ޖަޕާނަށް ސުނާމީއެއް އަރާފާނެ ކަމުގެ އިންޒާރު ދީފިއެވެ. ޖަޕާނުގައި ސުނާމީގެ އިންޒާރު ދީފައި ވަނީ އެ ޤައުމުގެ ހުޅަނގު ދެކުނުގައި އޮންނަ ކިޔުޝޫއަށް ބާރުގަދަ ބިންހެލުމެއް އައުމާއެކުވެ.
ޖަޕާނުގެ މޫސުމާ ބެހޭ އިދާރާއިން ބުނީ އެ ޤައުމަށް ރިކްޓަރ މިންގަނޑުން 7.1ގެ ބާރުގަދަ ބިންހެލުމެއްގެ އަސަރު ކޮށްފައިވާ ކަމަށެވެ. ނަމަވެސް ބިންހެލުމުގެ ސަބަބުން ލިބުނު ގެއްލުން އަދި ވަޒަން ނުކުރެވޭ ކަމަށް ވެސް އެ އިދާރާއިން ބުނެއެވެ.
ޖަޕާނުގެ ދައުލަތުގެ ޓީވީ ކަމުގައިވާ އެންއެޗްކޭއިން ބުނެފައިވާ ގޮތުގައި ބިން ހެލުން އައި ސަރަޙައްދުގެ ލޮނުގަނޑު ވަނީ 50 ސެންޓިމީޓަރަށް އުފުލިފައެވެ.
ޖަޕާނުގެ ކެބިނެޓް ސެކެޓްރީ ޔޮޝިމާސާ ހަޔަޝީ ވިދާޅުވީ ބިންހެލުމުގެ ސަބަބުން އެ ޤައުމުގެ ނިޔުކްލިއަރ ރިއެކްޓަރުތަކަށް އެއްވެސް ގެއްލުމެއް ލިބިފައިވޭތޯ ބަލަމުންދާ ކަމަށެވެ.
މިދިޔަ ޖަނަވަރީ މަހުގެ ތެރޭގައި ޖަޕާނަށް އައި ރިކްޓަރ މިންގަނޑުން 7.5ގެ ބާރުގަދަ ބިންހެލުމެއްގައި 300އެއްހާ މީހުން މަރުވެފައިވެއެވެ.