެ.
އޭގެ ތެރެއިން ފާހަގަ ކޮށްލެވޭ ބައެއް ކަންކަމުގެ ތެރޭގައި, މަދަރުސާތަކުގެ ދަރިވަރުންނަށް ހިލޭ ކެއުން ފޯރުކޮށްދިނުމާއި, ދަރިމައިވުމުގެ ޞިއްޙަތުގެ ޙައްޤުތައް އަންހެނުންނަށް ކަށަވަރު ކޮށްދިނުމާއި, އިޔާދަ ކުރަނިވި ހަކަތައަށް ބަރޯސާވާ މިންވަރު އިތުރު ކުރުމާއި, މެދު މިނުގެ އާމްދަނީ ލިބޭ ޢާއިލާތަކުން ޓެކުސް ދައްކަން ޖެހޭ މިންވަރު ކުޑަ ކުރުމާއި, ވަޒީފާ އަދާ ކުރާ މީހުންނަށް ލިބޭ ޗުއްޓީ އިތުރު ކޮށްދިނުން ހިމެނެއެވެ.
"[ސިޔާސީ މައިދާނުގައި] ވާދަ ކުރަން އަޅުގަނޑަށް ހިތްވަރު ދިނީ އަޅުގަނޑުގެ ދަރިވަރުން. ދަރިވަރުން ބުނީ, އެ ފަދަ މަޤާމަކަށް އެންމެ އެކަށީގެންވާނީ ޚުލްޤު ހެޔޮ މީހެކޭ. އެ ސިފަތައް އަޅުގަނޑުގެ ކިބައިން ފެނެޔޭ،" ޓެމްޕްލް ޔުނިވަރސިޓީގައި ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުން ވޯލްޒް ވިދާޅުވިއެވެ.
ވޯލްޒްގެ ފުރަތަމަ ކެމްޕޭން ޖަލްސާގައި އޭނާ ފެނިގެން ދިޔައީ ވަރަށް ދޫހެލޭ, ޖެހިލުން ކުޑަ ބޭފުޅެއްގެ ގޮތުގައެވެ. އަދި, އިންތިޚާބުގައި ވާދަކުރައްވާ ރިޕަބްލިކަން ޕާޓީގެ ކެނޑިޑޭޓު, ކުރީގެ ރައީސް ޑޮނަލްޑް ޓްރަމްޕާއި ރަނިންގ މޭޓު, ސެނެޓަރ ޖޭޑީ ވޭންސަށް ބަހުގެ ޙަމަލާތައް އަމާޒު ކުރައްވަން އޭނާ ލަހެއް ނުކުރެއްވިއެވެ.
"އެއީ [ޓްރަމްޕަކީ] އަޅުގަނޑުމެންގެ ޤާނޫނުތަކަށް ހަޖޫ ޖައްސަވާ ބޭފުޅެއް. އޭނާގެ ހަމައެކަނި އަމާޒަކީ ބައިބައިވުން އުފެއްދުން. ހަމަނުޖެހުމަށް މަގު ކޮށައިދިނުން. ކޮވިޑް-19ގެ ކުރިމަތީގައި އޭނާ ހުންނެވީ ހުއްޓުން އަރާފައި. މި ޤައުމުގެ އިޤުތިޞާދު ފުން ވަޅުގަނޑަކަށް ވައްޓައިލެއްވި. އެއްވެސް ޝައްކެއް ނެތް! އަނިޔާވެރި ކުށްތަކުގެ ޢަދަދު އެންމެ ގިނަވެގެން ދިޔައީ ޓްރަމްޕްގެ ވެރިކަމުގައި. އޭނާ ކުރައްވާފައިވާ ކުށްތައް ގުނައި ޢަދަދު ކުރަން ނޭނގޭ،" ޓްރަމްޕަށް ބަހުގެ ޙަމަލާތައް އަމާޒު ކުރައްވަމުން ވޯލްޒް ވިދާޅުވިއެވެ.
މީގެ އިތުރުން ވޯލްޒް ވަނީ އަންހެނުންގެ ޙައްޤުތައް ހަނިކުރުމަށް ޓްރަމްޕްގެ ރިޕަބްލިކަން ޕާޓީން ގެންގުޅޭ ސިޔާސަތުތަކަށް ވަރަށް ބޮޑަށް ފާޑު ވިދާޅުވެފައެވެ. އަދި, ސުޕްރީމް ކޯޓަށް ޓްރަމްޕް ޢައްޔަން ކުރައްވާފައިވާ ފަނޑިޔާރުންނަށް ފާޑުވިދާޅުވެ ވާހަކަފުޅު ދައްކަވަމުން އޭނާ ވަނީ "އެހެން މީހުންގެ އަމިއްލަ މަސްލަޙަތަށް އަރައިގަތުން ހުއްޓައިލުމަށް" ފަނޑިޔާރުންނަށް ގޮވައިލައްވާފައެވެ.
ޑިމޮކްރެޓިކް ޕާޓީގެ ކެނޑިޑެސީ ހެރިސަށް ލިބިވަޑައިގަތީ, ރައީސް ޖޯ ބައިޑަން އެ މަޤާމުން ފެޔަށް ޖެހިވަޑައިގަންނަވަން މީގެ ދެ ހަފުތާއެއްހާ ދުވަސް ކުރިން ނިންމެވުމުންނެވެ. ކެމްޕޭން ޖަލްސާގައި ވާހަކަފުޅު ދައްކަވަމުން ހެރިސް ވަނީ ޤައުމަށް ޚިދުމަތް ކުރެއްވުމުގައި އެކި ދާއިރާތަކުގައި ވޯލްޒް ކުރައްވާފައިވާ މަސައްކަތް ފާހަގަ ކުރައްވާފައެވެ. އަދި, ކުރިއަށް އޮތް އިންތިޚާބު ކާމިޔާބު ކުރައްވައި, ނައިބު ރައީސް ކަމުގެ މަޤާމުގައި ޤައުމަށް ޚިދުމަތް ކުރެއްވުމުގެ ޝަރަފު އޭނާ ހޯއްދަވާނެ ކަމުގައި ވެސް ހެރިސް ވިދާޅުވިއެވެ.
ރަނިންގ މޭޓަކު ކަނޑައެޅުމުގައި ހެރިސް އިސްކަން ދެއްވާފައިވާ ބައެއް ކަންކަމުގެ ތެރޭގައި އަސްކަރިއްޔާގައި ޚިދުމަތް ކުރުމާއި, ރަށްފުށު ސަރަޙައްދުތަކުގައި ދިރިއުޅޭ މީހުންނާއި ދޮން ނަސްލުގެ ވޯޓުލާ މީހުންގެ ތާޢީދު އިތުރު ކުރެވޭނެ ކެނޑިޑޭޓަކު ހޯއްދެވުން ހިމެނުނު ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ. ވޯލްޒަކީ އެ ހުރިހާ ޝަރުޠުތަކެއް ފުރިހަމަވާ ބޭފުޅެއް ކަން ފާހަގަ ކުރެވެއެވެ. ރަނިންގ މޭޓެއްގެ ގޮތުގައި ވޯލްޒް އިޢުލާނު ކުރުމާ އެކު, ޑިމޮކްރެޓިކް ޕާޓީގެ ކެމްޕޭނަށް އިތުރު 20 މިލިޔަން ޑޮލަރުގެ ފައިސާގެ އެހީ ލިބިފައިވާ ކަން ވެސް ހެރިސްގެ ކެމްޕޭން އޮފީހުން ހާމަކުރިއެވެ.
ހައުސް އޮފް ރެޕްރެޒެންޓެޓިވްސަށް ވޯލްޒް އިންތިޚާބުވެ ވަޑައިގަންނަވާފައި ވަނީ 2006ވަނަ އަހަރުއެވެ. އޭނާ އިންތިޚާބު ކާމިޔާބު ކުރައްވާފައި ވަނީ ރިޕަބްލިކަން ޕާޓީގެ ތާޢީދު އޮތް ދާއިރާއަކުންނެވެ. އެ މަޤާމުގައި ވޯލްޒް ވަނީ 12 އަަހަރު ޚިދުމަތް ކުރައްވާފައެވެ. އަދި, މިނެސޯޓާގެ ގަވަރުނަރުގެ މަޤާމަށް ވޯލްޒް އިންތިޚާބުވެ ވަޑައިގަތީ 2018ވަނަ އަހަރުއެވެ. އެއަށްފަހު, 2022ވަނަ އަހަރު އޭނާ ވަނީ ދެވަނަ ދައުރެއް ވެސް ކާމިޔާބު ކުރައްވާފައެވެ.