ނޭޕާލުގައި ދަތުރުކުރަމުންދިޔަ ހެލިކޮޕްޓަރެއް ވެއްޓި އެއިން ދަތުރުކުރި އެންމެން މަރުވެއްޖެއެވެ. ފަސް މީހުންނާ އެކު ދަތުރުކުރަމުންދިޔަ ހެލިކޮޕްޓަރު ވެއްޓިފައި ވަނީ ނޭޕާލުގެ ވެރިރަށް ކަތަމަންޑޫގެ ޖަންގަލި ސަރަޙައްދަކަށެވެ.
ޑައިނެސްޓީ އެއަރ ނަމަކަށް ކިޔާ ކުންފުންޏަކުން ދުއްވާ އެ ހެލިކޮޕްޓަރު ވެއްޓިފައި ވަނީ އުދުއްސާލިތާ މާ ގިނަ އިރުތަކެއް ނުވަނީހެވެ. އެ ހާދިސާގައި މަރުވެފައި ވަނީ ޗައިނާގެ ހަތަރު މީހުންނާއި ނޭޕާލް މީހެކެވެ. މަރުވި ޗައިނާ މީހުންގެ ތެރޭގައި އަންހެނެއް ވެސް ހިމެނެއެވެ.
ނޭޕާލަކީ ވައިގެ ދަތުރުފަތުރުގެ ސިނާޢަތުގެ ސަލާމަތީ ކަންކަން ދަށް ޤައުމެއްގެ ގޮތުގައި ފާހަގަ ކުރެވޭ ޤައުމެކެވެ. 2000ވަނަ އަހަރަށް ފަހު އެ ޤައުމުގައި ހިނގާފައިވާ ވައިގެ އުދުހުންތަކުގެ އެކްސިޑެންޓުތަކުގައި މަރުވި މީހުންގެ ޢަދަދު 350އަށްވުރެ އިތުރެވެ.
އޭގެ ތެެރެއިން އެންމެ ނުރައްކާތެރި ހާދިސާ ހިނގާފައި ވަނީ 1992ވަނަ އަހަރު ޕާކިސްތާން އިންޓަރނޭޝަނަލް އެއަރލައިންސްގެ މަތިންދާބޯޓެއް ވެއްޓުނު ހާދިސާއެވެ. ކަތަމަންޑޫ ވައިގެ ބަނދަރުގައި ޖައްސަން ދިޔަ މަތިންދާބޯޓު ވެއްޓުނު އެ ހާދިސާގައި 167 މީހުން މަރުވިއެވެ. 2023ވަނަ އަހަރުގެ ޖަނަވަރީ މަހު ޔެޓީ އެއަރލައިންސްގެ މަތިންދާބޯޓެއް ވެއްޓުނު ހާދިސާއެއްގައި ވެސް 72 މީހުން މަރުވިއެވެ.
ދުނިޔޭގެ އެންމެ އުސް 14 ފަރުބަދަ ހުންނަނީ ނޭޕާލުގައެވެ. ފަރުބަދަތަކާއި ވާދީތައް ގިނަ ޤައުމެއް ކަމުގައިވާ ނޭޕާލުގައި ޤާއިމުކޮށްފައި ވަނީ ކުދިކުދި ވައިގެ ބަނދަރުތަކެކެވެ. އެ ޤައުމުގެ އެތެރޭގެ އުދުހުންތަކުގައި ޢާންމުކޮށް ބޭނުންކުރަނީ ކުދި މަތިންދާބޯޓާއި ހެލިކޮޕްޓަރެވެ.