ފަލަސްޠީނުގެ މިނިވަން ކަމަށް މަސައްކަތްކުރާ މުޖާހިދުން ދޭނެ ކަމަށް ބުނެފައިވާ ޙަމަލާއަށް ތައްޔާރުވުމުގެ ގޮތުން ޔަހޫދީން ފިޔަވަޅުތައް އަޅަން ފަށައިފިއެވެ. ޔަހޫދީން ތައްޔާރީ ފިޔަވަޅުތައް އަޅަން ފަށާފައި ވަނީ, ފަލަސްޠީނުގެ ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލުމުން އެ ކަމުގެ ބަދަލު ހިފާނެ ކަމުގެ އިންޒާރު އީރާނާއި އެކްސިސް އޮފް ރެސިސްޓެންސްގައި ހިމެނޭ ޖަމާޢަތްތަކުން ދީފައިވާ ދަނޑިވަޅެއްގައެވެ. ހަނިއްޔާ ޝަހީދު ކޮށްލާފައި ވަނީ އީރާނުގެ ރައީސް މަސްޢޫދު ޕީޒިޝްކިޔާން ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގެންނެވުމަށް ތަހްރާނަށް ކުރެއްވި ދަތުރުފުޅުގެ ތެރެއިންނެވެ.
މުޖާހިދުންގެ އިންޒާރާ އެކު ވަރުގަދަ އަދި ނުރައްކާތެރި ޙަމަލާތަކެއް ދީފާނެ ކަމަށް ބަލައި ޔަހޫދީންގެ ރަށްތައް ވަނީ ތައްޔާރީ ޙާލަތަކަށް ގެނެސްފައެވެ. އަދި, އަޅާފައިވާ ބައެއް ފިޔަވަޅުތަކުގެ ތެރޭގައި, ޙަމަލާއެއްގައި ޒަޚަމުވެދާނެ މީހުންނަށް ފަރުވާ ދިނުމަށް ބޭނުންވާނެ ލޭ ހޯދައި, ބިންގަރާސްތަކުގައި ރައްކާ ކުރުމާއި, ކާރުޚާނާތަކުގައި ހުރި އަލިފާން ހިފާ ފަދަ ނުރައްކާތެރި ސާމާނު ރައްކާތެރި ސަރަޙައްދުތަކަށް ބަދަލު ކުރުން ހިމެނެއެވެ.
އޭގެ އިތުރުން, ބޮމުގެ ޙަމަލާތަކުން ރައްކާތެރިކަން ހޯދަން ބިނާ ކޮށްފައިވާ ބިންގަރާސްތަކުގެ ޙާލަތު ވަޒަން ކުރުމާއި ޙަމަލާ ދީފާނެ ކަމަށް ބެލެވޭ ރަށްތަކުގައި ސާފު ބޯފެން ރައްކާ ކުރުމަށް ވެސް ޚާއްޞަ މަސައްކަތްތަކެއް ވަނީ ފަށާފައެވެ. އަދި, ޔަހޫދީ ދައުލަތުގެ އެކި ކަންކޮޅުތަކުގައިވާ ހަސްފަތާލުތައް ވަނީ ތައްޔާރީ ޙާލަތަކަށް ގެނެސްފައެވެ.
2023 އޮކްޓޫބަރު 7 ވަނަ ދުވަހު ޔަހޫދީންގެ އަޅުވެތިކަމަށް ކެތް ނުކުރެވިގެން ޙަމާސްގެ މުޖާހިދުން ތެދުވެ ޔަހޫދީންގެ ރަށްތަކަށް ދިން ވަރުގަދަ ޙަމަލާއާ ގުޅިގެން ވެސް ޔަހޫދީން ވަނީ ރައްކާތެރި ކަމުގެ ފިޔަވަޅުތައް ހަރުދަނާ ކުރަން މަސައްކަތް ފަށާފައެވެ. ނަމަވެސް, އެ މަސައްކަތްތައް އަވަސް ކުރަން ފަށާފައި ވަނީ, ހަނިއްޔާ ޝަހީދު ކޮށްލުމުގެ އިތުރުން, ލުބްނާންގެ ވެރިރަށް ބައިރޫތަށް ޙަމަލާދީ މުޖާހިދުންގެ ޖަމާޢަތް, ޙިޒްބުاللهގެ އަސްކަރީ ކޮމާންޑަރު ފުޢާދު ޝުކްރު ޝަހީދު ކޮށްލުމަށް ފަހުއެވެ.
އެ ދެ ބޭފުޅުން ޝަހީދު ކޮށްލުމުން މެދުއިރުމަތީގެ މަސްރަޙު ވަނީ އިތުރަށް ހޫނުވެފައެވެ. އަދި, ޔަހޫދީންގެ ހިމާޔަތާއި ރައްކާތެރިކަން ކަށަވަރު ކޮށްދޭން އެ މީހުންގެ އެންމެ ބޮޑު މަދަދުގާރު, އެމެރިކާއިން ވަނީ ތެޅިގަނެފައެވެ. އެމެރިކާގެ ދިފާޢީ އިދާރާ, ޕެންޓެގަނުން ބުނީ ޔަހޫދީންނަށް ރައްކާތެރިކަން ކަށަވަރު ކޮށްދިނުމުގެ ގޮތުން މެދުއިރުމައްޗަށް އިތުރު އަސްކަރީ މަނަވަރުތަކާއި މަތިންދާބޯޓުތައް ފޮނުވުމުގެ މަސައްކަތް ފަށާފައިވާ ކަމުގައެވެ.
ޣައްްޒާގެ މުސްލިމުންނާ ދެކޮޅަށް ފެށި ލާއިންސާނީ ޢުދުވާނާ ގުޅިގެން ޔަހޫދީންނަށް ވަނީ ހުރިހާ ފަރާތަކުން ހަނގުރާމައެއްގެ ބިރާ ކުރިމަތިވެފައެވެ. ޙަމާސަށް ވާގިވެރިވުމުގެ ގޮތުން ޙިޒްބުاللهން ވެސް ދަނީ މެދުކެނޑުމެއް ނެތި ޔަހޫދީންގެ ރަށްތަކާއި ހައްދުފަހަނަ އެޅި ސިފައިންނަށް އަމާޒުކޮށް ޙަމަލާ ދެމުންނެވެ. އޭގެ އިތުރުން, ޔަހޫދީ ރަށްތަކަށް މުދާ ގެންދާ ބޯޓުފަހަރަށް ހުރަސް އެޅުމުގެ ގޮތުން ޔަމަންގެ ޙޫޘީ ޖަމާޢަތުން ދަނީ ރަތް ކަނޑުގައި އަސްކަރީ ޙަރަކާތެއް ހިންގަމުންނެވެ.
ހަނިއްޔާ ޝަހީދު ކޮށްލުމުގެ ޒިންމާ އުފުލަން ޔަހޫދީން ދަނީ ދެކޮޅު ހަދަމުންނެވެ. އެއް ސަބަބަކީ, މުޖާހިދުންގެ ޖަމާޢަތްތަކުން ޔަހޫދީންނަށް އަމާޒުކޮށް ދީފާނެ ވަރުގަދަ އަދި ނުރައްކާތެރި ޙަމަލާއަކާ މެދު ޖެހިލުންވުމެވެ. އީރާނުން ދާދި ފަހުން ޔަހޫދީންގެ ރަށްތަކަށް އަމާޒުކޮށް ވަރުގަދަ ޙަމަލާތަކެއް ދީފައިވެއެވެ. އެ ގޮތުން 300 ބެލިސްޓިކް މިސައިލާއި ޑްރޯން ބޭނުން ކޮށްގެން ދީފައިވާ ޙަމަލާތަކުން ޔަހޫދީން ދިފާޢު ކޮށްދީފައި ވަނީ އެމެރިކާއާއި ޔަހޫދީންގެ އެހެން މަދަދުގާރުންނެވެ.
ޣައްޒާ ޢުދުވާނާ ގުޅުވައި ޙިޒްބުاللهގެ މުޖާހިދުން ޔަހޫދީންގެ އުތުރުގެ ރަށްތަކަށް ޙަމަލާ ދޭން ފެށުމުން އެ ސަރަޙައްދުތަކުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލު ކޮށްފައިވެއެވެ. ނަމަވެސް, އެއަށްވުރެ ދުރުގައި އޮތް ޚައިފާގެ ބަނދަރަށް ވެސް ދާދިފަހުން ޙިޒްބުاللهން ވަނީ ވަރުގަދަ ޙަމަލާތަކެއް އަމާޒު ކޮށްފައެވެ. އެއާއެކު އެ ސަރަޙައްދުގައި ދިރިއުޅޭ ޔަހޫދީންގެ ރައްކާތެރިކަން ކަށަވަރު ކޮށްދޭން ޔަހޫދީ ފައުޖުން މިހާރު ދަނީ މަސައްކަތް ކުރަމުންނެވެ.
މުޖާހިދުންގެ ޙަމަލާއަކަށް ޖެހިލުންވެ, ޔަހޫދީންގެ ރައްކާތެރިކަން ކަށަވަރު ކޮށްދިނުމުގެ ގޮތުން ޚައިފާގައި ހުރި ބޮމުން ސަލާމަތް ވުމަށް ޤާއިމު ކޮށްފައިވާ ބިންގަރާސްތައް ވެސް ވަނީ ޒަމާނީ އާލާތްތަކާ އެކު އިތުރަށް ތަރައްޤީ ކޮށްފައެވެ. އަދި, ވައިގެ ޙަމަލާގެ އިންޒާރު ދޭ ނިޒާމު އިތުރަށް ހަރުދަނާ ކުރުމަށް ވެެސް ޔަހޫދީން ދަނީ މަސައްކަތް ކުރަމުންނެވެ. ޒަރޫރީ ބޭނުމެއް ނެތް ނަމަ ގެއިން ބޭރުގައި ގިނަ ވަގުތު ހޭދަ ނުކުރުމަށް ވެސް ޔަހޫދީ ފައުޖުން ވަނީ ޚައިފާގެ ރައްޔިތުންނަށް އިލްތިމާސް ކޮށްފައެވެ. އަދި, ބިންގަރާސްތަކުގައި ބިނާ ކޮށްފައިވާ އެއްގަމު އުޅަނދު ޕާކު ކުރާ ޕާކިންގ ޒޯނުތައް ވެސް ވަނީ ބޮމް ޝެލްޓަރގެ ގޮތުގައި ބޭނުން ކުރުމަށް ބަދަލު ކޮށްފައެވެ.
ބޮޑު ބިރުވެރިކަމެއްގެ ތެރޭގައި ދިރިއުޅެން ޖެހުނު ނަމަވެސް މީގެ 10 މަސް ކުރިން ފެށި ޣައްޒާ ޢުދުވާން ހުއްޓައިލުމުގެ އެއްވެސް ވިސްނުމެއް ޔަހޫދީންގެ ކިބައިގައި ނެތެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 39,677އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޤަބޫލު ކުރެވެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 91,645އަށް އުފުލިފައެވެ.