އިސްތިޢުފާ ދެއްވުމަށް ފަހު ޤައުމު ދޫކޮށް އިންޑިޔާއަށް ވަޑައިގަންނަވާފައިވާ ބަންގްލަދޭޝްގެ ކުރީގެ ބޮޑުވަޒީރު ޝައިޚް ޙަސީނާ އަމަލު ކުރައްވަން ރާއްވަވާފައިވާ ގޮތް ނޭނގޭ ކަމަށާއި, ޙަސީނާގެ އަމިއްލަ މަސްލަޙަތާ ގުޅޭ ކަންކަމުގައި ބަސްބުނަން ބޭނުން ނުވާ ކަމުގައި އިންޑިޔާއިން ބުނެފިއެވެ. ޙަސީނާ އިސްތިޢުފާ ދެއްވާފައި ވަނީ ބަންގްލަދޭޝްގެ ކޮލެޖުތަކާއި ޔުނިވަރސިޓީތަކުގެ ދަރިވަރުން ޖުލައި މަހުން ފެށިގެން އޭނާގެ ސަރުކާރާ ދެކޮޅަށް ކުރަމުން ދިޔަ މުޒާހަރާތަކާ ގުޅިގެންނެވެ.
ޖުލައި މަހުގެ މެދެއްހާ ހިސާބުގައި ދަރިވަރުން މުޒާހަރާ ކުރަން ފަށާފައި ވަނީ ސަރުކާރުގެ ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށެވެ. ނަމަވެސް, އެ މުޒާހަރާތައް ރޫޅައިލަން ފުލުހުން ބާރުގެ ބޭނުންކޮށް, ގިނަ ޢަދަދެއްގެ ދަރިވަރުން މަރައިލުމުން މުޒާހަރާތައް ހޫނުވެ, ޙަސީނާގެ އިސްތިޢުފާއަށް ބާރު އަޅަން ފެށިއެވެ. މުޒާހަރާތަކުގެ ތެރެއިން ހިނގި ހަމަނުޖެހުންތަކުގައި މަރުވި މީހުންގެ ޢަދަދު ވަނީ 300އަށް އުފުލިފައެވެ. އަދި, އެތަކެއް ހާސް ބަޔަކު ޒަޚަމުވިއެވެ.
އޮގަސްޓު 5ވަނަ ދުވަހު މުޒާހަރާގެ ބައިވެރިން ބޮޑުވަޒީރުގެ ރަސްމީ ގަނޑުވަރު ކޮޅަށް ވަދެ, އެ ތަން ހިސާރު ކުރަން އުޅުމާ ގުޅިގެން ޙަސީނާ އިސްތިޢުފާ ދެއްވުމަށް ފަހު ޤައުމު ދޫކޮށް ވަޑައިގަންނަވާފައި ވަނީ އިންޑިޔާއަށެވެ. އޭނާ އިންޑިޔާގައި ހުންނެވި ކަން އެ ޤައުމުގެ ޚާރިޖީ ވުޒާރާއިން ވަނީ ކަށަވަރު ކޮށްދީފައެވެ.
ޙަސީނާއަށް އިންޑިޔާ ސަރުކާރުން ކިހާ ދުވަހަކު ޙިމާޔަތް ފޯރު ކޮށްދޭނެ ކަން އެ ޤައުމުން ސާފު ކޮށްދީފައެއް ނުވެއެވެ. އެ ކަމާ ގުޅޭ ގޮތުން ނޫސްވެރިން ސުވާލު ކުރުމުން އިންޑިޔާގެ ޚާރިޖީ ވުޒާރާގެ ތަރުޖަމާނު ރަންދީރް ޖަޔަސްވާލް ވިދާޅުވީ, އިންޑިޔާގައި މަޑު ކުރާނީ ކިހާ މުއްދަތަކަށް ކަން ދަންނަވަން އިނގޭނީ ޙަސީނާއަށް ކަމުގައެވެ. "އޭނާގެ ރޭވުންތަކާ މެދު އަޅުގަނޑުމެން ބަސް ބުނުމަކީ މުނާސިބު ކަމެއް ނޫން،" ޖަޔަސްވާލް ވިދާޅުވިއެވެ.
ބަންގްލަދޭޝަށް ކުރިމަތިވެފައިވާ ޙާލަތާ މެދު އިންޑިޔާއިން ވަނީ ބައިނަލްއަޤުވާމީ މުޖުތަމަޢާ އެކު މަޝްވަރާ ކޮށްފައެވެ. އެ ގޮތުން, އިންޑިޔާގެ ޚާރިޖީ ވަޒީރު ސުބްރަމަނިޔަމް ޖައިޝަންކަރް ވަނީ އިނގިރޭސިވިލާތުގެ ޚާރިޖީ ވަޒީރަށް ފޯނުން ގުޅުއްވައި, ބަންގްލަދޭޝްގެ ޙާލަތާ މެދު މަޝްވަރާ ކުރައްވާފައެވެ.
ޙަސީނާގެ އިސްތިޢުފާއާ ގުޅޭ ގޮތުން އޭނާގެ ދަރިކަލުން ސަދީބް ވާޒިބް ޖޯއި ވިދާޅުވީ, އަވާމީ ލީގުން ބަލި ގަބޫލު ނުކުރާނެ ކަމަށާއި, އިދިކޮޅު ޕާޓީތަކާއި ވަގުތީ ސަރުކާރާ އެކު މަޝްވަރާތައް ބާއްވަން އެ ޕާޓީން ތައްޔާރަށް އޮތް ކަމުގައެވެ. "އަޅުގަނޑުގެ ޢާއިލާއިން ވަނީ ސިޔާސީ މައިދާނުން ފެޔަށް ޖެހެން ނިންމާފައި. ނަމަވެސް, ޕާޓީގެ ވެރިންނާއި މެންބަރުންނަށް އަމާޒުކޮށް ޙަމަލާ ދިނުމަކީ ބަލައިގަނެވޭނެ ކަމެއް ނޫން،" އޭނާ ވިދާޅުވިއެވެ.